Auala e Fesootaʻi ai ma Lau Tama Talavou

LE LUʻI

E talanoa atu iā te oe se tamaitiiti laʻitiiti i mea uma lava, ae o se talavou, e na te natia mea uma. Pe a e taumafai e talanoa atu i ai, a lē tali tuutaseʻi mai, ua tali finau mai.

E mafai ona e talanoa atu i lau tama talavou. Ae ia iloilo muamua vala e lua e ono māfua ai le luʻi ua taʻua i luga.a

LE POGAI

Fia tutoʻatasi. Ina ia taʻumatuaina se talavou, e tatau ona faasolosolo mālie ona ia iloa fesagaʻia faafitauli o le olaga. O nisi talavou e mananaʻo e maua le tele o le saʻolotoga; ae o nisi mātua e itiiti le saʻolotoga e tuu atu i a latou fanau talavou. O le iʻuga o le a mapuna aʻe ni feeseeseaʻiga i le va o mātua ma fanau talavou. Na faitio mai Bradb e 16 tausaga: “E taumafai oʻu mātua e pulea vala uma o loʻu olaga. Afai e la te lē aumaia iā te aʻu le tele o le saʻolotoga, e atoa loa le 18 o oʻu tausaga oʻu alu ese ma le aiga!”

Tomai e fefulifulisaʻi ai. E faigofie le vaai a fanau lāiti i mea, ae e ese le vaaiga a talavou. E tāua ona iai le tomai e fefulifulisaʻi ai i mataupu, auā e fesoasoani i se talavou e atiaʻe ai le faautaga loloto. Seʻi manatu i se faaaʻoaʻoga: Ua vaelua tutusa e le tinā le keke ma tuu atu i lana fanau tama e toʻalua. E manatu le tamaitiiti laʻitiiti e saʻo ma faigofie le gaoioiga a lo la tinā, ae e ese le manatu o le talavou matua. O lea, o le saʻo o le auala e feutagaʻi ai ma tagata, e lē faapea ai e tutusa i taimi uma, ma o le tutusa o le auala e feutagaʻi ai ma tagata, e lē faapea ai e saʻo i taimi uma. O le tomai e fefulifulisaʻi ai i mataupu, e iloa ai e lau tama talavou taulima mataupu faigatā. Ae o le itu e lē lelei ai, e iʻu ina lua feeseeseaʻi ai.

LE MEA E MAFAI ONA E FAIA

Afai e mafai, ia talanoa faasamasamanoa. Ia faaaogā tatau avanoa paganoa. O se faataʻitaʻiga, ua iloa e nisi e sili atu ona faigofie ona talanoa atu talavou i mātua, pe a fai faatasi se galuega, pe tiʻetiʻe i le taavale, nai lo o le talanoa faafesagaʻi.​—Taʻiala faale-Tusi Paia: Teuteronome 6:6, 7.

Ia faapuupuu. Aua le finau i mataupu uma, ae ia faailoa atu lou manatu, ona faatali lea. O le a lagona e lau tama talavou lou manatu na fai atu pe a nofonofo na o ia. Ia tuu atu iā te ia le avanoa e faia ai faapea.​—Taʻiala faale-Tusi Paia: Faataoto 1:1-4.

Faalogo ma ia fetuutuunaʻi. Aua le faasalavei atu, ae ia faalogologo lelei ona e malamalama atoatoa ai lea i le faafitauli. Pe a tali atu, ia faautauta. Afai e te pulepuletutū naʻuā, o le a taumafai lau tama talavou e suʻe se auala e lē usitaʻia ai au tulafono, e aunoa ma se faasalaga. Ua lapataʻi mai le tusi Staying Connected to Your Teenager: “O i inei la o le a ola ai fanau i se olaga faauigalua. O isi taimi ua taʻu uma atu i mātua mea e iloa e mananaʻo mātua e iloa, ae e ō ese atu loa ma mātua, ona fai lea o le mea e mananaʻo i ai.”​—Taʻiala faale-Tusi Paia: Filipi 4:5.

Ia toʻafilemu. Ua taʻua e se talavou e igoa iā Kari: “Pe a feteenaʻi o ma manatu ma loʻu tinā, e tetee mai i mea uma ou te fai atu ai. O le pogai lea o loʻu ita ma vave ona oo atu le ma talanoaga i se finauga.” Nai lo o le soona maʻemaʻeā, ia fai atu ni faamatalaga e iloa ai e lau tama talavou e te malamalama i ona faalogona. O se faataʻitaʻiga, nai lo o le fai atu, “Aua le popole fua i lenā mea!” ae ia fai atu, “O lea ou te malamalama lelei i le mea lenā e te popole ai.”​—Taʻiala faale-Tusi Paia: Faataoto 10:19.

Fautua atu ae aua e te faia le faaiʻuga. Pe a fesagaʻi lau tama talavou ma se faigatā, aua e te “faia” le faaiʻuga mo ia, ae ia tuu i ai le avanoa e faailoa mai e ia ni vaifofō o le faafitauli. Pe a uma ona lua talanoaina ni nai manatu, ia fai i ai: “O nisi na o vala e te filifili i ai. Ia mafaufau i ai i nai aso, ona ta toe talanoa lea po o le ā se faaiʻuga ua e filifilia ma pe aiseā.”​—Taʻiala faale-Tusi Paia Eperu 5:14.