Po ua E Fiu ea i Lau Galuega?

ATONU e te faigaluega pe ā ma le valu itula i le aso. Ua maimau atu lena taimi telē ma le olaga i le faafiufiu! Ae peitai, ua avea le tele o galuega o le 20 senituri ma mea ua masani ai le olaga i aso uma, ma ua itiiti se mafuaaga e mitamita ai le tagata faigaluega i lana galuega.

O lea, e tele ni aogā mo oe i le faia o lau galuega o se mea e naunau i ai. E te maua ai le fiafiaga sili i le galuega, ma e te iloaina ai le ki mo le fiafia i so o se galuega e te faia i le lumanai. O lea seʻi o tatou tilofaia ni auala e faia ai faapea.

Galue ma le Naunau

Ua fautuaina e isi tagata ua lava le poto masani, ina ia galue peiseai e te fiafia i ai. Mulimuli ane ai o le a iu ina e fiafia i lau galuega pe afai e te faia faapea.

Atonu e te tali mai faapea, ‘Ae e lē mafai lava ona ou naunau i laʻu galuega!’ Atonu o lau galuega e taotasi lona faasologa, e pei o le tu i se laina o loo faagasolo ai le faia o galuega. Pe atonu foi e te lagonaina faapea ua lē mafai ona faafouina lou naunau ona ua tele tausaga talu ona e galue i lena galuega. Ae peitai, o gaoioiga faigofie e pei o le mata ʻataʻata ma le tu saʻo i luga, e ono fesoasoani ia te oe ina ia sili atu ai lou naunau i lau galuega.

E fesoasoani foi pe afai e te uaʻi totoʻa atu i mea o loo e faia. Alofia le tau ina faigaluega, ma aua le faia au galuega ma e mafaufau i le taimi o malologa, le faaiuga o le vaiaso, po o se isi galuega e manaomia ona faia. E masani lava o se gaoioiga poto le matuā uaʻi atoatoa atu i le matātā o loo e galue ai. O le ā le iuga? Atonu e mulimuli ane ai e fiafia i le galuega, ona vave ai lea o le gasologa o le taimi.

O le mea masani lea e tupu pe a e sogasoga i se mea e te fiafia i ai. Atonu o le aafiaga foi lena ia te oe pe afai e te faamalosia oe lava e uaʻi atoatoa atu i se galuega e te tau lē fiafia i ai.

Faia le Mea Sili E te Mafaia

E mafai ona fesoasoani ia te oe le faia o le mea sili e te mafaia, ina ia e maua ai le fiafia i lau galuega. O le mea moni, e tuufaafeagai lena fautuaga ma le manatu taatele e faapea afai e te lē fiafia i le galuega, ona fai lea tau lava ina faataunuu. Ae o le faatalale, o le fai mea tuu, ma le itiiti o ni taumafaiga e fai, e ono faaitiitia ai lou malosi ma faaopoopoina ai popolega ma le vaivai. I nisi tulaga, o le tagata e taunuu atu i le fale mai le galuega ae o loo tiga le ulu, o le popole ma le lē lavā, atonu ua oo i ai mafatiaga ona ua lē taulau ona galue maelega.

E tusa ai ma le Tusi Paia, o le galue mamafa i le faia o se galuega e faafiafiaina ai foi i itula e mālōlō ai. “E leai se tasi mea lelei i le tagata na ona ia ʻai, ma inu, ma faafiafia lona loto i mea lelei i ana galuega.” (Failauga 2:24) I nisi, ua pei lenei mataupu silisili o se anaga ua pasiā, ae ua faatatauina e isi ma ua aogā i taimi uma. O le mea moni, ua latou ioe faapea ‘⁠e leai se tasi mea e sili atu ona lelei’ nai lo lo latou olioli i fua o a latou galuega mamafa. Ua tautino mai e le tusi The Joy of Working e faapea: “O se galuega e faia lelei e iu ai i le faamalieina o le loto.”

O lea, ia fai le galuega i le lelei e sili e te mafaia, ma atonu o le a e lagona ai le malosi. Ia sili atu mea e faia i lo le tau ina faatino, atonu o le a sili atu ai lou fiafia. Ia faia muamua galuega tauā, ona e mauaina lea o le fiafia a o faia le malologa i le aoauli ma faaiuga o vaiaso, e sili atu i le tagata ua vaivai ona o le tolopo soo o galuega.—Faatusatusa i le Eseta 10:2; Roma 12:11; 2 Timoteo 2:15.

