Le Ie Tanuoti a Turin—Pe o le Ie Lea na Tanu ai Iesu?

TUSIA E LE SUI O LE ALA MAI! I ITALIA

E mai ia Aperila 18 seia oo ia Iuni 14, 1998, sa faaalialia ai i Italia i le Falesa o San Giovanni Battista, i Turin, le ie tanuoti fai mai o le ie lea sa aui ai le tino o Iesu le Nasareta ina ua maliu. Sa teuina i se pusa tioata e lē ati ai se pulufana, e lē sao foi i ai se ea ma faatumuina i se kasa. Sa tausia ai iina i se tulaga e fetaui lelei le ea ina ia faatumauina ai lona lelei.

I LUMA lava o le ie tanuoti lea o loo lelei ona puipuia e ui atu ai tagata asiasi i ni auala se tolu e eseese le maualuluga. O le faia faapea e mafai ai e tagata uma ona silasila lelei atu i ai. E faatapulaa asiasiga i le na o le lua lava minute ma seʻi vaganā lava ua muamua faafesootai atu. E eseese lava lagona, o isi e matuā maofa lava, o isi e tomānatu ma loimata a o isi e na o le fia iloa lava. Na lipotia mai pe tusa o le 2.5 miliona tagata asiasi atu i ai.

O le fesili masani. “O le ā le uiga o le ie tanuoti ia te oe?” So o se tasi e fiafia e talanoa i tapuaiga, o se avanoa lelei lenei e iloilo totoʻa ai le mataupu ma toe faitau itulau o le Tusi Paia ia o loo faatatau atu i le tanuga o Iesu.—Tagai i le pusa i le itulau o sosoo mai.

O le ie tanuoti o se ie lino e 14 futu 3 inisi le umi ae 3 futu 7 inisi le lautele [436 senitimita le umi ae 110 senitimita le lautele] e atagia mai ai se tino o se tagata o lē, ua taʻua mai e faapea, na oo i ai se maliu tiga. Peitai o le fesili, Pe o lenei Ie Tanuoti a Turin o le ie moni lenei sa aui ai le tino o Iesu ua sili atu i le 19 senituri ua tuanai?

Mea Tutupu i le Talafaasolopito

Fai mai le faamatalaga a le New Catholic Encyclopedia: “E leai ni faamaoniga sa iai se ie tanuoti i le vaitaimi o Kerisiano i uluai senituri.” I le 544 T.A., na ali aʻe ai i Edessa, le laufanua o loo tu i Take, se ata lolomi e lei faia e se tagata. E faapea le tala sa atagia mai ai i le ata fofoga o Iesu. I le 944 T.A., na faapea mai ai ua oo atu lena ata i Constantinople. Ae ui i lea, o le toatele o le au tusitala o talafaasolopito, e lē talitonu o le ata lena lea ua lauiloa nei o le Ie Tanuoti a Turin.

I le senituri e 14, sa umia ai e Geoffroi de Charny se ie tanuoti i Falani. I le 1453, na avatu ai ia Louis, le perenise o Savoy, o lē na mulimuli ane ona avatua i le falesa i Chambéry, le laumua o Savoyard. Mai iina, i le 1578, na avatu ai e Emmanuel Philibert le ie i Turin.

O Manatu Eseese

I le 1988 na tuuina atu ai e le akiepikopō o Turin na iai i lena taimi o Anastasio Ballestrero ia suesueina po o le ā le leva o le Ie Tanuoti a Turin e ala i le faaaogaina o vailaau faaonaponei o le kaponi. Sa faia nei suesuega e ni fale faapitoa e taualoa mo suesuega faapenei i Suisilani, i Egelani, ma le Iunaite Setete, ma na iloa ai e lata mai nei lava, se vaitaimi ua leva talu ona mavae le maliu o Keriso. Na talia e Ballestrero le faaiuga, ma faasilasila aloaia ai loa e faapea: “Ona o le faatuatuaina o le faasaienisi mo nei suesuega, ua toe iloilo nei e le lotu lana faaaloalo ma le faamamaluina o lenei ata lolomi paia o Keriso, lea o loo avea pea ma mea e tuutoina i ai ē e faatuatua.”

Sa faasilasila e le akiepikopō o loo iai nei, o Giovanni Saldarini e faapea: “E lē mafai ona matou fai atu e faapea o le ata, o le ata lea o Iesu ina ua ave ifo mai le koluse.” Peitai, i le taimi lava e tasi, sa ia folafola mai: “E leai ma se masalosalo le mafai ona iloa atu e le tagata talitonu i lena ie lolomi le faatusa o le tagata lea o loo faamatalaina e Evagelia.” Ia Me 24, 1998, a o faaalialia le ie tanuoti, na taʻua ai e Pope Ioane Paulo le faatusa e faapea “o le ata o le tino mafatia o Lē sa Faasatauroina.”

