Taumafaiga Ina ia Toe Malosi

PE A faatoʻā mavae se pē faafuasei o le fatu, o se mea masani mo se tagata ona ia lagona le fefe ma le popole. Pe o le a toe tupu lenei mea ia te au? Pe o le a ou lē toe mafai ona fai se mea pe itiiti ni mea ou te faia ona o tiga ma le mou atu o le malosi ma le malaulau o le tino?

O Ioane, lea na taʻua i la tatou mataupu lona lua, sa ia faamoemoe a o faagasolo atu taimi, o le a mou atu ai ma le tulaga lē lelei ma le tiga o lona fatafata. Ae ina ua mavae ni masina, na ia faapea mai: “Sa leai lava se suiga. O lena tulaga, faatasi ai ma le vave lē lavā ma le soona tātāvale o loʻu fatu, ua atili ai ona ou fesiligia aʻu i taimi uma, ‘Pe ua ou tau latalata atu ea i se isi foi pē faafuasei o loʻu fatu?’”

Na taʻutino e Sieni, mai le Iunaite Setete, o se fafine ua oti lana tane sa talavou i le taimi na pē faafuasei ai lona fatu e faapea: “Na ou manatu lava ailoga ou te toe ola, pe o le a toe pē faafuasei foi loʻu fatu ma ou oti ai. Sa matuā faapopoleina aʻu, auā sa iai si aʻu fanau e toatolu na tausi.”

O Hiroshi, mai Iapani, na ia faamatala mai: “Sa avea o se tala e faateia ai le taʻu mai faapea ua lē toe mafai ona gaoioi loʻu fatu i le tulaga e pei ona sa iai muamua; ua paʻū ifo i le 50 pasene le tātā o loʻu fatu. Na toetoe lava a ou maumaututū e faaitiitia nisi o aʻu gaoioiga o se faifeau Molimau a Ieova, auā sa matuā itiiti lava mea e mafai ona ou faia mai le tele sa ou faia ai muamua.”

Pe a oo ina faatapulaa le malosi o se tasi, atonu e oo ifo lagona o le mafatia ma le lē toe aogā. O Marie, o se tuafafine Ausetalia e 83 ona tausaga, o lē na tuutoina atu lona taimi atoa i le galuega talaʻi a Molimau a Ieova, sa faapea mai: “Sa ou faanoanoa tele ona o le lē toe mafai ona ou gaoioi e pei ona sa ou iai muamua. Nai lo o loʻu fesoasoani atu i isi, ae o lenei ua ou manaomia se fesoasoani.” I Aferika i Saute, na faapea mai ai Harold: “E tolu masina na lē mafai ai ona ou toe galue. Na pau le mea sa mafai ona ou faia i na taimi e na o le savalivali faataamilo lava i le togalaau. Sa avea lena o se mea e lē fiafia ai!”

Sa manaonmia ona faia se taotoga e sosoo ai ālatoto na puni o Tomasi, o se tagata Ausetalia, ina ua faalua ona pē faafuasei lona fatu. Na ia faapea mai: “E lē mafai ona ou tatalia le tiga, ma o le faia o se taotoga tele sa matuā faigata lava pe a mafaufau i ai. O Jorge, o se tagata mai Pasili, sa ia faapea mai e faatatau i āuga o se taotoga o le fatu: “Ona o le lē lelei o loʻu tulaga tau tupe, sa ou popole ai ina neʻi tuua na o si aʻu avā e aunoa ma se fesoasoani. Sa ou faapea lava ailoga o toe umi se taimi ou te ola ai.”

Ua Toe Malosi

O le ā ua fesoasoani i le toatele e toe malolosi ai ma toe faaleleia o latou lagona ootia? Sa faapea mai Sieni: “Pe a ou lagona le popole, e masani lava ona ou liliu atu ia Ieova i le tatalo ma lafo atu ia te ia oʻu popolega ma tuu ai iina.” (Salamo 55:22) E fesoasoani le tatalo i se tagata ina ia toe maua le malosi ma le filemu o le mafaufau lea e manaomia tele pe a fesagai o ia ma popolega.—Filipi 4:6, 7.

Sa auai Ioane ma Hiroshi i polokalame e toe faaleleia ai le malosi. O le paleni lelei o le fuafuaina o meataumafa ma le faia o faamalositino na faamalosia ai o la fatu, ma na mafai ai e i laua uma ona toe faigaluega. Ma sa la talisapaia e faapea, sa mafai ona la toe malolosi mai i le mafaufau ma lagona ootia ona o le malosi mai le agaga o le Atua.

