Asiasi Atu i Vietiname le Vaifagaloa na Māgoto Ifo ai le Tarako

I SE tasi taeao vevela lava i Hanoi, sa matou faimalaga ai i se pasi ma agaʻi atu i le tusa ma le 100 maila [165 kilomita] i sasaʻe i se tasi o vaipanoa sili ona matagofie i Vietiname, le vaifagaloa ua taʻutaʻua i le lalolagi o le Ha Long Bay—po o Le Vaifagaloa na Māgoto Ifo ai le Tarako. Sa masani lava ona matou faalogo i le matagofie e maofa ai o le vaifagaloa, ae o lea la, ua matou ō atu seʻi vaai tino lava i ai.

E oo ane i le aoauli ua tū le matou pasi i le faatausiusiuga o le vaifagaloa. Ae matou te leʻi taunuu lelei atu i le mea sa matou fuafua e faataunuu i ai. O le mea e ala ai ona taʻutaʻua le Ha Long Bay e lē gata i le iila mai o lona sami lanumeamata ae o le matagofie moni o ona motu e 3,000 o loo tūtū solo i lona nofoaga e 580 maila faatafafā [1,500 kilomita faatafafā] le telē. Talu ai e eseese uma lava ni mea e iloga ai motu taʻitasi, o le pogai lena na matou mananaʻo ai e fia asia nisi o na motu. O lea, na matou malaga atu ai loa i se vaa, ma e leʻi umi lava ae matou oo loa i se mea e lē mafai ona faagaloina.

Pe tusa o le itula talu ona matou folau atu ae matou taunuu loa i se vaifagaloa matagofie e siosiomia e ni tamaʻi motu. Sa lafo ifo i lalo le taula e tamaloloa e faatautaia le vaa. Ua oo nei i le taimi e fai ai sina taʻelega e faafouina ai i le sami mālūlū lanumeamata! O lo matou pisapisaō ma faapisipisi solo e leʻi umi ai lava ae tosina ane ni tamaiti, ma ālo ane loa o latou tamaʻi vaa ia i matou e fia iloa le mea o tupu. O nei tamaiti ma o latou aiga e nonofo uma i le vaifagaloa, i luga o ni vaa lapopoʻa ua fai ma o latou fale, pe nonofo foi i vaa failā.

Atonu e te ono manatu faapea o tagata o loo nonofo i le Vaifagaloa o Ha Long o ni tagata faifaiva. Peitaʻi atonu e te lē ono manatu faapea latou te faia foi se faiva alofilima lea ua tauāu ina mou atu—le gaosia o lā o vaa. Ua faapea mai le tusi Moon Travel Handbook on Vietnam a Michael Buckley: “O Halong o se tasi lea o nofoaga mulimuli o loo totoe mai, o loo gaosi ai pea i lima lā o vaa, e aiga o ē faia lā o vaa. O ni ie manifinifi e tipi faatutusa itu taʻilua ona suʻi lea i se filo silika ina ia sosoo faatasi ai nei ie, ma e suʻilima uma lava āi o itu uma. Ina ia puipuia mai le pala ma le taetaepalaloa, e uma loa ona fafau le lā ona ave loa lea fufui atoa i se sua mūmū e maua mai i se laau masoā e tai pei o se ufi. E faatolu pe faafā ona fufui le lā i lena sua ma aumai faamātūtū, o se faiga ina ia uma ane ua lanu mūmū enaena le lā o le vaa.”

Po o e tau mānatu pe aisea ua faaigoa ai le Vaifagaloa o Ha Long i le igoa—Le Vaifagaloa na Māgoto Ifo ai le Tarako? Matou te leʻi vaai lava i se tarako i le matou malaga! Peitaʻi na taʻu mai ia i matou e faapea e tusa ai ma tala mai le vavau, o motu o loo i le Vaifagaloa o Ha Long sa fau aʻe e se tarako telē sa nofo i atumauga. Fai mai le faamatalaga a le Lonely Planet Guidebook on Vietnam: “A o momoʻe atu [le tarako] agaʻi i le talafātai, o le fetāaʻi solo o lona siusiu na ʻeeli aʻe ai i luga ni vanu ma lua loloto; ma a o tofu atu le tarako i le sami, sa pupuna aʻe i luga le sami ma faatutumu ai vaipanoa ia na ʻeli e lona siusiu, ae totoe ai na o ni vaega maualuluga taʻi tasitasi o le laufanua.”

