Auala e Ono e Puipuia ai Lou Soifua Maloloinda

TUSIA E LE SUI O LE ALA MAI! I NIGERIA

E TUSA ai ma le Faalapotopotoga o le Soifua Maloloina a le Lalolagi (WHO), pe tusa o le 25 pasene o tagata o loo soifua i atunuu tau atiae e lē o mauaina ni vai o loo saogalemu. E sili atu i le 66 pasene—e lē itiiti ifo ma le 2.5 piliona tagata—e matuā leaga mea o loo lafoaia ma togafitia ai otaotavale. O iuga mo le toatele, o faamaʻi ma le oti.

I na tulaga, o le tausia o le soifua maloloina lelei ua avea o se luʻi. Peitai, pe a e faamasani e tausia le tumamā totino o le tagata lava ia ma masaniga o le olaga, o le a e puipuia ai oe lava mai i le tele o faamaʻi. O laasaga nei e ono e mafai ona e faia e puipuia ai oe lava ma lou aiga mai siama ia e mafai ona ulu atu i lou tino ma māfua ai le maʻi.

1. Ia fufulu ou lima i se fasimoli ma ni vai pe a uma ona fesootai ou lima ma otaotavale ma a o lei loteina foi meaʻai.

O se auala tāua e puipuia ai mai maʻi o le faamautinoa o loo iai pea le fasimoli ma ni vai ina ia fufuluina ai e tagata uma o lou aiga o latou lima. O le fasimoli ma vai e aveesea ai siama mai i lima—siama ia atonu e ono oo i meaʻai po o le gutu. Talu ai o tamaiti laiti e masani ona tuu o latou tamatamailima i totonu o o latou gutu, e tāua la le fufuluina soo o o latou lima, ae maise lava a o lei avatuina ia i latou ni meaʻai.

E matuā sili atu ona tāua le fufuluina o ou lima i le fasimoli pe a uma ona faaaogā le faleese, a o lei tagofia meaʻai, ma pe a maeʻa foi ona faamamāina le nofoaga o se pepe po o se tamaitiiti lea faatoʻā uma lava ona fai le feaumamao.

2. Faaaogā se faleese.

Ina ia puipuia le salalau atu o siama, e tāua tele le lelei ona lafoaia o le otaotavale. O le tele o maʻi, ae maise lava le manavatatā, e sau mai siama e i otaota o tagata. O nei siama e mafai ona oo atu i vai inu po o meaʻai, i lima po o mea o loo faaaogā e fai ai meaʻai po o luga foi o mea o loo sauniunia ai meaʻai. Pe afai e tupu lena mea, e mafai ona foloina e tagata siama ma oo ai ina mamaʻi.

Ina ia fesoasoani e puipuia lenei mea, ia faaaogā se faleese. O otaota o manu e tatau ona faamamao ese mai i fale ma punāvai. Atonu e faateia oe i lou iloa faapea o otaota o pepe ma tamaiti laiti e sili atu ona matautia nai lo otaota o tagata matutua. O lea la, e oo lava i tamaiti laiti e tatau ona aʻoaʻoina i le faaaogaina o se faleese. Pe a faia e tamaiti feaumamao i isi mea, e tatau loa lava ona faamamāina ma faaalu i le faleese po o le tanumia foi.

E tatau ona tausia mamā faleese ma ufiufi.

3. Faaaogā vai mamā.

O aiga o loo tele le sapalai o vai paipa mamā, e tau lē mamaʻi soo nai lo i latou o ē e lē lava le vai. O i latou e leai se vaipaipa e mafai ona puipuia lo latou soifua maloloina e ala i le ufiufia o vaieli ma tuu mamao ese vai leaga mai vaiinu, vai e taeele ai, po o vai e tatā ai mea. E tāua foi le faamamao ese o meaola mai i le fale ma vaiinu.

O le isi auala e puipuia ai oe mai faamaʻi o le tausia o pakete, maea, ma fagu e faaaogā e utuina ma teuina ai vai ia mamā lelei. E sili atu, mo se faataitaiga, le tautauina o se pakete nai lo le tuuina i lalo.

O vaiinu e tuuina i le fale e tatau ona tuuina i se mea mamā e teu ai ma ufiufi. O le asueseina o vai mai i lena mea o loo tuu ai, e tatau ona faia i se asu po o se iputi mamā. Aua neʻi faatagaina tagata e tuu o latou lima i totonu o vaiinu po o le inu saʻo mai i le mea o loo teuina ai vai.

4. Ia faapuna vaiinu seʻi vaganā e sau mai se paipa o loo saogalemu ai le vai.

O vaiinu e sili atu ona saogalemu e sau lea mai le vaipaipa. O vai mai i isi puna e ono iai siama, e ui lava atonu e foliga mamā mai.

O le faapunaina o vai e faamamateina ai siama. O lea pe afai e te aumaia vai mai vailepa, vaitafe, po o tanevai, e atamai le faapunaina ona tuu lea seʻi maalili a o lei inuina. O vaiinu o loo sao mai i siama, e matuā tāua tele mo pepe ma tamaiti laiti, talu ai e itiiti lo latou malosi e tetee ai i siama nai lo tagata matutua.

Pe afai e lē o mafai ona faapunaina vaiinu, ia teuina i totonu o se mea e tuu ai e ufiufi lelei e faia i le una po o le tioata. Ona faatū lea i se mea lā mo aso e lua a o lei faaaogaina le vai.

5. Ia tausia mamā au meaʻai.

O meaʻai taumafamata e tatau ona fufulumamāina. O isi meaʻai e tatau ona faavela lelei, ae maise lava fasipovi ma moa.

E sili atu le taumafaina o meaʻai i le taimi lava e uma ai ona kuka; i lena auala o le a lē oo ai ina mafu. Afai e te tuuina meaʻai vela mo le sili atu i le lima itula, e tatau ona e faavevelaina pea po o le tuuina i le pusaaisa. A o lei taumafaina, e tatau ona e toe faavevelaina lelei.

O aano o manu e lei faavelaina e masani lava ona iai siama, o lea la e lē tatau ona e faatagaina na mea e paʻi atu i meaʻai na ua e kukaina. Pe a uma ona saunia aano o manu e lei faavelaina, ia faamamā mea sa faaaogā i aano o manu ma so o se mea sa paʻi atu i ai.

O mea sa sauniunia ai i luga meaʻai e tatau ona tausia ia mamā. E tatau ona ufiufi ma tuu i se mea e lē sao i ai lago, isumu, ma isi meaola.

6. Ia susunu pe tanumia lapisi a aiga.

O lago, ia e faasalalauina siama, e fiafia e tuufua i lapisi o meaʻai. O lea la o lapisi a aiga e lē tatau ona lafoai solo i luga o le eleele. E tatau ona tanuina, susunu, po o le tuuina faalelei i nisi o auala i aso uma.

E ala i le faatatauina o nei taiala, e mafai ai ona fesoasoani e puipuia ai oe ma lou aiga mai le manavatatā, kolera, taifoi, faamaʻi e māfua mai i anufe, ona o meaʻai, ma le tele lava o isi faamaʻi.

[Ē Ana le Ata]

Puna o faamatalaga: Facts for Life, lomia faatasi e le United Nations Children’s Fund, United Nations Educational, Scientific, ma le Cultural Organization, ma le WHO.