Pe o le Tuutoina i Mea Faamanatu e Faafiafiaina ai le Atua?

NA FAAPEA mai, o le toto o “San Gennaro,” e masani ona liusuavai faatolu i le tausaga, o le tasi lea o le tele o mea faamanatu faalotu. E faapena foi le Ie e Afifi ai Tino Oti i Turin, lea faapea e mautinoa na afifi ai le tino o Iesu Keriso. I mea faamanatu e fesootai atu ia Iesu, o loo iai le mea lea sa manatu i ai o lona moega (i totonu o se falesa tele i Roma), o lana api aʻoga, ma le sili atu i le faitau afe o fao na taʻua faapea na faaaogāina i le faia o lona faasalaga! Ua aofia ai foi i mea faamanatu faalotu ni ulu o Ioane le Papatiso ma, i nofoaga eseese i Europa, e fa tino na faapea mai o le tino o “Santa Lucia.”

I aai e taʻutaʻua faapitoa ona o mea faamanatu, o Trier, i Siamani, o inā o loo teuina ai le tele o “ofu paia”—ma o loo teuina ai foi le ofutele e leai se sooga na ofuina e Iesu Keriso. I le Aai o le Vatikana lava ia o loo iai e sili atu i le afe mea faamanatu i se fale faapitoa e teu ai tusitusiga anamua o talafaasolopito. O le mea moni lava e faitau afe mea faamanatu faalotu o loo teuina i le falesa a le “Saint Ursula” i Cologne, i Siamani. E lē mafaitaulia mea faapena o loo iai. Ioe, i na o Italia lava ia, o loo iai nofoaga e 2,468 ua taʻua o nofoaga paia o loo iai mea faamanatu faalotu!

O faaaloaloga ua tuuina atu i mea faamanatu e talitonuina na amata mai i lona fa o senituri T.A., e pei ona faia i le faamamaluina o “tagata paia.” Mo mafuaaga faalotu, tau tamaoaiga, ma e oo lava i faiga faapolotiki, na tuputupu mālie aʻe ai nisi mea faamanatu i le faagasologa o senituri, faatasi ai ma le faitau afe o loo iai i aso nei. Na toe faamautinoa mai e le Komiti Lona Lua a le Vatikana faapea “e tusa ai ma lana tu, e faamamaluina ai e le Lotu tagata paia ma faaaloalo i o latou mea faamanatu moni ma o latou faatusa.” (Constitution “Sacrosanctum Concilium” sulla sacra Liturgia, in I Documenti del Concilio Vaticano II, 1980, Edizioni Paoline) “O mea faamanatu taʻutaʻua, faapea foi ma ē na faamamaluina i ni faiga logologoā,” o loo taʻua i le Codex Iuris Canonici (Tusi o Tulafono a le Lotu) faapea na faalauiloa mai i le lautele e Ioane Paulo II i le 1983. (Tusi Tulafono 1190) E faamamalu foi e tagata lotu Egelani ma sui o le Orthodox mea faamanatu.

Faatasi ai ma le matuā tele o fao ua faalauiloa mai e aunoa ma ni faamaoniga le faasatauroina o Iesu, ma ulu o Ioane le Papatiso, e faigofie lava ona iloa ai faapea o mea faamanatu faalotu e masani lava ona avea o se mea taufaasese. O se faataʻitaʻiga, e tusa ai ma le faatatauina o aso, na faamaonia ai le tau faasese o le Ie e Afifi ai Tino Oti. O se mea e malie, ona i le taimi o le felafolafoaiga aasa na faia i le 1988 ona o lea mea, na fesili ai le tagata suesue lauiloa o le Vatikana o Marco Tosatti faapea: “Afai o le faaiʻuga faasaienisi na faia i le Ie e Afifi ai Tino Oti sa faatatauina foi i isi mea sa masani ona tuutoina i ai, o le ā la le faaiʻuga o le a faia?”

