Po o Molimau a Ieova o se Lotu Taufaasese?

SA FAITIOINA Iesu faapea sa onā, o se tagata ʻai tele, o sē e soli Sapati, o sē e molimau pepelo, o sē e upu vale i le Atua, ma o se ave feau a Satani. Sa faitioina foi o ia faapea o sē e fou.—Mataio 9:34; 11:19; 12:24; 26:65; Ioane 8:13; 9:16; 19:12.

Ina ua mavae le maliu o Iesu ma lona toetu, sa faapena foi ona avea ona soʻo ma taulaiga o tuuaiga matuia. O se tasi o vaega o Kerisiano o le uluai senituri na tatoso i luma o alii o le aai e tagata o loo alalaga: ‘Ua faaliliu e nei tagata le lalolagi ainā uma.’ (Galuega 17:6) I se tasi taimi, na avatu ai le aposetolo o Pauro ma lana aumea o Sila i alii sili ma molia i lo la faavevesia o le aai o Filipi.—Galuega 16:20.

Na tuuaia mulimuli ane Pauro i lona “faasoesa, ma le faatupu le fouvale i tagata Iutaia uma i le lalolagi” ma i lona taumafai “e soli i le malumalu.” (Galuega 24:5, 6) Sa matuā saʻo ona faamatala e alii sili o Iutaia i Roma le tulaga o soʻo o Iesu i lo latou faailoa mai e faapea: “Auā ua iloa e i matou ua talaeseina lena lotu i nuu uma lava.”—Galuega 28:22.

E mautinoa lava, o lenei vaega fou na faavaeina e Iesu Keriso, sa manatu i ai nisi e faapea o se vaega faalotu e ese o latou manatu ma faiga, na sa feteenai ma mea na faapea o amioga masani a le lautele. E lē taumatea, o le toatele i aso nei ua manatu i Kerisiano e faapea o se lotu taufaasese e faaleagaina ai. Sa masani lava ona avea le aufaitio o ni tagata e lauiloa ma faaaloalogia i le atunuu, ma o lenei mea, e foliga mai ua faaopoopo atu i le matuā faamalosia ai o tuuaiga. E toatele na talitonu i tuuaiga faasaga ia Iesu ma ona soʻo. Peitai, atonu o e iloa, o nei tuuaiga uma sa sese! O le mea moni, ona na faia e tagata nei tuuaiga, sa leʻi avea ai la ma mea moni.

Ae ā aso nei? Pe saʻo le faasino i Molimau a Ieova faapea, o se vaega faalotu e iai ni o latou manatu ese ma faiga faavae e feteenai ma mea ua taliaina, o amioga masani a le lautele? Po o Molimau a Ieova o se lotu taufaasese?

Mea ua Faaalia e Faamaoniga

Na faamatala mai e se sui mamalu o le malo i le aai o St. Petersburg, i Rusia, e faapea: “Na faailoa mai ia i matou e faapea o Molimau a Ieova, o se ituaiga o lotu mavae e faia faalilolilo, e nonofo i le pogisa ma fasioti a latou fanau ma fasiotia foi i latou lava.” Ae talu ai nei, sa oo ina masani lelei ai tagata o Rusia ma uiga moni o Molimau a Ieova. Ina ua uma ona galulue faatasi ma Molimau a Ieova e tusa ai ma se tauaofiaga faavaomalo, na matauina ai e lenei lava tagata o le malo e faapea: “Ua ou vaaia nei ni tagata lautele, e laumata fiafia e pei ona masani ai, e sili ona lelei na i lo o le toatele o tagata ou te iloaina. O i latou o ni tagata filemu ma toafimalie, ma latou te matuā alolofa le tasi i le isi.” Na ia faaopoopo mai: “Ou te matuā lē malamalama, pe aisea e fai ai e tagata tala pepelo e uiga ia i latou.”

