Faasaoina Mai se Lalolagi Matapeapea

“E MAFAI faapefea ona faasaoina aʻu?” Na fesagai James Scott ma lena fesili ina ua mou atu lona faamoemoe ina ua sē i atu mauga o Himalaya. Na iai o ia i se tulaga matautia moni lava a lē o le malō i le aisa po o le matelaina i le fia ʻai. Na ia toe manatua ai le taimi na vaai atu ai i tagata o loo i tauvaga kalate “ua faifai malie atu lo latou malosi, o aa taitasi ua faavaivaia ai o latou loto seia oo ina . . . matuā lē mafai ona latou toe puipuia i latou lava.” Na faapea mai o ia: “O le lagona lena sa ia te au a o oʻu tosoina le sipi o le taga na ou moe ai ma ʻai ni kiona a o matuā lagona le fāi atu o le malosi. Na matuā nutimomoia loʻu loto ma teʻa ese atu le agaga o le fia ola mai ia te au. E lei oo muamua ia te au se lagona toilalo faapea.”—Lost in the Himalayas.

O le toatele i aso nei, o loo iai i se tulaga e pei o ia—ua utia i totonu o se lalolagi ua pulea e le matapeapea. Atonu e te lagona le faifai malie ifo o lou filigā ma ua faatoilaloina. E toaitiiti lava tagata latou te sao mai i aafiaga e vave tulai mai ona o le matapeapea. E faalagolago lava i le mea o e ola ai i le lalolagi, o faafitauli o lua feagai e telē lava so latou eseesega—e eseese le auala o aafia ai tagata o atunuu tau atiaʻe mai i malo e tamaoaiga tele. Peitai ane, e tusa lava po o ā toatuga, atonu e mafai ona e aʻoaʻoina le auala e faasaoina ai i se tulaga e mafai ai pea ona gaoioi faaletino, tau faalogona, ma le faaleagaga seia oo ina taunuu mai le laveaiga. E faapefea? E ala lea i le mulimuli atu i taiala faavae ua tuuina mai e nisi ua iai le tomai e tusa ai ma le tulaga faasaoina.

E lua manatu ua matilatila mai i a latou fautuaga. O le mea muamua o le alofia o le faaleagaina atili o se tulaga faigata o iai. Ua faapea mai le Urban Survival Handbook: “O le auala e te gaoioi ai, o le tatau lea ona alofia ni taumafaiga e lē manaomia e ono lamatia ai . . . ma faaitiitia ai tulaga leaga e tulai mai e māfua mai i mea e lē mafai ona e alofiaina.” O le lona lua—ma atonu o le mea lea e sili ona tāua—e fesootai atu lea i uiga faaalia. Ua faapea mai le tusi The SAS Survival Handbook: “O le faasaoina, e tele ina faalagolago atu i uiga o le mafaufau e faapena foi i le onosai faaletino ma le poto.”

Faia le Mea E te Mafaia e Tusa ai ma Tulaga

“I le Iunaite Setete e fasiotia ai se tasi i le taʻi 22 minute, e gaoia ni mea totino i le taʻi 47 sekone, ma fasia faamoʻamoʻa se tasi i le taʻi 28 sekone,” o le lipoti lea mai le Staying Alive—Your Crime Prevention Guide. I tulaga faapenei, o le ā e mafai ona e faia? O le mea e tatau ona e faia, o lou taumafai lea e alofia le avea o oe ma sē e faigofie ona taulai atu i ai nei faiga. Ia e mataala ma ia matapoto. Fai le mea e te mafaia ina ia faaitiitia ai le tulaga lamatia.a

E fai ma faataitaiga, aua e te tuua lou tulaga ia sili atu ona leaga e ala lea i le faigofie ona faavaleaina. Ua lipotia mai e le New York Times e faapea o le 18 pasene o tagata Amerika ua latou taʻutino mai o ē na afaina ona o ni faiga taufaavalea—ua faaseeina ma maimau ai le faitauafe o tālā e ala atu i tagata lē taupulea o ē o loo tuliaupuina tagata e faigofie ona faavaleaina. E masani lava o ē ua afaina i nei faiga o ē ua matuā matutua lava e pei o se fafine ua oti lana tane e 68 tausaga le matua lea na gaoia lana 40,000 tālā Amerika. O le mea na tupu i lenei fafine na ala ai ona tusia se ulutala: “Pe Afai e Sinā Lona Lauulu, e Iloa Atu e le ʻAu Taufaavalea le Lanu Meamata [o lona uiga o tupe, po o tālā].”

