Faatulagaina o Tulafono mo Lau Fanau Talavou

LE LUʻI

E ono manatu lau tama ua ova lou faasāsā naʻuā, ae e lē o lou manatu lenā. E te ono faapea mai: ʻO le a feagai laʻu tama ma faafitauli pe a leai ni tulafono!’

E mafai ona e faatulaga ni tulafono talafeagai mo lau tama talavou. Peitaʻi, e tatau ona e iloa muamua le māfuaaga e na te teena ai na tulafono.

MĀFUAAGA

Talafatu: O le masani a talavou uma le tetee i tulafono.

Tala Moni: E mafai ona usitaʻi talavou pe afai e faatulaga e mātua ni tulafono e talafeagai, ma talanoa ma i latou e uiga i na tulafono.

E ui e tele māfuaaga e ono tetee ai talavou, ae e ono lē iloa foʻi e mātua, e māfua ona tetee tamaiti ona o le lē fetuutuunaʻi o a la tulafono, po o le lē talafeagai foʻi ma le matua o le tamaitiiti. Mātau manatu nei:

• Lē fetuutuunaʻi. Pe afai e lē fetuutuunaʻi tulafono a mātua, o le a manatu la le talavou o loo faaaogā e ona mātua tulafono e pulepuletutū ai i lona olaga, nai lo o le puipuia ai o ia. O le iʻuga, o le a fai faananā e le talavou mea o loo faasā e mātua ona fai.

• 

  Lē talafeagai ma le matua o le talavou: E ese mai i tamaiti lāiti, e lē faamalieina talavou pe a faapea atu mātua: “E na o le fai a o le mea lea e fai atu ai pau lea.” E latou te mananaʻo e iloa māfuaaga e ala ai ona faia se mea, auā e manaʻomia ona faia a latou lava filifiliga a o faasolo ina matutua. E lelei atu la i talavou ona iloa māfuaaga o mea ma faia ni filifiliga lelei i le taimi lenei, a o iai pea i lalo o le vaavaaiga a mātua.

O le ā e te faia pe a faaauau pea ona lē fiafia lau tama talavou i au tulafono?

MEA E MAFAI ONA E FAIA

O se mea tatau i mātua ona faailoa i talavou le mea e gata mai ai mea e latou te faia, ma o le mea foʻi lenā o loo mananaʻo i ai talavou. O lea, ia faatulaga ni tulafono, ma faamautinoa ua malamalama i ai le fanau talavou. Ua taʻua i le tusi Letting Go With Love and Confidence: “Pe afai e tuu atu i talavou ni tulafono manino, ma faatalitalia e iai taimi e latou te manaʻomia ai le vaavaaiga a mātua, o le a faigofie la iā i latou ona ʻalofia amioga e lē tatau.” Ae i le isi foʻi itu, pe a soona tuusaʻoloto talavou, o le a atagia mai ai le lē ano o mātua, ma iʻu ai ina fouvale talavou.​—Mataupu silisili o le Tusi Paia: Faataoto 29:15.

E faapefea la ona faapaleni lea tulaga? Ia faataga lau tama e faaali mai ona manatu e tusa ai o tulafono a le aiga. O se faataʻitaʻiga, ia faalogo atu a o faaali mai ona manatu i le māfuaaga e manaʻo ai e fetuunaʻi se tulafono. Pe a iloa e lau tama talavou o loo amanaʻia ona manatu, o le a faigofie la ona ia usitaʻia au faaiʻuga, e tusa pe e lē o malie i ai o ia.​—Mataupu silisili o le Tusi Paia: Iakopo 1:19.

Ia mātau, e masani lava ona faaitiitia e mātua saʻolotoga a o latou fanau talavou, pe a talosaga atu mo se saʻolotoga faaopoopo. Peitaʻi, e tatau ona e uaʻi totoʻa atu i le talosaga a lau tama talavou. Po o faaalia e lau tama uiga maufaatuatuaina? Pe e manaʻomia ona e toe fetuutuunaʻi le tulaga o mea? Ia lotomalie e fai ni suiga pe a manaʻomia.​—Mataupu silisili o le Tusi Paia: Kenese 19:17-22.

E lē gata i le amanaʻia o o latou faalogona, ae e manaʻomia foʻi ona e faailoa atu i lau tama mea o loo e manatu mamafa i ai. O lou faia faapea o le a e aʻoaʻoina ai o ia e manatu mamafa foʻi i isi, nai lo o le tau lava o mea e manaʻo i ai.​—Mataupu silisili o le Tusi Paia: 1 Korinito 10:24.

O le manatu mulimuli, ia faia se faaiʻuga ma faamatala atu le māfuaaga o lou faia faapea. E tusa pe e lē fiafia o ia i lau faaiʻuga, ae e mautinoa o loo fiafia i le mauaina o ni mātua e amanaʻiaina o ia. Ia manatua, o loo e aʻoaʻoina lau tama talavou ina ia gaoioi faatagata matua. E mafai ona e faia faapea pe afai e te faatulaga ni tulafono e talafeagai, ma talanoa ma ia e uiga i na tulafono.​—Mataupu silisili o le Tusi Paia: Faataoto 22:6.