1 E Suia le Tulaga o Mea

Ua taʻua e nisi le pule i le ola o se “vaifofō tumau o se faafitauli e mafai lava ona foʻia.” Atonu e faigatā ona talitonu e mafai ona foʻia se faafitauli tugā, ma manatu ai ua siliga taliiseu se vaifofō o se faafitauli e ono lē tumau. Ae o le mea moni, e mafai lava ona faaleleia.​—Tagaʻi i le pusa “Na Suia o Latou Tulaga.”

Afai e lē mafai ona faaleleia se mea ua tupu, ʻalofia le taumafai e foʻia faafitauli uma i le taimi e tasi. Na fetalai Iesu: “Ia aua neʻi outou popole mo le aso a taeao, auā e iai foʻi popolega o le aso a taeao. Auā e tofu lava le aso ma mea leaga e tutupu ai.”​—Mataio 6:34.

Ae faapefea pe afai ua lē mafai ona suia se mea ua tupu? O se faaaʻoaʻoga, ua e aafia i se maʻi tumau, malepe lau faaipoipoga po o le maliu foʻi o sē pele iā te oe.

E mafai lava ona e onosaia na tulaga, e ala i le suia o le auala e te vaai ai i le faafitauli. O le iloaina e iai mea e lē mafai ona e toe faaleleia, o le a e lē soona faamamafaina naʻuā ai na mea i lou mafaufau. (Faataoto 15:15) Ia saʻilia ni auala e onosaia ai se tulaga faigatā, nai lo le taumafai e faia se gaoioiga matuiā e faamuta vave ai. O le iʻuga, o le a mafai ai ona e taulimaina se faafitauli na toetoe lava a lē mafai ona e faafesagaʻia.​—Iopu 2:10.

IA MANATUA: E lē mafai ona e aʻea se mauga i se laa se tasi, e faapena foʻi le auala e fesagaʻia ai toʻatugā, ia taulima auauaʻi e tusa lava pe foliga mai e matuā tugā.

LE MEA E MAFAI ONA E FAIA NEI: Talanoa atu i sau uō po o sou tauaiga e faatatau i lou faafitauli. Atonu e mafai e lenā tagata ona faasaʻo lou mafaufau e tusa ai o le mea ua tupu.​—Faataoto 11: 14.