Peitai e lē faapea o le a avea oe ma se tasi e lē o nofouta, se tagata o le a afaina ae ua lē mafesoasoania o loo faatalitalia le oo atu i ai o ni faiga taufaasese. Ua lapataia i tatou e le Staying Alive e faapea: “Ia faaeteete i luko e oofu mai i paʻu mamoe.” Na utagia e se tinā matua e 70 tausaga lenei fautuaga. Na ofoina atu ia te ia le saunia e le inisiua o ana vailaau faafomai, pe afai na te totogi atu le 10 tālā Amerika i masina taitasi. Ua faapea mai le lipoti: “E na o le pau le mea e faia e Tinā matua, o le muai totogi atu lea i le tagata o faatauina atu inisiua le 2,500 tālā Amerika.” Sa lei faia e ia. I lona telefoni atu i le kamupanī inisiua, na ia iloa ai o se tamaloa taufaavalea lea la te talanoa. “A o ia ligiina atu le ipu ti lona lua a le tamaloa faatau inisiua, ae taunuu ane loa leoleo i lena taimi ma ave le tamaloa.”

O le faia o le mea e te mafaia e puipuia ai oe lava e mautinoa o loo iai i fautuaga ua aumaia e le Tusi Paia. “O le ua faigofie, e talia e ia upu uma; a o le ua mafaufau, ua faautauta o ia i lona ala.” (Faataoto 14:15; 27:12) E toatele ua latou lē amanaiaina le Tusi Paia e faapea ua faaanamua tele ma ua lē toe aogā. Peitai o ana fautuaga aogā e mafai ona fesoasoani ia te oe e faasaoina ai. Na tusi faapea le tupu poto o Solomona: “Auā ua fai le poto ma mamalu, ua fai foi tupe ma mamalu; a o le aoga lenei o le poto ua maua, e ola ai e ua i ai.”—Failauga 7:12.

E toatele i latou o faitauina le Ala Mai! ua latou iloaina le moni o lenei mea. Mo se faataitaiga, ua maua e nisi sina puipuiga e ala i le matuā ee leotele pe a faamataʻuina faapea o le a toso faamalosia po o isi faiga sauā, ua talafeagai ma le mea ua taʻua i le Teuteronome 22:23, 24. O isi ua latou mulimuli atu i le fautuaga a le Tusi Paia ina ia taumamao mai mea “e leaga ai le tino atoa ma le agaga.” (2 Korinito 7:1) O lea ua faapea ona puipuia ai i latou mai le ʻau faatau tapaa ma vailaau faasaina, o ē ua latou faatamaoaiga i latou i mea e faaleagaina ai le soifua maloloina o tagata. O le toatele o le ʻau faitau ua latou alofia foi mailei o le gaoia o tupe e tagata o talaʻi mai i le televise ma tagata fai polotiki e tuinanau atu i le pule. (Tagai i le pusa, i le itulau e 7.) Faitau i le Tusi Paia. E ono faateia ai oe i le tele o fesoasoani aogā ua ia aumaia.

Alofia le Pisia i le Matapeapea

O le mea moni, o loo iai se isi tulaga matautia mai le matapeapea—e mafai ona avea ai oe ma se tasi e matapeapea. O le a aveesea mai ai ou uiga lelei tau amio lea ua faaesea ai tagata mai manu. I le faamatalaina o se faasalalauga faapisinisi lea e pule lava le tagata ia i lana mea e fai i tulaga o loo faaloloto ai le ʻau faipisinisi i le faia o polofiti i so o se mea e maua ai, na taʻua ai se tala a se tasi tagata mātau mea e faapea: “Sa matuā faaaogā uma e le ʻau faaloloto avanoa mo ni polofiti. Na oo atu le matapeapea . . . i le lē mafai ona pulea.” E lē faaloloto faapena isi puaa e pei o isi fai pisinisi! Ua mautinoa lava lo latou teena o le fautuaga na ofo mai e Iesu Keriso e faapea: “Ia outou, ia leoleo outou ia te outou auā le matapeapea.”—Luka 12:15.

Na aumaia e Iesu Keriso lena fautuaga ona sa ia silafia lelei le tele o le faaleagaina ai o oe lava pe a pulea e le matapeapea. O le tuinanau mo mea faitino—o le mea moni, e faapena foi ma le tuinanau i le pule po o feusuaiga—e mafai ona avea o se mea e tuu uma atu i ai lou alofa, e faoa ai le taimi po o se faanaunauga atonu o loo ia te oe ina ia naunau atu ai i tagata po o ni mea aogā faaleagaga. Ua faapea mai Anthony Sampson i lana tusi The Midas Touch: “Ua pulea e tupe le tele o uiga lelei o se lotu.” E faapefea? Ua avea tupe ma se atua. O isi mea uma ua faataulaga i luga o le fatafaitaulaga faafaatusa o le matapeapea ma le maua mai ai o mea. O le agaga autū o iai o le maua mai lea o le polofiti. O le telē o le polofiti, o le sili atu lena ona lelei. E ui i lea, o le mea moni, e tusa lava po o le ā le tele o le taimi e te tuuina atu i ai, o le matapeapea mo mea faitino o le a lē atoatoa le faamalieina. Ua faapea mai le Failauga 5:10: “O le ua manao i le ario, e le malie o ia i le ario; o le ua manao foi i le oloa tele, e leai sana mea e maua ai.” I se uiga tutusa foi, “o le manao” i le pule, mauaina o mea, po o feusuaiga o le a lē taitai lava ona faamalieina, e tusa lava po o le ā le tele na te mauaina ai.