E pei ona mafai ona matauina, o loo tele faamaoniga e teena ai le manatu faapea o le Ie Tanuoti a Turin o le ie lea na tanu ai Iesu. Ae faapefea pe ana faapea o le ie moni lena? Pe e talafeagai ea mo se tasi o loo manao e usitai i aʻoaʻoga a le Tusi Paia ona faamamalu i lena ie?

Seʻi manatu i lona lua o Tulafono e Sefulu, lea e faapea mai, e tusa ai ma se faaliliuga Katoliko Roma o le Tusi Paia: “E lē tatau ona fai mo oe se tupua ua ta, po o se faatusa lava o se mea o i le lagi i luga, po o i le fanua i lalo, po o i le sami o i lalo o le fanua. E lē tatau ona e ifo i ai.” (Esoto 20:4, 5, New Jerusalem Bible) Ma le mautinoa lava, e usitai Kerisiano moni i upu a le aposetolo o Paulo: “O le faatuatua ua matou savavali ai, a e le o le tino mai o mea.”—2 Korinito 5:7; 1 Ioane 5:21.

[Pusa i le itulau 20]

Le Ie Tanuoti ma Faamatalaga a Evagelia

Ua faapea mai le au tusitala o le Evagelia ina ua uma ona tuuina i lalo le tino o Iesu mai le satauro e Iosefa le Arimataia, ona “aui ai lea [o le tino o Iesu] i le ie lino e mamā.” (Mataio 27:57-61; Mareko 15:42-47; Luka 23:50-56) Ua faaopoopo mai le aposetolo o Ioane e faapea: “Ua alu ane foi Nikotemo . . . ua na ave foi le muro fefiloi ma le aloe, po ua selau pauna. Ona la ave lea o le tino o Iesu, ua teuteu i le ie e tanumaʻi atoa ma mea manogi, faapei o le tu a Iutaia i le faataimuaga o le tanuga.”—Ioane 19:39-42.

O le tu masani a tagata Iutaia o le faataele lea o le tino oti ona faaaogā lea o suauu ma mea manogi e uu ai le tino. (Mataio 26:12; Galuega 9:37) I le taeao na sosoo ai ina ua mavae le Sapati, sa fuafua atu fafine o ni uo a Iesu e faamaeʻa le sauniunia o lona tino, lea ua uma ona tuuina i le tuugamau. Peitai, e latou te taunuu atu ma a latou ‘mea manogi e uu ai o ia’ ua lē o iai le tino o Iesu i le tuugamau!—Mareko 16:1-6; Luka 24:1-3.

Ina ua taunuu atu Peteru i se taimi e lei leva teisi ma ulu atu i le tuugamau, o le ā na ia mauaina ai? Na lipoti mai e Ioane o ia o le molimau na vaaitino i ai e faapea: “Ua vaai atu [o ia] i ie na tanumaʻi ua tuu, ma le solosolo sa i lona ao, e lei tuu faatasi ma ie na tanumaʻi, a ua tuu ese, ma taataai i le tasi mea.” (Ioane 20:6, 7) Mātau e lē o taʻua ai le ie lino lelei—e na o ie na tanumaʻi ai ma le solosolo sa i lona ao. Talu ai o lea sa faamatala lelei mai e Ioane ie tanumaʻi ma le solosolo sa i lona ao, pe e lē tatau foi la ona ia taʻua mai le ie lino lelei, po o le ie tanuoti, pe ana faapea sa iai iina?

E faaopoopo atu i lena, manatu i le mea lenei: Pe a na faapea sa iloa atu se ata o Iesu i ie sa faaaogā i lona tanuga, pe sa lē tatau ea la ona matauina ma avea ma mataupu e talanoa ai? Peitai, e ese mai i faamatalaga a Evagelia, e matuā gūgū lava le Tusi Paia e faatatau i ie sa i le tuugamau.

E oo lava i tusitala ua faapea mai o Kerisiano i le senituri e tolu ma lona fa, o ē sa latou tusia ma faamaumauina faamatalaga o vavega na taʻua e fesootai atu i le mea e iai se fesootaiga ma tagata paia, latou te lei taʻua lava le iai o se ie tanuoti sa iai se ata lolomi o Iesu. E matuā faigata tele ona malamalama i lenei mea, e tusa ai o le tagata aʻoga Jesuit o Herbert Thurston, o lē na faapea mai o tagata o le senituri e 15 ma le 16 o ē sa vaai i le ie tanuoti, sa latou “faamatalaina e faapea o foliga vaaia o i le ie tanuoti e matuā manino ma maʻoti ma felanulanuai e foliga mai e pei e lei leva ona fai.”

[Ē Ana le Ata i le itulau 19]

David Lees/©Corbis