UA FESILI MAI TALAVOU
O le ā e Uunaʻia ai Aʻu e Faamalositino?
Aiseā e tatau ai ona ou faamalositino?
I nisi atunuu, e itiiti lava se taimi ua faaalu e talavou e faagaoioi ai o latou tino, ma ua iai se aafiaga lē lelei i o latou soifua mālōlōina. E leitioa la faapea mai le Tusi Paia, e ‘aogā le faamalositino.’ (1 Timoteo 4:8) Seʻi mātau mea nei:
O le faamalositino e te lagona ai le fiafia. Pe a e faamalositino, e faamatuu mai e lou fai‘ai se vailaau e taʻua o le endorphins, lea e te lagona ai le toʻafilemu ma le fiafia. Ua taʻua e nisi le faamalositino, o se vaifofō faalenatura e aveese ai le lotomafatia.
“Pe a ou toleni i le taeao, e lelei oʻu faalogona i le aso atoa ma ou te galue malosi ai fo‘i. O le toleni ou te maua ai le fiafia.”—Regina.
O le faamalositino e faaleleia ai ou foliga vaaia. O faamalositino paleni e faateleina ai lou malosi, ma e te lagona ai le mautinoa e faatatau iā te oe lava.
“Ua ou fiafia a ua mafai ona ou faia faasefulu le faamalositino lea e taʻua o le chin up, lea na matuā lē mafai lava ona ou faia i le tausaga ua teʻa. Ae ua sili atu ona ou fiafia, ona o lea ou te tausia lelei loʻu tino.”—Olivia.
O le faamalositino e faaumiumi ai lou ola. O le faagaoioi o lou tino e aogā i le fatu ma le faagasologa o le toto i le tino, ma le auala e te manava ai. O faamalositino e taʻua o le aerobic, e mafai ona fesoasoani e ʻalofia ai le poloka o alātoto o le fatu, lea ua avea ma māfuaaga autū o le feoti o tamāloloa ma fafine.
“Pe a iai sa tatou faasologa mo le faamalositino, e faailoa atu ai i Lē na foafoaina mea lo tatou talisapaia o le tino na ia foaʻi mai.”—Jessica.
Manatu autū: E tele aogā o le faamalositino i le taimi lenei faapea foʻi le lumanaʻi. Na faapea mai se tamaʻitaʻi talavou e igoa iā Tony: “E lē taitai e fai atu, ‘Ana iloa a ou te lē alu i le mauga, pe ou te toleni foʻi. Pe a tuu lo‘u fai faamolemolega ae ou alu ou te faamalositino, e lē taitai ou lagona le salamō.’”
O se taavale e lē tausia lelei o le a iai le taimi e lē toe ola ai; e moni foʻi lenā manatu i o tatou tino pe a lē tausia lelei
O le ā e taofia ai aʻu mai i le faamalositino?
O nisi nei o luʻi:
Leai se uunaʻiga. “A o talavou tagata, e manatu e leai se mea e oo iā i latou. E faigatā ona faaāta i le mafaufau se taimi o le a aafia ai i faafitauli tau le soifua mālōlōina. E te mafaufau ua na o se faafitauli e maua ai tagata matutua.”—Sophia.
Leai se taimi. “O le pisi o la‘u faasologa, ou te taumafai ai e maua se taimi ou te ‘ai lelei ai ma moe, ae o se luʻi i taimi uma le taumafai e maua se taimi e faamalositino ai.”—Clarissa.
E taugatā le fale faamalositino. “E taugatā ona faatumauina lou fuaitino, e tatau ona totogi le tupe pe a e fia alu i se fale faamalositino.”—Gina.
Mea e mafaufau i ai:
O le ā le luʻi sili ona faigatā iā te oe e tusa ai o le faamalositino? O le manumalo mai i lenā luʻi e manaʻomia ai taumafaiga, ae o le a sili atu aogā e te maua mai ai.
E faapefea ona uuna‘ia a‘u ina ia faamalositino?
O nisi nei o fautuaga:
O lou tiute tauave le tausia o lou soifua mālōlōina.—Kalatia 6:5.
ʻAlofia le faia o faamolemolega. (Failauga 11:4) O se faaaʻoaʻoga, e lē tau manaʻomia ona totogi se fale faamalositino ina ia amata ai sau polokalame faamalositino. Ia saʻili se mea e te fiafia e fai, ma avea ma vaega masani o lau faasologa.
Pe a manaʻomia se fesoasoani, fesili i isi i le auala e latou te faia ai faamalositino.—Faataoto 20:18.
Ia iai sau faasologa patino. Ia faatutū sini ma faamaumau i lalo mea ua e ausia, ina ia uunaʻia ai pea oe e faamalositino.—Faataoto 21:5.
Vaai se tasi e te lua faamalositino faatasi. O le iai o sau uō e te lua faamalositino faatasi, o le a faamalosia ai oe ma fesoasoani e te pipii ai i lau faasologa.—Failauga 4:9, 10.
Ia e faatalitalia e iai taimi o le a e lē taulau ai, ae aua le fiu pe a e fesagaʻia na taimi.—Faataoto 24:10.
Ia paleni
O loo fautuaina e le Tusi Paia tane ma fafine ina ia ‘pulea a latou amio.’ (1 Timoteo 3:2, 11) O lea ia paleni au faamalositino. E masani lava ona lē manuia taumafaiga a tagata e soona faamalositino na‘uā. Na taʻua e se tamaʻitaʻi talavou e igoa iā Julia, “Ou te lē fiafia i se tama e sili atu ona faatāua ona foliga vaaia nai lo o le auala e mafaufau ai.”
Ia faaeteete foʻi i fautuaga e pei o lenei, “E tusa pe e te faalogo atu o le a e oti, faamalosi pea.” O nei ituaiga fautuaga e ono afāina ai lou tino ma iʻu ina mou ai lou taulaʻi atu i “mea e sili ona tāua” i le olaga.—Filipi 1:10.
E lē gata i lea, o mea na tatau ona faalaeiauina ai oe e ono faavaivaia ai oe. Ua faapea mai se tamaʻitaʻi talavou e igoa iā Vera: “O le toʻatele o teine e latou te teuina ata o tagata e manana‘o e tutusa o latou fuaitino, ma e vāai i na ata ina ia faalaeiauina ai i latou. Ae e uma ane ua latou faatusatusa i latou lava i na tagata ma lagona ai le lotovaivai. E sili atu ona fai ma sini lou mauaina o se soifua mālōlōina lelei, nai lo na o lou fuaitino.”