Ua Fesili Mai Talavou
Aiseā e Lē Malamalama Ai Oʻu Mātua?
SEʻI MANATU I LE TULAGA LENEI.
Ua tā le ono i le afiafi o le Aso Faraile, ma ua faanatinati atu Simi, o se tama e 17 ona tausaga, agaʻi atu i le faitotoʻa i le pito i luma. Ua ia valaau mai i ona mātua, “Toe feiloaʻi!,” ma faamoemoe talosia ia galo i ona mātua ona fai mai le fesili masani.
Sa tatau lava ona ia iloaina o le a fesili mai ona mātua.
Ua fesili mai lona tinā, “Simi, o le ā le taimi e te toe sau ai?”
Ua faafuaseʻi ona tū Simi ma tali atu. Ua lē mautonu ma faapea atu: “Umm . . . aua e te lua faatali atu.” Ua faatopetope atu Simi e tatala le faitotoʻa ma ua toeitiiti oo atu i fafo, ae valaau mai lona tamā, “Simi, faatali ea!”
Ua toe tū Simi, ma ua ia lagona atu le leo paū o lona tamā: “Ua e iloa le tulafono. Tā le sefulu—leai se faamolemolega!”
Ua tali tetee atu Simi i lona tamā, “Se Dad, e te iloa e ese loʻu mā e fai i aʻu uō e tatau ona ou vave sau i le fale?”
Ae e leʻi popole i ai lona tamā. Ua toe fai atu, “Tā le sefulu, leai se faamolemolega!”
ATONU ua oo iā te oe lenā tulaga. E tusa po o ni faasāsāaga, o au musika, o au uō po o ou laʻei, ae ua faataatia e ou mātua tulafono ma e lē mafai ona toe suia. Mo se faaaʻoaʻoga:
“Ina ua faaipoipo loʻu tamāfai ma loʻu tinā, na ia matuā faasāina lava aʻu ona faalogologo i so o se ituaiga o musika na ou fiafia i ai. Na iʻu lava ina ou aveesea uma aʻu CD pese!”—Brandon.a
“Na faitio mai loʻu tinā iā te aʻu pe aiseā e leai ai ni aʻu uō. Ae ina ua ou fai i ai pe mafai ona ma tafafao ma se tasi, na ia faapea mai e leai, ona e na te lē iloaina lenā tagata. Sa ou matuā lē mautonu lava!”—Carol.
“E lē taitai tuu mai e loʻu tamā ma loʻu tināfai le avanoa ou te ofuina ai ni mitiafu seʻi vaganā o se mitiafu lapoʻa. Ma e fai mai pea loʻu tamā e puupuu tele ofuvae pe a i luga aʻe o tuli.!”—Serena.
O le ā e mafai ona e faia pe afai e tou te lē femalamalamaaʻi ma ou mātua? Pe e mafai ona e talanoaina faatasi le mataupu ma i laʻua? Ua faapea mai Joanne e 17 tausaga, “E masani lava e lē fia faalogo mai oʻu mātua.” Ua taʻua foʻi e Amy e 15 tausaga, “Pe a ou manatu e lē malamalama oʻu mātua iā te aʻu, e pau laʻu mea e fai o le lē toe tautala.”
Ae aua e te vave fiu! Atonu e sili atu ona mananaʻo ou mātua e faalogo mai iā te oe nai lo o le mea o loo e manatu i ai.
Manatu i le mea lenei: E oo lava i le Atua na faafofoga mai a o faailoa atu e tagata o latou tulaga iā te ia. Mo se faaaʻoaʻoga, na faafofoga Ieova iā Mose a o ia talanoa atu e tusa ai ma le lē usiusitaʻi o tagata Isaraelu.—Esoto 32:7-14; Teuteronome 9:14, 19.
Atonu e te ono manatu e lē fetuutuunaʻi ou mātua e pei o le Atua. Ma o le mea moni e matuā eseese le talanoa atu o Mose iā Ieova mo le faasaoina o le nuu atoa o Isaraelu, ma lou talanoa atu i lou tamā ma lou tinā e faatatau i lou tuai teisi mai i le fale. Peitaʻi, e iai se taʻiala e tutusa ai:
Pe afai e iai se manatu talafeagai e te fia fai atu ai, atonu o le a lotomalilie ou mātua, o ē o loo i le tulaga pule, e faalogo mai iā te oe.
O le auala sili e taulau manuia ai, o le auala e te faailoa atu ai ou manatu! O le a fesoasoani iā te oe auala o loo mulimuli mai ina ia e faia ai faapea i se auala e sili ona aogā:
1. Ia iloa le faafitauli. I le pito i lalo, tusi le mataupu e foliga mai e tou te lē o ioe faatasi i ai ma ou mātua.
2. Ia iloa faalogona. I le pito i lalo, tusi se upu e faamatala ai ou lagona ona o manatu o ou mātua—pe o e tigā, faanoanoa, māsiasi, lē maufaatuatuaina po o isi. (Faataʻitaʻiga: I le tala o loo faatomua ai lenei mataupu, o loo faaalia ai e Simi lona māsiasi i luma o ana uō ona o le soona faasāsā o ia e ona mātua.)
