Le Faafitauli o le Ita
Na matuā ita se tamāloa na alu atu i se faleʻaiga e oka sana sanuisi, ina ua manatu ua tuai tele ona aumai lana meaʻai. Na alu atu o ia i totonu ma faamataʻu se tagata e faigaluega ai, unaʻi o ia agaʻi i le laulau faatau ma pō. Ona tago atu lea o le tamāloa ma aumai lana sanuisi, ua ita tele ma savali i fafo ma le faleʻaiga.
O I TATOU uma lava e oo i ai le ita mai i lea taimi i lea taimi. Auā o le ita o se tasi o vaega o o tatou faalogona masani e pei o le alofa, faamoemoe, popole, faanoanoa ma le fefe. O le ita e pulea lelei, e mafai ona faaalia i se auala talafeagai ma maua ai aogā. Mo se faaaʻoaʻoga, e mafai ona aogā le ita pe afai e uunaʻia ai se tasi ina ia manumalo mai i ni toʻatugā po o faafitauli eseese.
E pei ona faamatalaina i le tala i le pito i luga, o le ita e iai foʻi ni ona lamatiaga leaga. O nisi tagata e vave tele ona ita, ita soo, ma e sili atu ona ita leaga nai lo o isi. Pe a faaʻonoʻono atu se tasi, atonu e latou te osofaʻia i ni upu malolosi pe faaoolima atu foʻi i lenā tagata. E ui e tatau i tagata ona pulea lo latou ita, ae o nisi tagata ua latou faataga le ita e puleaina i latou. O lenā ituaiga ita e lē mafai ona pulea e oo atu ai i lamatiaga, lea e masani ona taʻua i nisi taimi o le “faafitauli o le ita.”a
O i latou e iai faafitauli o le ita, e aumaia ai faanoanoaga matuiā e lē gata iā i latou lava ae faapea foʻi tagata o loo latou mafuta faatasi. O se tagata e iai le ita, e oo lava i mataupu e foliga mai e lē tāua, e mafai ona pasae aʻe ai le ita ma le sauā lea e oo ai i āuga mataʻutia. Manatu i faaaʻoaʻoga o loo mulimuli mai:
Na fanaina se tamāloa na savavali faatasi ma ana uō, ina ua lāvea i le ato toleni a se tasi o ana uō se isi tamāloa na savali i le auala pisi.
Na fasi faamoʻamoʻa e se tauleʻaleʻa e 19 tausaga le pepe e 11 masina a lana uō teine ma oti ai. Na taalo lenei tauleʻaleʻa i se taaloga vitiō sauā, ma na lē mafai ona pulea lona ita ina ua tago le pepe i le ki o le vitiō ma faiaʻina ai i lana taaloga.
Ua faaalia i lipoti faapena mai le lalolagi aoao, le faatuputupulaʻia o le aofaʻi o tagata e iai faafitauli o le ita. Aiseā ua faateteleina ai le ita?
[Faaopoopoga i lalo]
a Ua faamatalaina i le polosiua o le Boiling Point—Problem Anger and What We Can Do About It e faapea, o le “faafitauli o le ita,” o “so o se amioga e lē masani ai e fesootaʻi atu ma le pulea o le ita, lea e masani ona faapogaia le tele o faigatā i le olaga o se tagata, e aofia ai manatunatuga, faalogona, amioga ma faiā ma isi.”
[Pusa i le itulau 13]
O le ita o se tasi o vaega o o tatou faalogona masani. O lea la, e iai taimi atonu e talafeagai ona faaalia atu ai lo tatou ita, ae i se auala pulea. Peitaʻi, o loo talanoaina i nei mataupu le ita e lē talafeagai, lea e mafai ona faaleagaina ai i tatou ma isi i le itu tau faalogona, faaletino ma le faaleagaga.