Nai lo le faatavā atu i isi, ia naunau e faalelei oe lava. (Kalatia 6:4) Ia faatulaga ni taiala ma ni sini fou. Ia taumafai e faaleleia atili au mea e fai. O se tasi fafine, o lana galuega e aofia ai le faia pea lava pea o suʻisuʻiga, lea e manatu nisi o se mea e fiu ai, na ia taimiina i se auala faataaloga le auala na ia galue ai. Na ia faamaumauina le aofaiga o mea na ia suʻiina i le itula, ona ia taumafai lea e faateleina. Ua ia matuā fiafia i lana galuega ona ua ia taumafai e galue e tusa ai ma ona agavaa.—Faataoto 31:31.

“Teuteu” Lau Galuega

Ua fautuaina e fomai o Dennis T. Jaffe ma Cynthia D. Scott e faapea: “Ia mafaufau i lau galuega e faapei o se fale tuufua. Ua e alu atu e te nofo ai, ona e vaavaai lea i lona tino mai ma lona fausaga. Ona faatupulaia ai lea o ou lava mafaufauga sogasoga. E te mafaufau i le auala e faatulaga ai, le auala e teuteu ai, ma le avea o lea fale ma ou lava nofoaga. E te faia ina ia avea ma au meatotino e ala i le teuteu atu i ai e tusa ma ou mafaufauga patino.”

O le tele o galuega ua tofia ai oe ua tuuina atu faatasi ma faamatalaga o tulafono ma ni taiala. O le faia tau o mea o moomia ua pei o le nofoia o se fale tuufua. E lē o iai ni ona uiga patino. Ae afai e te teuteuina e tusa ma mea e te fiafia totino i ai, ona mafai lea ona avea lau galuega ma se mea e te naunau atili i ai. E leai ni tagata se toalua ua mafai ona tutusa ni auala la te “teuteuina” ai se galuega. Ua taulotoina e se tasi tagata tautū meaʻai ia ota a tagata e masani ona ʻaai i le faleʻaiga. Ae o se isi tagata tautū meaʻai, ua mataulia lona agalelei ma lona faaaloalo. E fiafia uma i a la galuega ona ua faaaogā lelei o la tomai i mea la te faia.

Faaauau Pea Ona Aʻoaʻoina

O le aʻoaʻoina o mea o se tasi lea o auala e maua ai le fiafia i le galuega. Ua faamalamalamaina e le tusi Tension Turnaround e faapea, e faateleina le agavaa o o tatou faiʻai e maua ai faamatalaga a o faasolo ina tatou matutua. Ua faamalamalama e lenei mea le mafuaaga ua tatou fiu ai i mea atonu na tatou fiafia muamua i ai. O le vaifofo, o le faamalieina lea o le manaoga o le faiʻai e maua ai faamatalaga fou, e ala i le aʻoaʻoina o mea fou.

O le aʻoaʻoina o isi mea e faatatau i lau galuega atonu e iu ai i le avatuina o isi galuega e sili atu ona lelei. Ae tusa lava pe e lē tupu lena mea, o le aʻoaʻoina o mea e faatupulaia ai le avea o lau galuega ma se mea e naunau i ai ma faamalieina ai. Ua faasino mai e tusitala o Charles Cameron ma Suzanne Elusorr e faapea: “O le aʻoaʻoina o mea e lē gata e faateleina ai ou agavaa ona o le sili atu o lou mautinoa, ae e aafia ai foi ma lau vaaiga masani i le olaga atoa: e mafai ona foia faafitauli, e mafai ona faaleleia mea e faigata, e mafai ona faaitiitia popolega, ma e tele mea e mafaia ona fai nai lo o mea na e mafaufau i ai.”

Atonu e te tetee ma faapea mai, ‘Ae ua leva ona maeʻa ona ou aʻoaʻoina uma mea e tatau ona iloa e faatatau i laʻu galuega!’ Afai o lea, pe e mafai ona e aʻoaʻoina mea e lē o fesootai tuusaʻo atu i lau galuega? Mo se faaaoaoga, atonu e te filifili e aʻoaʻoina atili le vafealoai o tagata po o faamatalaga e faatatau i au meafaigaluega. Atonu e te aʻoaʻoina le auala e faaleleia ai le tusiaina o se tusi faaleofisa po o le auala e faaleleia ai le faatautaia o se fonotaga i le galuega. E mafai ona e aʻoaʻoina le auala sili e feutagai ai ma tagata o vaavaaia galuega.

