Ua Tuʻia le Vaa i se Motu

VAAI! ua pagatia le vaa! Ua taapeape i ni vaega! Pe e te iloaina atu tagata na ua fepuna i le sami? O isi ua taunuu i le matafaga. Pe o Paulo ea lena e tuu mai i ina? Sei o tatou sueina po o a mea o loo tutupu iā te ia.

Manatua e lua tausaga o i ai pea Paulo i le fale puipui Kaisareia. Ona faaee ai lea o ia ma isi pagota i le vaa ma o atu i Roma. Ina ua latou ui ane i le motu o Kereta, na taia i latou e se afā malosi. Ua malosi tele le matagi ua le mafai ai e tamaloloa ona ave le vaa. Ma ua latou le vaaia le la i le ao po o fetu i le po. Mulimuli ane, ina ua mavae le tele o aso, ona le toe i ai lea o se faamoemoe i e na i luga o le vaa mo le faasaoina.

Ia, ona tu lea o Paulo i luga ma fai atu: ‘E le maimau se ola o se tasi o outou; na o le vaa o le a leaga. Auā na sau le agelu a le Atua anapo ma faapea mai i a te au: “Aua e te fefe Paulo! E te tu i luma o le pule o Roma o Kaisara. Ma o le a faasaoina e le Atua e uma o loo folau ma oe.”’

E tusa o le vaeluaga o le po o le aso lona 14 talu ona afā, ua iloa ai e le au vaa ua amata ona papau le suasami! Ona o lo latou fefe neʻi fetaui ma ni maa i le pogisa, na latou lafo ai i lalo a latou taula. I le taeao na sosoo ai na latou vaaia ai se faga. Na latou filifili ia folau e oo atu i le matafaga lena.

Ia, ina ua latou latalata i le matafaga, na soʻa e le vaa se faaputuga oneone ma paulia ai. Ona taia lea e galu, ma amata ai ona tuʻia le vaa. Na fai atu le taʻitaʻi au: ‘O outou uma e mafai ona aau ia feosofi muamua nei loa i le sami ma aau atu i le matafaga. Ae o isi ia tulioso i lalo, ma ia pipii atu i ni fasi laupapa mai le vaa.’ O le auala lena na taunuu ma le manuia uma ai le 276 tagata sa i le vaa i le matafaga e pei ona tauto ai le agelu.

Ua taʻua lea motu o Melita. Sa agalelei tagata, ma sa latou tausia lelei i latou na o mai i le vaa. Ina ua lelei le tau ona toe faaee lea o Paulo i le isi vaa ma avatu i Roma.