E lē faia e Molimau a Ieova ni sauniga e pulea e ni tu faalotu, pe ufiufi la latou tapuaiga i ni faiga faalililo. Na matauina e se tamaitai tusitala e lē o se Molimau o Julia Mitchell Corbett e faapea: “Pe a faia a latou sauniga, e masani ona sili atu na i lo o le faatasi i le vaiaso, i Maota o le Malo (e lē taʻua nofoaga e fai ai a latou sauniga o ni falesa), o le tele o o latou taimi e faaalu i le suesueina ma le talanoaina o le Tusi Paia.” O nofoaga e fai ai a latou sauniga e faailoa manino lava i se faailoga. O sauniga e tatala mo le lautele, ma e valaaulia ai tagata a lautele ina ia auai. O malo e leʻi valaauliaina e matuā talileleia foi.

Ua faaopoopo mai Corbett i lana tusi Religion in America e faapea: “Ua iai i Molimau se talaaga lelei o le faamaoni, faaaloalo, ma toaaga.” O le toatele o ē e lē ni Molimau, ua nofo sauni e taʻu atu faapea e leai ni mea e ese pe masalomia ai Molimau a Ieova. E lē feteenai a latou amio ma mea ua taliaina e faapea o amioga masani a le lautele. Ua taʻua ma le saʻo e le New Encyclopædia Britannica e faapea, o Molimau e “tausisi i le tulaga maualuga tau amio i a latou amioga totino.”

Na tusi atu le faatonu o tala fou ma lē na te faia polokalama faapitoa mo televise i le Iunaite Setete i Molimau a Ieova, e tali faatatau atu ai i se lipoti faaituau na faia e uiga i Molimau i tala fou i le polokalama o le televise e taʻua o le 60 Minutes. Na ia faapea mai: “Afai e sili atu ona toatele tagata e ola i le auala o faia ai lo outou faatuatuaga, semanu o le a lē pei le malo lenei o le tulaga lea o loo iai nei. O aʻu o le tasi o tagata e faia tala fou ua ou iloa e faapea, o la outou faalapotopotoga, e faavae i le alofa ma le faatuatua malosi i Lē na Foafoaina Mea. Ou te manao ina ia outou iloa e lē o tagata uma e faia Tala Fou, e faaituau.”

O se Lotu ua Lauiloa

Po o se mea tatau le faapea atu, o Molimau a Ieova o se vaega laitiiti faalotu e tuese? I se isi itu, e moni o Molimau a Ieova e toaitiiti pe a faatusatusa atu i nisi o lotu. Ae peitai, ia manatua le fetalaiga a Iesu e faapea: “E va vaapiapi le faitotoa, e lauitiiti foi le ala e tau atu i le ola, e toaitiiti foi i latou o e maua.”—Mataio 7:13, 14.

E ui i lea, o Molimau, e matuā ese lava mai le avea o se lotu taufaasese. I le tau e totogo ai mea o le 1993, na ʻau atu ai le silia i le 11 miliona tagata i le Faamanatuina e Molimau o le maliu o Keriso. Ae sili atu ona tāua na i lo o lo latou faitau aofai, o uiga o o latou tagata ma a latou amioga e fai ma faaaoaoga, na ua avatu ai e tagata o le lalolagi aoao le faamālō. E mautinoa o se vala lenei na pogai ai ona faatagaina faaletulafono i latou i le tele o atunuu, ma lauiloa ai e faapea o se lotu e faamaoni ma e lē faaʻoleʻole.

E mataina se faaiuga na faia talu ai nei e le Komiti o Aiā Tatau a Tagata i Europa. Na ia folafola mai ai e faapea, e ao i Molimau ona maua le saolotoga o mafaufauga, loto fuatiaifo, ma lotu, ma e ia i latou le aiā tatau e tautatala atu ai e uiga i lo latou faatuatuaga ma aʻoaʻo atu i isi. Semanu e lē faia lena faasilasilaga pe ana faapea sa lauiloa Molimau a Ieova i le faaaogāina o faiga taufaasese ma amioga leaga e maua ai ni tagata fou, ma pe ana faapea foi na latou faaaogāina ni auala faaʻoleʻole e pulea ai mafaufau o o latou soʻo.