Pe faapefea ona e aʻoaʻoina nei mea? Atonu o loo ofoina e lau kamupani ni lesona e mafai ona e auai i ai. Pe atonu o iai i se faletusi se tusi patino o loo e moomia. Ae aua le manatu faatauvaa i ni mea laiti e ono maua mai ai faamatalaga. Atonu o se mea e aʻoaʻoina ai le vaavaai atu i tagata i le galuega ma mataulia o latou uiga mataina ma o latou vaivaiga. E mafai ona e aʻoaʻoina lesona mai measese na e faia, faapea ma mea lelei na e ausia, e ala i le tilofaia o mea saʻo na e faia. O mea ua e iloa mai i mea na tutupu ia te oe lava faapea ma le vaavaai atu i isi, e mafai ona aʻoaʻoina ai oe i mea atonu e te lei faitau ai lava i ni tusi pe faalogo foi i ai mai se vasega sa aʻoaʻoina ai.

Nai Fautuaga Mulimuli

E iai se isi auala e mafai ona e vaai ai i lau galuega. Atonu e te mafaufau faapea e sili atu mea e tatau ona e mauaina—e maua uma e isi tulaga lelei ma e lē tuuina atu lava se avanoa ia te oe e faia ai le galuega o loo e manao moni e fai. E mafai ona e talanoa pea ma isi e ioe faatasi ma oe, ma atonu e faatalitonuina ai oe faapea e saʻo uma ia mafaufauga.

Ae, atonu e lē saʻo na mafaufauga. O le toatele o tagata o ē olioli i a latou galuega ua latou aʻoaʻoina le faia faapea. O se tagata e fiafia e tusia ata o faugafale atonu e fiafia foi i le ave pasi. Aisea? Auā o lana vaai ma le sogasoga i le galuega lea ua ala ai ona fiafia ma faamalieina ai o ia.

O lea ia alofia mafaufauga lē faalaeiau ia e avea ai le vaiaso faigaluega ma se mea e lē fiafia ai pe a faatusatusa atu i le faaiuga o le vaiaso. Aua le faamaimauina le taimi i le tilofaia o au mea sese na fai, ona mafaufau lea i se isi measese o le a tupu, ma le popole po o ā manatu o isi ia te oe. Ia vaai i le galuega o loo e faia. Ia uaʻi atoatoa atu i ai. Ia taumafai e matuā uaʻi atu i ai e pei ona e faia i se mea e te fiafia i ai. Ia fai ma au taumafaiga e pito i sili ona lelei, ma ia fiafia i se galuega e lelei ona faatinoina.

[Pusa/Ata i le itulau 19]

Aua le Faatalale i Lau Galuega

Ua faapea mai le Tusi Paia i le Faataoto 27:23, 24: “Ia e matuā iloa tino o au mamoe, ma e mafaufau i ou lafu; auā e le faavavau le oloa; e le oo foi le pale i lea tupulaga ma lea tupulaga.” O le ā ua faauiga i ai lena mea?

O lona uiga e faapea o meafaitino (oloa) ma tulaga maualuluga (le pale), afai e mauaina, e masani lava ona iai mo na o sina taimi. O lea la, ua faaalia e se leoleo mamoe i taimi o le Tusi Paia le poto pe afai e uaʻi atu ma le naunautai i le leoleoina o ana mamoe, o lona uiga, ia ‘mafaufau i lana lafu.’ E pei ona faaalia e fuaiupu e tolu o loo sosoo ai, o le iuga, o le saogalemu faaletino lea o le tagata faigaluega atoa ai ma lona aiga.—Faataoto 27:25-27.

Ae faapefea i aso nei? Ua masani ona uaʻi atu tagata i le mauaina o oa po o se tulaga maualuga ma lo latou faanaunauga ina ia fesoasoani ai ia i latou e faamavae mai a latou galuega o loo iai. O isi ua iai ni fuafuaga mautu; ae o isi ua na ona moemiti i ai. I so o se tasi o ia tulaga, e lē o se mea poto le faatalale po o le tuulafoaia o le galuega o loo iai a se tasi. O loo avea ma atonu e faaauau pea ona avea, ma puna autū e faalagolago i ai i le itu tau tupe. E sili atu ona atamai mo le tagata ona uaʻi atu i ana “mamoe,” i le uaʻi atoatoa atu i lana galuega lea e faalagolago i ai. O lona faia faapea atonu e iu ai i le saogalemu faaletino i le taimi nei faapea ma le lumanai.