E manino mai, e leai se tagata atamai o le a manao e faaaloalo atu i se mea faamanatu. Ae pe na o le pau lena o le vala e ao ona iloiloina?

O le ā ua Fai mai ai le Tusi Paia?

E lē o fai mai le Tusi Paia faapea na faamamaluina e le nuu faapitoa o le Atua, o tagata Isaraelu anamua, ni mea faamanatu faalotu a o iai i noataga i Aikupito. E moni, na maliu le tamā matua o Iakopo i Aikupito, ma o lona tino na aveina atu i le nuu o Kanana e tanu ai ‘i le ana sa i le fanua o Makapelu.’ O lona atalii foi o Iosefa na maliu i Aikupito, ma o ona ponaivi na aveina atu mulimuli ane i Kanana e tanu ai. (Kenese 49:29-33; 50:1-14, 22-26; Esoto 13:19) Ae peitai, e lē o faaalia mai i le Tusi Paia faapea sa faamamaluina e tagata Isaraelu ni toega o tino o Iakopo ma Iosefa e avea o ni mea faamanatu faalotu.

Seʻi manatu foi, i le mea na tupu e tusa ai ma le tulaga o le perofeta o Mose. I lalo o le taʻitaʻiga a le Atua, na ia taʻitaʻia ai le fanauga a Isaraelu mo le 40 tausaga. I lea, ina ua 120 ona tausaga, na alu aʻe ai o ia i le Mauga o Nepo, ma iloa atu ai le Nuu o le Folafolaga, ma maliu ai. Sa finau ai Mekaeli le agelu sili ma Satani i le tino o Mose, ma sa lē taulau ai Satani i so o se taumafaiga ina ia mafai ona ia faaaogāina le tino o Mose e maileia ai tagata Isaraelu ina ia faia se tapuaiga i mea faamanatu. (Iuta 9) E ui lava sa latou tagituʻi ona o le maliu o Mose, ae latou te leʻi faamamaluina lava lona tino oti. O le mea moni, sa leʻi faataulauina e le Atua le faia o se mea faapena e ala i le tanuina o le tino o Mose i se tuugamau e lē o iloa i se nofoaga e lē o iloa e tagata.—Teuteronome 34:1-8.

O nisi o ē lagolagoina le faamamaluina o mea faamanatu, o loo taʻua i le 2 Tupu 13:21, lea o loo faapea mai: “Sa latou tanu le tagata, faauta foi, ua latou iloa le ʻau; ona latou lafo ai lea o le tagata i le tuugamau o Elisaia [le perofeta]; ua oo ifo le tagata, ua papai i ivi o Elisaia, ona toe ola ai lea o ia, ua tu i luga ona vae.” O lenei mea o se vavega na aafia ai ponaivi ua lē o iai se ola, o se tasi o perofeta a le Atua. Ae ua leva ona maliu Elisaia ma “ua le iloa se mea” i le taimi o le vavega. (Failauga 9:5, 10) I lea, o lenei vavega sa tatau ona tuuina atu i le mana galue faivavega o Ieova le Atua, o lē na faatinoina lea mea e ala i lona agaga paia, po o lona mana galue. E aogā foi ona matauina faapea e lē o faapea mai le Tusi Paia sa faamamaluina ponaivi o Elisaia.

Ua lagolagoina e nisi i Kerisinetoma le tuutoina i mea faamanatu ona o le mea o loo fai mai ai le Galuega 19:11, 12, ua tatou faitau ai e faapea: “Ua faia foi e le Atua vavega sili i lima [o le aposetolo] o Paulo; o lea ua avea ai solosolo ma ie tali otaota nai lona tino i e mamai, ona mavae ai lea o latou maʻi, ua ō i fafo foi ia te i latou agaga leaga.” Faamolemole ia matau, o le Atua na faia na galuega mamana e ala ia Paulo. Ae e leʻi faia e le aposetolo na galuega na o ia lava, ma na te leʻi talia foi se faamamaluina mai so o se tagata.—Galuega 14:8-18.