E anoanoai tagata i le lalolagi atoa ua masani lelei ma Molimau a Ieova. Mai le faitau miliona o tagata e lē ni Molimau o ē o loo suesueina le Tusi Paia ma Molimau, po o ē foi na suesue ma i latou i se taimi, ua tatou fesili i ai, Pe sa iai ni taumafaiga faamalosi e faavalea ai lou mafaufau ina ia suia ou talitonuga? Pe sa faaaogā e Molimau le tomai e pulea ai le mafaufau ia te oe? “E leai” o le mea moni, o lau tali faamaoni lea. E manino lava, ana faapea sa faaaogāina na faiga, semanu la e matuā toatele lava ni tagata na aafia ai e tetee i so o se finauga e tauleleia ai Molimau a Ieova.

“E Matuā Fesoasoani atu i Tagata”

O tagata o lotu taufaasese, e masani ona faaesea i latou lava mai aiga, o uo, e oo lava i le sosaiete o tagata lautele. Pe faapena Molimau a Ieova? Na tusi mai se tamaloa e aafia i le faia o tala fou i le Czech Republic e faapea: “E lē o aʻu o se Molimau a Ieova.” Ae na ia faapea mai: “Ua iloa manino mai, o i latou [Molimau a Ieova] e uigaese le malolosi tau amio. . . . Latou te amanaia pule faalemalo, ae e talitonu i latou, e na o le Malo o le Atua e iai le tomai i le foia o faafitauli uma faaletagata. Ae ia mātau—e lē o i latou o ni tagata e maelega valea. O i latou o ni tagata e matuā fesoasoani atu i tagata.”

Latou te lē mau i ni nofoaga faapitoa e vavaeesea ai i latou mai i o latou aiga ma isi tagata. Ua iloa e Molimau a Ieova e faapea, o la latou avega tauave o le alolofa atu ma tausia o latou aiga. Latou te ola ma galulue ma tagata o ituaiga uma ma lotu. Pe a taia i mala, e vave lava ona latou tali atu i le avatua o meaalofa mo mala ma isi fesoasoani alofa i tagata.

O le mea e sili atu ona tāua, ona o loo latou auai i se polokalama faaleaoaoga e lē mafaatusatusalia. E fia ni lotu o faia se taumafaiga maopoopo e ō atu e asiasi totino i tagata taitoatasi i o latou atunuu? E faia e Molimau a Ieova lenei mea i le sili atu i atunuu e 200 ma i gagana e sili atu foi i le 200! E manino ai la, o Molimau a Ieova,” o loo matuā aafia i le fesoasoani atu i tagata.”

E Matuā Pipiimau i le Tusi Paia

E ioeina, o aʻoaʻoga a Molimau a Ieova, e ese mai i aʻoaʻoga a lotu. E talitonu Molimau a Ieova e faapea, o Ieova, o le Atua e ona le malosi uma lava, ma o Iesu, o lona Alo, ae lē o se vaega o se aiga atua tasitolu. E taula lo latou faatuatua i le talitonuga e faapea, e na o le Malo o le Atua e mafai ona aumaia le mapusaga i tagata ua mafatia. Latou te lapataia tagata e uiga i le faaumatiaga o loo faaloloi mai o lenei faiga o mea iuvale. Latou te talaʻi atu e uiga i le folafolaga a le Atua i se parataiso faalelalolagi mo tagata usiusitai. Latou te lē faamamaluina le koluse. Latou te lē faamanatuina le Kirisimasi. Latou te talitonu e oti le solu ma e leai se afi i seoli. Latou te lē ʻaina le toto, pe talia foi se tuiga toto. Latou te taumamao mai le faaaafia i faiga faapolotiki ma le auai i taua. Pe sa e fesili ifo ia te oe lava pe aisea e ese ai aʻoaʻoga a Molimau a Ieova?