Ona o le lagolagosua mai ona uso Kerisiano, sa maua ai e Tomasi le lototele e onosaia ai lona taotoga. Na ia taʻua: “A o lei faia le taotoga, na sau se ovasia e asi mai aʻu ma sa ia faia se ma tatalo. I se olega sili o lagona alofa, na ia aioi atu ai ia Ieova ina ia faamalosia mai aʻu. I lena po sa ou mafaufau ai pea i lana tatalo ma ou lagona loʻu matuā faamanuiaina i le iai o ni toeaina e pei o ia o lē ua avea ona lagona tiga alofa i taimi o lagona ootia, o se vaega o le faagasologa mai o le faamaloloina.”

O Anna, mai Italia, sa ia onosaia mafatiaga i le auala lenei: “Pe a ou loto vaivai, ona ou mafaufau lea i faamanuiaga uma ua ou maua i le avea o se tasi o auauna a le Atua ma faamanuiaga o le a maua mai i le Malo o le Atua. E fesoasoani lenei ia te au e toe maua ai loʻu toʻafilemu.”

Ua loto faafetai Marie mo le fesoasoani a Ieova. Sa lagolagosua tele lona aiga ia te ia, ma ua ia faapea mai: “E tofu oʻu uso ma tuafafine faaleagaga ma a latou avega e tauave, peitai sa latou faatulaga pea se taimi e asiasi mai ai ia te au, pe telefoni mai, pe lafo mai foi ni tusi. E faapefea la ona ou faanoanoa pea a o faaalia uma mai nei alofa?”

E Leai ni Loto ua Tuulafoaia

E iai le faaupuga faapea o le loto ua faamaloloina e lē tatau ona avea o se loto ua tuulafoaia. O le lagolagosua a aiga ma uo ua faia se vaega tele, ma le lelei, i le toe faamalosia o i latou e tatau ona toe togafitia i le itu faaletino o latou fatu pe faaleleia faafaatusa o latou loto.

O Mikaele, mai Aferika i Saute, na ia faapea mai: “E faigata ona faamatala atu i isi pe faapeī lagona o le loto vaivai. Ae pe a ou savali atu i totonu o le Maota o le Malo, o se matuā faamafanafanaloto ma faalaeiau ia te au le manatu mamafa o loo faaalia mai e uso.” Sa faamalosia foi Enele, o se tagata mai Ausetalia, ona o le alofa loloto ma le agaga malamalama na faaali atu e lana faapotopotoga ia te ia. Na ia faapea mai: “Sa ou manaomia tele na upu alofa o faalaeiauga.”

Sa talisapaia e Jorge le tele o le manatu mamafa o isi sa faaalia e ala i le fesoasoani i lona aiga i le tulaga tau tupe seia oo ina mafai ona ia toe faigaluega. Sa faapena foi ona talisapaia e Olga, mai Suetena, le fesoasoani aogā na tuuina atu ia te ia ma lona aiga e le toatele o uso ma tuafāfine faaleagaga. O nisi sa latou faia faatauga mo ia, a o isi sa latou faamamāina lona fale.

O le tulaga masani, e tatau i tagata maʻi fatu ona faatapulaa lo latou auai i ni gaoioiga sa latou fiafia tele i ai. Sa faamatala mai e Sven mai Suetena e faapea: “O nisi taimi e tatau ai ona ou lē auai atu i le faiva pe afai e savili tele pe mālūlū tele le tau, auā e mafai ona pei ua faalogoina ai le tuutaseʻi o ālatoto. Ou te talisapaia le agaga malamalama e faaalia mai e le toatele o oʻu uso Molimau e faatatau i lenei mataupu.” Ma a o faataotolia Sven, sa mafai ona ia faalogologo atu i sauniga auā na pueina ma le agaalofa e uso le polokalame i lipine. “Latou te faamatala mai lava ia te au mea uma o loo tutupu i le faapotopotoga, ma ou te lagona ai lava e pei o loo faia ai sau vaega iina.”

O Marie foi, o lē na faataotolia, e na te lagona le faamanuiaina ona o le ō mai ia te ia o i latou sa latou suesueina faatasi le Tusi Paia. I lenei itu, e mafai ai ona ia faaauau ona talanoaina le lumanai ofoofogia o loo ia nofo tatali i ai. Ua loto faafetai Tomasi i le manatu alofa na faaalia ia te ia: “E ese le magafagafa o toeaina, ma ua latou faaitiitia tofiga latou te aumai ia te au.”