E Feteenai ma Aʻoaʻoga a le Tusi Paia

O le mea moni, o le tuutoina i mea faamanatu faalotu e feteenai ma nisi o aʻoaʻoga faale-Tusi Paia. O se faaaʻoaʻoga, o se vala moni e lē maalofia i lena tuutoina o le talitonu lea i le lē mafai ona oti o le solu o le tagata. E faitau miliona sui tuutoina o lotu e talitonu faapea o solu o i latou uma ua faapaiaina faalotu ma ua faamamaluina e avea o “tagata paia” o loo ola i le lagi. O nei tagata loto faamaoni o loo tatalo i na “tagata paia,” i le sailia o la latou puipuiga ma ole atu i ai ina ia faalaa ane i le va ma le Atua e fai ma sui o lē o loo ole atu. O le mea moni, e tusa ai ma se tasi tusi faalelotu, ua tuuina atu ai e tagata Katoliko i mea faamanatu “le mana o le faalaa a le Tagata Paia faapea o le Atua.”

Ae peitai, e tusa ai ma le manatu o le Tusi Paia, o le solu o le tagata e lē mafai ona ola pea. E leai ni solu e lē mafai ona oti i tagata ma e mafai ona ola ese pea mai le tino pe a mavae le oti. Na i lo lea, ua faapea mai le Tusi Paia: “Ona faia lea e Ieova le Atua o le tagata i le efuefu o le eleele, ma ua mānava i ona pogaiisu o le mānava ola; ona avea ai lea o le tagata ma tagata ola.” (Kenese 2:7) Na i lo o le aʻoaʻo faapea e iai solu e lē mafai ona oti o tagata, ua faapea mai le Tusi Paia: “O le tagata [solu] e agasala e oti ia.” (Esekielu 18:4) O lenei mea e faatatau i tagata uma lava—e aofia ai ma i latou na faapaiaina mulimuli ane e avea o “tagata paia”—auā ua maua e i tatou uma lava le agasala ma le oti mai le uluai tagata o Atamu.—Roma 5:12.

O le tuutoina atu i “tagata paia” e ao ona alofia auā e leʻi tuuina atu lava ia i latou se pule latou te faia ai se leleiga i le va o le Atua ma so o se tasi. Na poloaia e Ieova le Atua faapea e na o lona Alo lava, o Iesu Keriso, e mafai ona faia o lenei mea. Na faapea mai le aposetolo o Paulo, o Iesu “sa lē na ona maliu mo i tatou—ae na toetu mai o ia nai le oti, ma ua tu o ia i le itu taumatau o le Atua ma o loo fautua mo i tatou.”—Roma 8:34, The Jerusalem Bible; faatusatusa le Ioane 14:6, 14.

O le isi mafuaaga e alofia ai le tuutoina atu i “tagata paia” ma mea faamanatu faalotu na e fesootai atu ma ia mea, ua faalagolago atu lea i le mea o fai mai ai le Tusi Paia e uiga i ifoga i tupua. Na taʻua i se tasi o Tulafono e Sefulu na tuuina atu i tagata Isaraelu: “E lē tatau ona e fai mo oe se tupua ua ta, po o se faatusa o se mea i le lagi i luga, po o i le fanua i lalo po o le sami i lalo o le fanua. E lē tatau ona e ifo atu i na mea pe auauna foi i ai, auā o aʻu o Ieova lou Atua, o le Atua fuā.” (Esoto 20:4, 5, NW) I senituri mulimuli ane, na taʻu atu ai e le aposetolo o Paulo i uso Kerisiano: “Au pele e, ia outou sosola ese ai le ifo i tupua.” (1 Korinito 10:14) Sa faapena foi ona tusi mai le aposetolo o Ioane: “Le fanau e, ia leoleo outou ia te outou ia taumamao i tupua.”—1 Ioane 5:21.