3. Taumafai e mafaufau e pei o se matua. Seʻi mafaufau e faapea o loo iai sau tama talavou o loo feagai ma le tulaga lava e tasi na taʻua i le Auala 1. Pe afai o oe o se matua, o le ā le mea e sili ona e popole ai, ma aiseā? (Faataʻitaʻiga: I le tala o loo faatomua ai lenei mataupu, sa ono lagona e mātua o Simi le popole mo lona saogalemu.)
4. Toe iloilo le mataupu. Tali fesili o loo mulimuli mai:
O le ā se aogā e te iloaina mai i manatu o ou mātua?
O le ā e te faia ina ia faaitiitia ai o la popolega?
5. Ia talanoa le mataupu ma ou mātua ma iloilo faatasi ni vaifofō. E ala i le faatatauina o auala na taʻua i luga ma iloilo manatu i le pusa “Fesoasoani mo Fesootaʻiga”—atonu o le a e iloa ai e mafai ona e talanoa atu i ou mātua i se auala e sili ona lelei. O loo olioli Kellie i se faiā faapena ma ona mātua. Ua ia taʻua: “O le fefinauaʻi e lē foʻia ai se faafitauli, ma e lē mafai ona e manumalo. O laʻu auala e fai o le talanoa faatasi lea ma oʻu mātua. E masani lava ona matou ioe faatasi ina ia faamalieina ai i matou uma.”
E maua nisi mataupu faa-Peretania o le faasologa, “Ua Fesili Mai Talavou” i le Initaneti i le www.watchtower.org/ype
[Faaopoopoga i lalo]
a Ua suia nisi o igoa.
[Pusa i le itulau 18]
FESOASOANI MO FESOOTAʻIGA
“E tele iʻuga lelei e maua i le faalogo atu nai lo o le avaavau atu. Pe afai e te faalogo i ou mātua ma taumafai e malamalama i o la manatu, o le a faapena foʻi ona la faia iā te oe.”—Rianne.
Faitau le Filipi 2:3, 4.
“Aua le tali upu! Sa masani ona fai laʻu mea lenā seʻia oo ina ou iloa, e mafai ona ʻalofia le tauaʻimisa (ma le faasalaga) pe ana faapea ou te puleaina loʻu laulaufaiva!”—Danielle.
Faitau le Faataoto 17:27; 21:23.
“Faatali seʻiloga ua toʻafilemu tagata uma, ma ua e iloa o le a fia faalogo mai ou mātua iā te oe.”—Collette.
Faitau le Faataoto 25:11.
“E ao ona iloa e ou mātua o loo e faaaloalo iā i laʻua ma e te manaʻo moni e faalogo atu i mea o loo la fai mai ai. O lea, a o leʻi faailoa atu ou lagona, ia faamautinoa atu iā i laʻua sa e faalogo i mea na la fai mai ai ma e te malamalama i ai.”—Emily.
Faitau le Faataoto 23:22; Iakopo 1:19.
[Pusa i le itulau 18]
MEA MONI O LE OLAGA
E lē o feeseeseaʻiga uma e manaʻomia ona talanoaina. I nisi tulaga, e mafai ona e ʻfai ifo i lou loto ma ia fifilemu.’ (Salamo 4:4) Ua faapea mai se tamaʻitaʻi talavou e igoa iā Beatrice: “O nisi taimi ou te mafaufau e oo atu taeao ua faaitiitia lenei faafitauli, o lona uiga e lē tāua tele la. E sili ai ona aua neʻi toe mafaufau i ai.
[Pusa i le itulau 19]
AISEĀ E TE LĒ FESILI ATU AI I OU MĀTUA?
Na faapefea ona e foʻia feeseeseaʻiga ma ou mātua? Pe a e toe mafaufau i taimi o lou talavou, po o le a e faia se gaoioiga e ese mai? Afai o lea, o le ā?
[Pusa i le itulau 19]
TALA A ISI TALAVOU
Lina—Ou te taumafai e mafaufau a o leʻi tautala atu. Ou te iloilo manatu o oʻu mātua ma tatalo a o leʻi oʻu fai atu se tala. Pe afai ou te iloa o laʻu tala o le a fai atu o le a amata ai se misa, ou te filemu pea e lē tautala seʻia oo ina mafai ona faailoa atu loʻu manatu e aunoa ma le finau.
Iose—Pe a ou lagona ua amata ona ou lē fiafia, ou te taumafai e faapea ifo iā te aʻu lava, o le a lē lelei loʻu aso ona o se finauga e matuā lē tatau ona tupu. O le iʻuga, ua ou iloa ua faaitiitia loʻu ita i le taimi nei pe a faatusatusa atu i le taimi a o oʻu laʻitiiti.
Ramona—Ua ou iloa e sili atu le faalogo i le manatu o oʻu mātua. Atonu e leai se eseesega o o la manatu ma loʻu manatu, ma e ono lē faateteleina ai le feeseeseaʻiga e pei ona ou manatu i ai.