E Manaomia e Aiga le Lagolagosua

Atonu e faigata le tulaga o mea i tagata o le aiga e pei foi ona faigata i le tagata lea e maʻi. Ua aafia i latou i le tele o mafatiaga ma popolega. E tusa ai o popolega o lana avā, na taʻua e Afele, mai Aferika i Saute e faapea: “Ina ua ou foi i le fale mai le falemai, sa fai ma masani a laʻu avā le fafagu o aʻu i le tele o taimi o le po e faamautinoa po o lelei pea mea uma ia te au, ma e maumauai pea o ia ina ia ou alu e vaai le fomai i le taʻi tolu masina uma lava.”

Ua taʻua i le Faataoto 12:25 e faapea o le ‘atuatuvale i le loto o le a faavaivaia ai.’ Ua iloa e Carlo, mai Italia e faapea, talu mai lava le taimi na pē faafuasei ai lona fatu, “ua matuā mafatia” lava si ana avā alofa ma le lagolagosua. O Lolenese, o se tane mai Ausetalia, na ia faapea mai: “O se tasi o mea ia faamautinoa, o le lelei lea ona tausia lau paaga. E mafai ona telē le mafatiaga e oo i le paaga.” E tatau ai la ona teu i o tatou mafaufau manaoga o tagata uma o le aiga e aofia ai ma le fanau. E mafai e le tulaga ua tulai mai ona aafia ai i latou i faalogona ootia ma i le tino foi.

O Iakopo, lea na taʻua i la tatou mataupu lona lua, na teʻi lava ua matuā matamuli, lē toe fia tautala ina ua mavae le pē faafuasei o le fatu o lona tamā. Na ia faapea mai: “Sa ou faapea e lē mafai ona ou toe maua le fiafia, auā sa ou manatu o le taimi lava ou te toe fiafia ai o le a iai se mea leaga e tupu.” O le faamatala atu o ona popolega i lona tamā ma le taumafai e faatupuina ni fesootaiga lelei ma isi sa fesoasoani lea i le faatoafilemuina o lona popole. I lena taimi, sa faia ai e Iakopo se isi mea na sili ona tele se aafiaga i lona olaga. Na ia faapea mai: “Sa ou faateleina aʻu suesuega totino o le Tusi Paia ma aʻu sauniuniga mo a matou sauniga faa-Kerisiano.” I le tolu masina mulimuli ane, na tuuina atu ai lona ola ia Ieova ma faailogaina i le papatisoga i le vai. Fai mai o ia: “Talu mai lena taimi, ua ou atiina ae ai se faiā vavalalata ma Ieova. E matuā telē saʻu faafetai ia te ia mo lenei mea.”

Pe a mavae le pē faafuasei o le fatu o se tasi, e na te maua ai se taimi e toe iloilo ai lona olaga. Mo se faaaoaoga, sa toe suia le vaaiga a Ioane. Na ia faapea mai: “Ua e vaaia le leai o se aogā o le sailia o mea faalelalolagi ma iloatino ai le tāua o le alofa o le aiga ma uo, ma le tele o le faatāuaina o i tatou e Ieova. Ua sili atu nei ona ou faamuamuaina laʻu faiā ma Ieova, ma loʻu aiga, ma oʻu uso ma tuafāfine faaleagaga.” O le toe mānatu i le tulaga matautia o le mea na oo ia te ia, sa ia toe faapea mai: “E lē mafai ona ou faaataina soʻu manumalo mai lenei mea pe ana aunoa ma lo tatou faamoemoe atu i le taimi o le a toe faasaʻoina ai nei mea. Pe a ou lagona le mafatia, ona ou mafaufau lea i le lumanai, ma ou manatu i le itiiti o le tāua o mea o loo tutupu i le taimi nei.”

A o latou fesagai ma gaogaosā a o faia togafitiga ina ia toe malolosi, sa mausalī pea ia i latou nei na aafia i le pē faafuasei o le fatu, lo latou faamoemoe ua faalagolago atu i le Malo lea na aʻoaʻo mai e Iesu Keriso i tatou e tatalo atu i ai. (Mataio 6:9, 10) O le a aumaia e le Malo o le Atua i tagata le ola e faavavau i se tulaga lelei atoatoa i le lalolagi parataiso. Ona soloiesea ai lea e faavavau le maʻi fatu ma isi uma tulaga lē atoatoa o le tino. Ua latalata mai lava le lalolagi fou. O le mea moni, ua toeitiiti ona oo mai lea o tulaga e sili ona lelei o le olaga!—Iopu 33:25; Isaia 35:5, 6; Faaaliga 21:3-5.

[Ata i le itulau 21]

O le lagolagosua a le aiga ma uo ua faia ai se vaega lelei i le toe faamalosia o le maʻi