Aua le Faamaamulu i le Faamoemoe o le Faasaoina

O se tasi ki tāua i le faasaoina o le tausisia lea o se vaaiga e iai se faamoemoe ma le mautinoa. O nisi taimi, e itiiti lava se mea e mafai ona e faia e sola ese ai mai i aafiaga mai tagata matapeapea. Mo se faataitaiga, o tagata o loo matelaina i le fia ʻaai, e masani ona itiiti lava se mea e mafai ona faia ia sao ai i tulaga o latou iai nei. Peitai, aua le faavaivai; aua le togiina le solo. Ua faapea mai le SAS Survival Handbook: “E faigofie ona faamatuu atu, faavaivai ma lofituina i ou lava lagona faanoanoa” pe a fesagai ma se tulaga faalealofa po o se siosiomaga matautia. Aua le lolo atu i manatu ma faalogona lē lelei. Atonu e ono faateia oe i le tele e mafai ona e onosaia. Ua faapea mai lenei lava tamai tusi: “Ua faaalia e tamaloloa ma fafine e mafai ona latou ola i tulaga e sili atu ona faigata.” Na mafai faapefea ona latou mafaia? Ua faapea mai ua mafai ona ola ai pea i latou, “talu ai lo latou finafinau ina ia faia faapea.” Ia maumauai ina ia lē faatoilalo oe e lenei faiga o mea matapeapea.

O James Scott, lea sa taʻua muamua, na oo ina laveaiina mai Himalaya lea na semanū e avea ma ona tuugamau. Na faapea mai o ia, o lana tauiviga ina ia faasaoina na ia aʻoaʻoina ai se tasi o lesona e sili ona tāua. O le ā lena lesona? Na ia faapea mai: “E leai se luitau i le olaga faigata e lē mafai ona faafetaiaia. O Tim Macartney-Snape, o se tagata e tomai i le aʻe mauga na maua foi e ia se lesona, na ofo ona sa umi ona ola ia James Scott, ina ua maua atu o ia e lei oti. Na ia faapea mai: “Afai o iai sina faamoemoe, e lē tatau lava ona e faamaamulu.” E tusa po o le ā le lē mautonu o le foliga mai o mea ia te oe, o le a sili atu ona leaga pe afai ua mou atu lou faamoemoe. Aua le lafoaia le faamoemoe mo le laveaiina.

Ae pe e iai ea sina “faailoga e iai se faamoemoe,” so o se avanoa moni o le laveaiina mai i se lalolagi ua faatumulia i le matapeapea? Po o le a lē toe iai ea tagata matapeapea o ē o loo faatamaia lenei paneta ma faaleagaina le faitau piliona o ola? O le mea moni, o loo iai se faamoemoe mautinoa mo le laveaiina. Ia manatunatu i le tali mai le Tusi Paia i le mataupu o sosoo mai.

[Faaopoopoga i lalo]

[Pusa i le itulau 7]

O Lapataiga a le Tusi Paia ua Fetaui ma le Taimi

Faataoto 20:23 “E inosia e Ieova maa eseese e fua aʻi; o fua faatāutau faaaimago e le lelei ia.”

Ieremia 5:26, 28 “Auā ua i ai i loʻu nuu o tagata amio leaga; ua latou lamalama e pei ona faapuga o e mailei manu; ua latou tuu le mailei [leaga], ua latou maua tagata. Ua puputa i latou, ua usiusi; ua silimusa i latou ona fai amio leaga; ua latou le fai le finauga, o le finauga lava a le ua aumatuā, a ua manuia i latou; o le faamasinoga foi a e matitiva ua latou le faamasinoina.”

Efeso 4:17-19 “O lenei, ou te fai atu ia te outou, ma taʻutino atu lenei mea ona o le Alii, aua tou te toe savavali faapei o nuu faapaupau, o e savavali i le valea o o latou loto. O loo faapouliuligia o latou mafaufau, o liliueseina i latou i le ola o i le Atua, ona o le valea ua ia i latou, ona o le maaa o latou loto. Ua latou le lagona se mea, ua tuuina atu i latou e i latou i le matāitu, e fai mea leaga uma lava ma le tuʻinanau i ai.”

Kolose 3:5 “O lenei, ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tuʻinanau leaga, ma le matapeapea, o le ifo i tupua lava lea.”

2 Timoteo 3:1-5 “A e ia e iloa e oe lenei mea, o ona aso e gata ai e oo mai ai aso faigata. Auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e le ma faaleleia, o e faatuaupua, o e le taofi manao o le tino, o e faasaua, o e inoino i le amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua toaga i lotu, a o le mana ua i lea mea ua latou teena; ia e ʻalo ese lava i tagata faapena.”

2 Peteru 2:3 “O le matapeapea foi i a outou mea, ua latou faavalea ai outou i upu pepelo; e le tuai mai ia te i latou le sala na fetalaia mai talu anamua, o lo latou malaia foi e le moe lea.”