Le Manatu o le Tusi Paia

Pe na Maliu Moni Iesu i Luga o se Koluse?

O LE koluse, o se tasi o faatusa faalelotu ua sili ona lauiloa e tagata. E faitau miliona tagata ua tapuaʻi i ai, ma ua manatu o se mea paia na maliu ai Iesu. Na taʻua e Adolphe-Napoleon Didron, o se tusitala o le lotu Katoliko ma e suʻesuʻe foʻi i mea e eli mai le eleele: “Ua pei lava le tapuaʻi i le koluse o le tapuaʻi atu iā Keriso, pe e tutusa foʻi, ma ua tai tutusa lava le faamamaluina o lea laau paia, ma le faamamaluina o le Atua.”

O nisi ua faapea mai e aogā le koluse ona e latou te lagona ai le māfana atu i le Atua pe a tatalo. Ae o nisi ua latou avea o se mea e puipui ai mai agaga leaga. Ae faamata o se mea tatau i Kerisiano ona faamamaluina le koluse? Pe na maliu moni Iesu i luga o se koluse? O le ā tonu le aʻoaʻoga a le Tusi Paia e tusa o lea mataupu?

O le ā ua Avea le Koluse ma Ona Faatusa?

A o leʻi taitai oo i le taimi o le Faa-Kerisiano, na faaaogā e tagata Papelonia anamua koluse e fai ma faatusa e tapuaʻi ai iā Tamusa, le atua o le uluola o mea. Na faasolo ina faaaogā le koluse i Aikupito, Initia, Suria, faapea ma Saina. I senituri mulimuli ane, o faiga na faia e Isaraelu e faamamaluina ai le atua sesē o Tamusa, na ala ai ona filogia le tapuaʻiga a Isaraelu iā Ieova. O loo taʻua e le Tusi Paia lea tapuaʻiga o se “mea e inosia.”—Esekielu 8:13, 14.

I tusi o Mataio, Mareko, Luka, ma Ioane, o loo faaaogāina le upu Eleni stau·rosʹ (satauro), e taʻu ai le laau lea na faatautau ai Iesu ma maliu ai. (Mataio 27:40; Mareko 15:30; Luka 23:26) O le uiga moni o lea upu, e faatatau i se laau saʻo, laau umi, po o se pou. Ua faamatala mai e J. D. Parsons i lana tusi e faatatau i le koluse (The Non-Christian Cross) e faapea: “I le mau tusitusiga o le Feagaiga Fou mai le gagana Eleni lea na muaʻi tusia ai, e aunoa ma se fuaiupu e maua ai se faamaoniga e faapea o le satauro lea na tautau ai Iesu e ese mai satauro e masani ai, ma e matuā leai foʻi ma se faamaoniga e faapea e lua ni laau na tutuʻi faatasi e fai ai se koluse, ae e lē o se laau e tasi.”

I le Galuega 5:30, na faaaogā e le aposetolo o Peteru le upu xyʹlon, o lona uiga o se “laau,” e tutusa ma le stau·rosʹ, e faailoa mai ai, e lē o se koluse e lua ni laau, ae o se ogālaau po o se laau saʻo. O le mavae atu o le 300 tausaga talu lea taimi, na faatoʻā uunaʻia ai e nisi ua fai mai o Kerisiano le manatu e faapea, o le koluse na faatautauina ai Iesu. Ae o lea manatu, e faavae mai uputuu, faatasi ai ma le lē malamalama i le upu Eleni, stau·rosʹ. O se mea e ao ona mātauina, o ni ata mai anamua o faasalaga oti na faia e Roma, o loo faaalia ai se pou laau, po o se laau, ae lē o se koluse.

“Ia Leoleo Outou iā te Outou ia Taumamao i Tupua”

O se vala e sili atu ona tāua i Kerisiano moni, pe faamata e talafeagai le faamamaluina o se mea na faaaogā e fasiotia ai Iesu. E tusa lava po o le ā na faaaogāina, po o se laau saʻo, po o se koluse, po o se ū fanafana, po o se tao umī, po o se naifi, pe faamata o se mea tatau le faaaogāina o lea mea e tapuaʻi ai?

Seʻi faapea la o se tasi e pele iā te oe ua maliu fasia, ma ua avatu le auupega na māfua ai lona maliu e fai ma faamaoniga i le faamasinoga. Pe faamata e te taumafai ia aumai ma oe lea auupega, ma puʻe ni ata, ma fai ni kopi e tufa atu i isi? Pe faamata foʻi e te toe faia ni kopi o lea auupega, ae faaeseese le lapopoʻa? Pe e te fai ni kopi e fai ai asoa, taulima, ma tautaliga? Pe e te ave i se pisinisi ia fai ni kopi se tele, e faatau atu i uō ma aiga ina ia latou faamamaluina? Atonu o le a e lagona le ʻinoʻino e faia faapea! Ae o le mea tonu lava lenā ua fai i le koluse!

E lē gata i lea, e leai lava se eseesega o le faaaogāina o le koluse ma le faaaogāina o faatusa i tapuaʻiga, o se mea e inosia e le Tusi Paia. (Esoto 20:2-5; Teuteronome 4:25, 26) Ua faaali tonu mai e le aposetolo o Ioane aʻoaʻoga moni faa-Kerisiano ina ua ia faatonuina le ʻauuso Kerisiano e faapea: “Le fanau e, ia leoleo outou iā te outou ia taumamao i tupua.” (1 Ioane 5:21) Na latou faia faapea e ui e oo ai iā i latou le oti i le malae o mataaga i Roma.

Na matuā faatāuaina e Kerisiano o le uluaʻi senituri le maliu faataulaga o Keriso. E faapena foʻi nei aso, e ui e lē faamamaluina e Kerisiano moni le mea na faaaogā e faatautau ai Iesu, ae latou te faamanatuina lona maliu, o le auala lea ua saunia e le Atua auā le faaolataga o tagata lē lelei atoatoa. (Mataio 20:28) E lē mafaitaulia le mau faamanuiaga e tatou te maua ona o lea faaaliga sili o le alofa o le Atua, e aofia ai le faamoemoe o le ola e faavavau, mo i latou uma e naunau i le upu moni.—Ioane 17:3; Faaaliga 21:3, 4.

[Ata i le itulau 12]

O ni ata mai anamua o faasalaga oti na fai e Roma, ua faaalia ai le faaaogāina o se laau, ae lē o se koluse

[Ē Ana le Ata]

Rare Books Division, O le Faletusi o Niu Ioka, Astor, Lenox and Tilden Foundations