Le Auala e Aʻoaʻo ai Fanau Talavou ia Faaeteete i le Faaaogāina o le Initaneti

LE LUʻI

Ua atagia mai i tala fou le avea o le Initaneti ma fetaulaʻiga o le faasauā i isi, o ē faaleagaina tamaiti i faiga faaleituaiga, ma le ave faagaoi o faamatalaga totino a tagata. E mautinoa le faapopoleina ai o oe, auā e masani ona faaaogā e lau fanau le Initaneti e aunoa ma le iloaina o lamatiaga.

E mafai ona e aʻoaʻo lau fanau i le faaaogāina ma le faaeteete o le Initaneti. Ae ina ia aʻoaʻoina i latou, o mea nei e tatau ona e iloa e faatatau i le Initaneti.

MEA E TATAU ONA E ILOA

E mafai e talavou ona faaaogā le Initaneti mai i so o se masini faatekinolosi. Ua iloa le aogā o le tuu o le komepiuta i se nofoaga e faigofie ona iloa atu e isi. Peitaʻi, o isi masini fou feaveaʻi e pei o telefoni e maua ai le Initaneti ma tablet, ua sili ona saʻoloto ai le faaaogāina o le Initaneti e talavou i le taimi lenei nai lo o se isi lava taimi, ma e aunoa ma se vaavaaiga.

Ua soona faaalu ai e nisi talavou le tele o le taimi. Ua faapea mai se tamaʻitaʻi e 19 ona tausaga: “Na ou kiina le komepiuta ma le fuafuaga e na ona siaki o aʻu imeli mo le lima minute, peitaʻi e uma ane ua matamata atu ai ma ata vitiō mo le tele o itula. O lea, e manaʻomia ona ou pulea totino.”

Ua soona faailoa atu e talavou faamatalaga i le initaneti. E tuufaatasi e tagata taulamalama faamatalaga eseese mai i faamatalaga a talavou, ma o latou ata i luga o le Initaneti ina ia iloa ai po o fea e nofo ai, le aʻoga e aʻoga ai, ma le taimi e leai ai nisi o le aiga i le fale.

E lē malamalama nisi talavou i āuga o a latou faamatalaga e tuu i le Initaneti. O faamatalaga e tuu i le Initaneti e tumau ai mo se taimi umi. E ono maua i se taimi ni faamatalaga ma ata ua leva ona tuu i le Initaneti e toe māsiasi ai. O se faataʻitaʻiga, atonu e toe iloilo e se pule o se galuega ni faamatalaga mai i le Initaneti, e faatatau i se tasi o loo fia faigaluega.

E ui i na popolega, ia manatua le mea lenei: E lē leaga le faaaogāina o le Initaneti. Ae e māfua ona iai faafitauli ona o le lē pulea lelei o le auala e faaaogā ai.

MEA E MAFAI ONA E FAIA

Aʻoaʻo lau fanau ia iloa mea e sili ona tāua ma fuafua lelei le taimi. O se tasi o vala o le avea ma tagata matua e aofia ai le iloaina o le mea e tatau ona faamuamua. E sili atu ona tāua fesootaʻiga a le aiga, meaaʻoga, ma feʻau a le aiga nai lo o le faaaogāina o le Initaneti. Pe afai ua tele lona taimi e alu ai, ia faatapulaa le umi e faaaogā ai.​—Mataupu silisili o le Tusi Paia: Filipi 1:10.

Aʻoaʻo lau fanau ia mafaufau muamua a o leʻi tuuina se faamatalaga i le Initaneti. Fesoasoani i lau fanau e ala i le faaaogāina o fesili nei, Po o lenei faamatalaga o le a faatigā ai i se isi? Po o lenei ata e taʻuleagaina ai loʻu tagata? Pe ou te lē māsiasi ai pe a vaai isi ma oʻu mātua i le ata ma le faamatalaga lenei? O le ā so latou manatu iā te aʻu pe a vaai i ai? O le ā soʻu manatu pe a faapea o se isi tagata lea e ona le ata ma faamatalaga nei?​—Mataupu silisili o le Tusi Paia: Faataoto 10:23.

Aʻoaʻo lau fanau ia ola i taʻiala ae lē o tulafono. E lē mafai ona e iloa mea e fai e lou alo i taimi uma. Peitaʻi o lou sini o se matua, e lē ina ia faasāsā naʻuā lau fanau ae ia fesoasoani iā i latou ia “faaaogā o latou mafaufau e iloa le mea saʻo ma le mea sesē.” (Eperu 5:14) O lea, nai lo le faia o ni tulafono ma faasalaga ma vala autū e aʻoaʻo ai, ia atiaʻe le auala e faaaogā ai le mafaufau i mea lelei. O le ā le ituaiga talaaga e manaʻo ai? O ā ituaiga uiga e manaʻo e iloa ai o ia? O lou sini, o le fesoasoani i lau fanau talavou ia faia ni filifiliga atamai, e tusa lava pe e te lē iai.​—Mataupu silisili o le Tusi Paia: Faataoto 3:21.

O le faaaogāina o le Initaneti, e tai pei o le aveina o se taavale, e manaʻomia ai le faautaga mamao ae e lē na o le iloa ave le taavale. E tāua tele lau taʻitaʻiga faamatua. Na taʻua e se tagata atamai i le faaaogāina ma le faaeteete o le Initaneti e faapea: “E sili atu le iloa o fanau i mea faatekinolosi faaonapōnei nai lo o mātua, ae e sili atu le tomai o mātua e faatatau i le olaga.”