Auala 3​—Ia Faagaoioi Lou Tino

“Pe ana faapea o se fualaau le faamalositino, semanū o le togafitiga lenā e sili ona fautuaina e fomaʻi mo tagata mamaʻi.” (Emory University School of Medicine) I mea uma e mafai ona fai mo lo tatou soifua mālōlōina, e sili atu ona aogā le faamalositino.

Fai ni au faamalositino. O le faagaoioi pea o le tino, e aogā e tatou te lagona atili ai le fiafia, lelei ai le mafaufau, atili ai ona malosi, faia ai le tele o mea, faatasi ma le fuafua lelei o meaʻai, o le a faaitiitia ai lo tatou mamafa. E lē manaʻomia ni faamalositino faigatā pe umi le taimi e alu ai. E aogā faamalositino talafeagai, e fai e lē aunoa i ni aso o le vaiaso.

O le tamoʻemoʻe, savali faatopetope, tiʻetiʻe uila, ma taalo i taaloga e faagaoioi ai le tino, e vave ai le tātā o lou fatu ma afu ai, e te lē lēlavā gofie ai ma lē aafia ai i le maʻi fatu po o le pē o se itutino. E aogā le fai faatasi o faamalositino faigofie ma le siisii mea mamafa, e faamalosia ai ou ponaivi, maso o le manava, lima ma vae. E aogā foʻi nei gaoioiga e vave ai ona faaaogā e le tino meaʻai, ma faaitiitia ai le mamafa.

Savali. E aogā le savali i so o se tagata, ma e tau lē totogia se tupe e alu i se fale faamalositino. E lelei ona savali, i lo o le alu i se taavale, pasi po o lifi. Nai lo o le faatali i se taavale, ia savali auā atonu e vave ai ona e taunuu i le mea o loo e fia alu i ai. Mātua, faalaeiau lau fanau e taaalo i fafo o le fale pe afai e mafai. O le faia faapea, e malolosi ai ma aogā e faagaoioi ai o latou tino atoa, i lo o le nofonofo ma taaalo i taaloga e pei o taaloga vitiō.

Po o le ā lava lou matua, ae e aogā ona e faia ni faamalositino talafeagai. Pe afai ua e matua ma e iai ni faafitauli i lou soifua mālōlōina, ua lē mafai ai ona e faamalositino, ia talanoa atu i se fomaʻi i se auala e fai ai. Ma ia fai loa! O faamalositino e faifaimālie ma e lē soona faia, e fesoasoani foʻi i tagata matutua e malolosi ai pea maso ma ponaivi. E aogā foʻi i tagata matutua e ʻalofia ai le paʻuʻū.

O le faamalositino, sa fesoasoani iā Rustam lea na taʻua i le amataga o lenei faasologa o mataupu. I le fitu tausaga ua mavae, na amata ai ona tamomoʻe Rustam ma lana avā i le taeao, i aso e lima o le vaiaso. Ua fai mai o ia, “I le taimi muamua, na ma faia ni faamolemolega ina ia aua ai neʻi ma ō. Ae o le iai o sē e lua te toʻalua, na uunaʻia ai i maʻua e ō. I le taimi nei ua avea o se masaniga lelei e ma te fiafia i ai.”

[Ata i le itulau 6]

E mafai ona avea le faamalositino o se mea e fiafia ai