MEA O TUTUPU I LE LALOLAGI

Iunaite Setete o Amerika

Na taʻua i le New York Times: ʻI tausaga taʻitasi, e $5,816 le tupe e gau ai se pule o se galuega i sana tagata faigaluega e ulaula, pe a faatusatusa i se tagata faigaluega e lē ulaula.’ E tusa ai ma faamatalaga a se ʻau suʻesuʻe i le Ohio State University, i se fua faatatau, o nei tupe gau e māfua mai ona o le tele o taimi faigaluega o na tagata e alu e ulaula ai, o le totogiina o tupe faaalu mo o latou soifua mālōlōina, le tiaʻi galuega, ma le lē tele o ni galuega e mafai ona latou faia ona o aafiaga mai i le vailaau o le nikotini o loo i le tapaa.

Italia

“O le lē ola o faifeʻau e tusa ai ma a latou upu, ua amata ai ona lē maufaatuatuaina e tagata le Lotu.”​—Pope Francis

Meleisia

Na maua e le pulega a Meleisia se uta o nifo elefane na aumai faananā mai i Togo e ave i Saina. O nei nifo elefane e silia ma le afe le aofaʻiga, e tusa ma le 24 tone le mamafa, ma sa nanā i lalo o uta o laau fai laupapa. Sa taʻua e ē e puipuia le siʻosiʻomaga, o se aofaʻiga pito i tele lea ua latou mauaina.

Aferika

E tusa ai ma le lipoti a le Faalapotopotoga o le Soifua Mālōlōina i le Lalolagi i le tausaga e 2012, o le 63 pasene o i latou na maliliu e māfua mai i faamaʻi pipisi e pei o le HIV/AIDS, manava tātā, malalia, fatafata vaivai ma faamaʻi e aafia ai tamaiti.

Ausetalia

Ua taatele i talavou le taaalo i taaloga faitupe i luga o telefoni ma isi masini faatekinolosi. O nisi taaloga e tai pei o le kasino, ma e faigofie ona manumalo ai. O le mea lea ua aumaia ai e le malo se lapataʻiga e faapea, o lenei tulaga e ono avea o se masaniga i tamaiti ma “e oo ai ina avea i latou o ni ē e fiafia i taaloga faitupe i le lumanaʻi.”