“Le Aso e Aupito Sili Ona Fiafia i o Ma Olaga”
O SE faaipoipoga o se aso lea e sili ona olioli ai. Ua faapea mai le toʻatele o ulugalii: “O le aso e aupito sili ona fiafia i o ma olaga.” Ae e mafai foʻi ona avea ma aso e sili atu ona faigatā. O le popole ma le vaivai e oo i le alii ma le tamaʻitaʻi faaipoipo ma o la aiga e ono faigatā tele ona o filifiliga ma sauniuniga uma e manaʻomia, faapea ai ma le toʻatele o tagata o le a feiloaʻi atu i ai le alii ma le tamaʻitaʻi faaipoipo i lenā aso.
O le faaipoipoga ua faailogaina ai le amataga o se olaga fou mo le ulugalii. Ae e lē na o i laʻua e aafia ai i lenā tulaga. Talu ai o le faaipoipoga a se alo teine, se atalii, se tuafafine, po o se tuagane o le a iʻu i le faia aʻe e sē tasi e pele o sona lava aiga e ese atu, o lea e masani ona lagonaina ai e le aiga faalogona lē mautonu.
E eseese faiga o faaipoipoga mai lea atunuu i lea atunuu ma e lē mafai ona faamatalaina uma i inei. O nei mataupu o le a taulaʻi atu i tulaga faaleaganuu tau i faaipoipoga i atunuu i Sisifo ma atunuu e talitutusa atu i ai. I na atunuu, o le faaipoipoga e mafai ona matuā taugatā lava. E faaaluina e nisi se aofaʻiga tele o tupe i mea e fesootaʻi atu i le faaipoipoga, e aofia ai le totogia o se fale telē po o se faleʻaiga lea e sauniunia ma tautuaina ai le ʻaiga o le faaipoipoga. I Italia, o se fuafaatatau o le tau o se faaipoipoga e silia lea ma le $10,000 tālā Amerika. I Iapani, e pei foʻi o isi atunuu, e mafai ona maualuga atu le tau. O le tulaga masani lava e lē totogia e le alii ma le tamaʻitaʻi faaipoipo ia tupe faaalu. E faia lea e o la mātua.
O faaipoipoga o ni pisinisi e tetelē tele. Ua faaauilumaina e le tele o pisinisi le manatu faapea e ao ona “atoatoa ona lelei” le faaipoipoga, ma ia iai mea uma lava. E lē gata i lea, e faaalia i mea latou te faia, “o le aso lenei e aupito sili ona fiafia o lou olaga!” Ona latou ofoina mai loa lea o le tele o mea ma le auaunaga e “manaʻomia” ina ia “atoatoa ona lelei” ai lou aso tele. Atonu ua iai tusi valaaulia, o lou ofu faaipoipo e “aupito sili ona matagofie,” o laʻei mo le tamaʻitaʻi uō sili ma aumea mamae, ma laʻei faapitoa mo le alii uō sili ma aumea mamae. E faaopoopo atu i ai ma teu fugalaau, o taavale faapitoa e ave ai le faaipoipoga, atonu ma se faleʻaiga lea o le a faia ai le ʻaiga, se tagata puʻeata, o se faaili, faapea foʻi ma isi mea. O le lisi o mea uma e ono manaʻomia e le alii ma le tamaʻitaʻi faaipoipo, faatasi ai ma le lisi o mea e faaalu i ai tupe, e mafai ona matuā faapopoleina ai le tele o tamā.
I atunuu eseese ua faamamafa ai le mulimuli atu i le aganuu. Ua iai se faatulagaga o mea e tatau ona fai, ma e faatalitalia le alii ma le tamaʻitaʻi faaipoipo e mulimuli atu i lea aganuu. Ioe, e tele mea e ao ona manatuaina, ae e tapulaa lava le taimi e faatulaga ai na mea uma.
Po o se mea ea e fiafia pe e popole ai? Po o le ā lava lau tali, ae a manatunatu i mea uma e ono aofia i se faaipoipoga, o le a tulaʻi mai ai le tele o fesili. O le ā le uiga o le faaipoipoga i aso nei? Pe e manaʻomia nei mea uma ina ia “lelei ai se faaipoipoga”? E mafai faapefea ona foʻia faigatā i sauniuniga ma faigatā tau i faalogona?
E ui i popolega uma, ae ua taulau manuia le toʻatele i le fuafuaina o mea uma o le faaipoipoga ma olioli ai i lea taimi. O lo latou poto masani atonu e mafai ai ona fesoasoani i isi o loo sauniuni e fesagaʻia lenā lava tulaga e tasi. O loo iai foʻi mataupu silisili faale-Tusi Paia e mafai ona fesoasoani pe a fuafua se faaipoipoga, ina ia iʻu manuia ai lea aso, ma fiafia, ma faalaeiauina ai tagata uma.