O le mea moni lava, o malosiaga sa faapogaia nei mea o le matagi ma le sami, lea na pogai ai ona eseese foliga mai ma le tetelē o nei motu. Mo se faataʻitaʻiga, pe afai e faaāta i lou mafaufau, o le a e vaai ai i le motu o Hon Ga Choi, (Fighting Cock Islet [Motu o Toa Tau]), e foliga uma lava i ni toa [moa] se lua o loo tau.

Matou te taunuu mai i le uafu ua pogisa, ae ua tulimataʻi atu foi lagona mo le isi aso e sosoo ai o le matamataga. Ina ua uma taumafataga i le taeao na sosoo ai, ona matou malaga atu loa lea i se vaa failā ina ia matuā matamata lelei i nisi o āna, o loo i le vaipanoa. Sa lilofia le vaifagaloa i le puāo, ma ua atili ai ona matagofie mea uma i le vaai. Sa matou asia nisi o āna. O se tasi o nei āna e taʻua o le Hang Dau Go—Grotto of the Wooden Stakes (Āna o Pou Laupapa). O loo iai i totonu ni pu tetele se tolu e pei ni potu e mafai ona fesootaʻi i ni sitepu e 90. Na faapefea ona maua le igoa o le āna? Fai mai le faamatalaga a le tusi The Lonely Planet Guidebook on Vietnam: “Na maua le igoa faa-Vietiname o le āna mai lona pu telē lona tolu, lea e faapea sa faaaogā i le senituri lona 13 e teu ai ogaofe maamaʻai sa faatutū e Tran Hung Dao [o le toa a le vaegaʻau a Vietiname] i le alāvai o le vaitafe o Bach Dang” ina ia teteeina ai le osofaʻi mai a le Kublai Khan.

Sa matou feʻaʻei aʻe i luga mai le āna ona matou toe fāliu lea ma matamata ifo i le vaaiga i lalo. E matuā uigaese le matagofie o le vaaiga sa matou vaaia. E leʻi toe faatali, ae faaaogā loa ma mea puʻeata! I le tautau mai o vai ua toʻa (stalactites) i autafa o le āna i o matou luma, ma le fesiitaʻi lemu solo o lo matou vaa e peau lanumeamata o le vaifagaloa i o matou tua, sa uigaese le matagofie o a matou ata na tapuʻe ai! O le Vaifagaloa o Ha Long o se parataiso moni lava e tosina mai i ai tagata puʻeata ma le ʻau tusiata.

A o fāi ifo le aso, na matou ō atu ai i se tamaʻi vaaafi ina ia lelei se matamataga i se motu telē. E leʻi umi lava, ae matou iai i se mea e matuā pogisa atoa. Na peiseaī ua folo atoa i matou e le mauga! O le taimi lea o loo matou ui atu i totonu o se āna. Peitaʻi, e leʻi umi lava, ae matou taunuu loa i le isi itu. Na matou maofa, i lo matou iloa ane ua matou iai i se vaituloto telē lava. O ona itu uma e iai mauga maualuluga o maanamu. Sa matou vaaia le sosolo o vao i autafa o mauga. Na tapē e tamaloloa avevaa le afi o le vaa. E aunoa ma ni leo na toe lagona vaganā ai le fetagisi o manulele. O manatunatuga i lena taimi toʻafimalie o le a umi se taimi matou te manatua ai pea.

E leʻi umi, ae oo loa i le taimi matou te toe foʻi ai i Hanoi. E leʻi lava le umi o le taimi o la matou malaga. Peitaʻi, e tele mea sa matou oo i ai o le a manatua pea mo se taimi umi—o atumauga gaoā o le motu, o vaa failā, ae maise lava le Vaifagaloa o Ha Long, ua na o se tasi lena o faataʻitaʻiga o le matagofie o Vietiname.

O loo matou faanaunau e fia matamata atu i isi nofoaga mananaia i lenei atunuu matagofie. Matou te faafetaia Lē na Foafoaina Mea, o Ieova le Atua, mo le saunia mai o nei foafoaga matalasi ma le matagofie, ma lona folafola mai e faapea, o le a iai le aso o le a lē toe faaleagaina ai le lalolagi atoa, e pei o le Vaifagaloa o Ha Long.—Ua Tusia Mai e se Tasi.