O Fesili e Masani Ona Fesili ai Tagata
Aiseā e faia ai e tagata tala e uiga i Molimau a Ieova?
E lē o malamalama le toʻatele i talitonuga o Molimau a Ieova. O nisi e lē fiafia i la latou galuega. Ae e ala ona latou talaʻi, ona o le alofa i tuaoi i le iloa lea, “e faaolaina i latou uma o ē e valaau i le suafa o Ieova.”—Roma 10:13.
Po o Molimau a Ieova o ni Kerisiano po o se lotu mavae?
O Molimau a Ieova, o Kerisiano, ona e faavae a latou aʻoaʻoga i le Tusi Paia. Ae e ese mai i Porotesano po o Katoliko, ona ua latou iloa, e lē faale-Tusi Paia nisi o a latou aʻoaʻoga. O se faaaʻoaʻoga, e lē o aʻoaʻoina i le Tusi Paia e faapea e faapuapuagatia e faavavau e le Atua alofa tagata i se afi. E leai foʻi se agaga o le tagata e ola pea.—Esekielu 18:4; Roma 6:23.a
E lē gata i lea, e latou te faaaʻoaʻo iā Iesu i o latou olaga i aso fai soo. O se faataʻitaʻiga, e leai se vaega a Keriso ma uluaʻi Kerisiano na faia i faiga faapolotiki. Ae sa latou talaʻi le Malo o le Atua. (Luka 4:43; Ioane 15:19; 17:14) O lea, e mulimuli Molimau a Ieova i le faaaʻoaʻoga a i latou na, i le lē auai i mataupufai o malo, ae e talanoa ma fefulifulisaʻi ma tagata taʻitoʻatasi e uiga i le Malo o le Atua, e pei ona sa faia e uluaʻi Kerisiano.—Galuega 19:8.
O le lotu mavae po o ē ua vavaeese, o tagata ia ua vavaeese mai i se lotu autū ona ua lē malilie, pē ina ia faatū se lotu fou. E leʻi vavaeese Molimau a Ieova mai i se isi lotu. E lē o i latou o se lotu mavae.
O ā mea e fai i sauniga a Molimau a Ieova?
E talia so o se tasi e fia auai i a latou sauniga. E faaautū i le suʻesuʻeina o le Tusi Paia, ma e masani ona faia ni sao o le aofia. O se tasi o a latou sauniga faale-vaiaso, o le Aʻoga o le Faiva Faatiokarate, e fesoasoani ai i sui o le faapotopotoga ia atiaʻe le tomai e aʻoaʻo atu, faitau ma faia saʻiliʻiliga loloto. O le isi sauniga, o le lauga e 30 minute, e faamatala ai se mataupu faale-Tusi Paia o loo fia malamalama i ai le toʻatele. E sosoo ai ma le suʻesuʻeina o le Tusi Paia e faaaogā ai le mekasini o le Olomatamata. E amata ma faaiʻu sauniga i le pese ma le tatalo, ma e lē aoina ni peleti.—2 Korinito 8:12.
E faapefea ona faatupe galuega a Molimau a Ieova?
E faatupeina i meaalofa tauofo. E lē totogiina Molimau e faia papatisoga, faaipoipoga, maliu, po o nisi lava auaunaga faalelotu. E leai foʻi ni a latou sefuluaʻi. A fia fai e se tasi se meaalofa tauofo, e latou te tuu i pusa o meaalofa o loo i totonu o Maota mo Sauniga. E lomia e Molimau a Ieova a latou lava lomiga faale-Tusi Paia ina ia faaitiitia ai tupe faaalu. O o latou Maota mo Sauniga ma fale o lālā, e tele lava ina fausia e le ʻauuso tauofo.
Pe e talia e Molimau a Ieova togafitiga faafomaʻi?
Ioe. E latou te saʻilia togafitiga e aupito sili ona lelei mo i latou ma ē e pele iā i latou. E toʻatele foʻi Molimau e galulue o ni tausi soifua, e fesoasoani i faalavelave tutupu, o ni fomaʻi, ma fomaʻi tipitipi. Ae peitaʻi, e teena e Molimau a Ieova tuigātoto. Ua faapea mai le Tusi Paia: ‘Ia taumamao ma le toto.’ (Galuega 15:28, 29) O le mea e fiafia ai, ona ua toʻatele fomaʻi ua iloa, o togafitiga e lē faaaogā ai le toto o se “tausiga faafomaʻi e sili ona lelei,” auā ua ʻalofia ai le tele o lamatiaga o le soifua mālōlōina.
[Faaopoopoga i lalo]
a Ua faamalamalamaina nei mataupu ma isi mataupu tāua o le Tusi Paia i le tusi, O ā Aʻoaʻoga Moni a le Tusi Paia?, lomia e Molimau a Ieova.
[Pusa/Ata i le itulau 7]
O SE NUU E FEALOFANI
E ese lava le nuu o Bejucal de Ocampo i le itu i saute o Mekisikō. Ua faamatalaina i le nusipepa o le Excélsior: “O le toʻatele o tagata e nonofo ai i inā, o Molimau a Ieova,” ma ua toe faapea mai: “O se nuu e fealofani lotu ma e lelei le va fealoaʻi ma le malo . . . O tagata e nonofo ai, ua lē toe onanā pe e ulaula tapaa. A ua fiafia i pesega ma faitau a latou Tusi Paia. E faaaloalo foʻi i le pule.”
Ua taʻua foʻi e faapea, e ui ina tele lotu i le aai, “ae e lē o tulaʻi mai ai ni feteenaʻiga po o ni eseesega.” Ua taʻua foʻi: “E leai se feitagaʻi, ma e lē avea le eseese o lotu ma mea e taofia ai le ofo alofa atu o le tasi i le isi . . . E saʻoloto tagata i a latou tapuaʻiga, ma nonofo fifilemu o se nuu e tasi. E lē o se mea e ofo ai talu ai o le toʻatele o le nuu o Molimau a Ieova.” Na faapea mai foʻi se faiaʻoga i se aʻoga maualuga e lē o se Molimau: ‘E onomea laʻei o a latou fanau, e lelei togi i le aʻoga ma e amiolelei.’