Ua faamatala mai se nusipepa a Massachusetts, le Daily Hampshire Gazette, e uiga i Molimau a Ieova e faapea, “e maumauai i le faamatalaina o le Tusi Paia, ua faasaina ai le tele o gaoioiga na e manatu i ai isi e faapea e tatau . . . , ua faia na mea uma, i se taumafaiga e mulimuli i le faaaoaoga a Kerisiano o le uluai senituri ma le upu a le Tusi Paia.” E ioe le Encyclopedia of Religion e faapea, “o mea uma lava latou te talitonu i ai, e faavae i le Tusi Paia. Latou te ‘faamaonia mau’ (e ala i le siiina mai o mau e lagolagoina ai) e toetoe lava o faamatalaga uma o le faatuatuaga, latou te talia e aunoa ma le fesiligia o le pule a le Tusi Paia, lea e matuā suia atoatoa ai uputuu.” Ua taʻua e le tusi Religion in America e faapea: “E lē solomuli lava lea vaega mai lona taulai atu i le suesueina o le Tusi Paia, ma o ana aʻoaʻoga, e lagolagoina e le anoanoai o faasinomaga o mau ua i le Tusi Paia.”

O Ai Lo Latou Taʻitaʻi?

E moni lena mea, auā o lenei pipiimau i aʻoaʻoga a le Tusi Paia, ua lē faamamaluina ai e Molimau a Ieova pe tapuai atu ai i ni taʻitaʻi faaletagata e pei o ni atua, e pei ona masani ai ona faia e tagata o lotu taufaasese i aso nei. Latou te teena le manatu e uiga i le vavaeesea faapitoa o se vasega e fai ma faifeau. Ua taʻua ma le saʻo e le Encyclopedia of Religion e uiga i Molimau a Ieova e faapea: “E faasaina se vasega faapitoa o faifeau ma ni tofi iloga e faaesea ai i latou.”

Latou te mulimuli ia Iesu Keriso o lo latou Taʻitaʻi ma o le Ulu o le faapotopotoga Kerisiano. O Iesu o lē na fetalai: “Aua neʻi taʻua outou o rapi; auā e toatasi la outou aʻoaʻo, o le Keriso lea; a o outou uma o le au uso outou. Aua foi neʻi tou taʻua se tasi i le lalolagi o lo outou tamā; auā e toatasi lo outou Tamā, o i le lagi o ia. Aua foi neʻi taʻua outou o aʻoaʻo [“taʻitaʻi,” NW]; auā e toatasi lo outou aʻoaʻo [“Taʻitaʻi”], o le Keriso lea.”—Mataio 23:8-12.

Ua manino la, e matuā ese lava Molimau a Ieova mai le avea o se lotu taufaasese, e pei foi ona ese Iesu mai le avea o sē e ʻai tele ma inu tele. E ioeina foi, e lē o tagata uma na taaina i lipoti sese e uiga ia Iesu ma ona soʻo na pauu i le mailei o le taufaaleaga ia te ia. O nisi atonu na faaseseina i ni tala a isi. Afai e iai ni au fesili e uiga i Molimau a Ieova ma o latou talitonuga, aisea e lē faamasani atu ai ia i latou? E matuā matala faitotoa o o latou Maota o le Malo mo ē uma e sailia le upu moni.

E mafai foi ona e maua aogā mai la latou sailiga ma le faaeteete mo le poto saʻo o le Tusi Paia ma aʻoaʻo pe faapefea ona tapuai atu i le Atua e ogatusa ma fetalaiga a Iesu e faapea: “A e oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le faamaoni; auā o loo saili le Tamā i e tapuai faapena ia te ia.”—Ioane 4:23.