O le mea lea, o le tuuina atu o le faaaloalo i “tagata paia na poloaiina e le lotu ma mea faamanatu faalotu, e lē o lagolagoina e le Tusi Paia. Ae peitai, ua faanaunau nisi tagata i le iai o se mea ua manatu i ai e paia lea e mafai ona vaai ma paʻi atu i ai ma manatu faapea e iai se mana faaola. O le mea moni, e toatele i latou ua manatu i mea faamanatu faalotu faapea o se sootaga vaaia i se fesootaiga i le va o le lagi ma le lalolagi. Faamolemole seʻi manatunatu loloto i lenei manatu mo sina minute.

E lē na o le vaai ma le paʻi atu i mea faamanatu faalotu lena e mafai ai e se tagata ona gaoioi e talafeagai ma upu a Iesu e uiga i le tapuaiga e finagalo i ai le Atua. Na fetalai Iesu: “A e oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le [upu moni]; auā o loo saili le Tamā i e tapuai faapena ia te ia. O le Atua o le agaga lava ia; o e tapuai ia te ia, e tatau ona tapuai atu ai i le agaga ma le [upu moni].” (Ioane 4:23, 24) O Ieova le Atua “o se Agaga,” e lē iloa e mata faaletagata. Ina ia tapuai atu ia te ia “i le agaga” o lona uiga o la tatou auaunaga paia i le Atua, e uunaia e se loto ua tumu i le alofa ma le faatuatua. (Mataio 22:37-40; Kalatia 2:16) E lē mafai ona tatou tapuai i le Atua ‘ma le upu moni’ e ala i le faamamaluina o mea faamanatu, ae ala i le na o le teena o mea sese faalotu, aʻoaʻoina lona finagalo e pei ona faaalia mai i le Tusi Paia, ma faia.

O le mea lea, e lē o se mea e ofo ai ona, ua iloa lelei e le tagata poto o James Bentley faapea ‘sa leʻi faamamaluina e tagata Eperu anamua ni mea faamanatu.’ Ua ia faapea mai foi, talu mai senituri e fa i le va o le maliu o Setefano ma le toe eliina aʻe o lona tino e Lucian, na matuā suia atoatoa ai le uiga faaalia o Kerisiano agaʻi i mea faamanatu. Ae peitai, i lona lima o senituri T.A., ae ua uma ona taofia e Kerisinetoma aposetate le pipii mau atu i aʻoaʻoga manino faale-Tusi Paia e uiga i ifoga i tupua, le tulaga o ē ua oti, ma le vaega a Iesu Keriso e avea o lē “e fautua mo i tatou.”—Roma 8:34; Failauga 9:5; Ioane 11:11-14.

Afai tatou te mananao ina ia faafiafiaina le Atua i la tatou tapuaiga, e tatau ona tatou faamautinoaina faapea ua lē fesootai atu la tatou tapuaiga ma so o se ituaiga o ifoga i tupua. Ina ia talia, e tatau i la tatou tapuaiga ona avatu i Le na Foafoaina Mea, o Ieova le Atua, ae lē i so o se mea faamanatu po o se mea faiola. (Roma 1:24, 25; Faaaliga 19:10) E tatau foi ona tatou maua le poto saʻo lelei o le Tusi Paia ma atiina aʻe ai se faatuatua malosi. (Roma 10:17; Eperu 11:6) Ma afai tatou te savavali i le ala o le tapuaiga moni, o le a tatou gaoioi la e ōgatasi ma le tele o faamaoniga faale-Tusi Paia faapea o le tuutoina i mea faamanatu e lē faafiafiaina ai le Atua.

[Ata i le itulau 5]

Sa leʻi faamamaluina ponaivi o Elisaia e ui lava sa aafia ai se toetu