Tausi Taimi

Aiseā e tāua ai le tausi taimi?

MĀFUAAGA E TĀUA AI

Ua iloa e nisi o le vave ona taunuu i se fuafuaga ua uma ona fai, e faaitiitia ai le popole. O le tausi taimi e atili ai foʻi ona lelei le talaaga o se tasi. I le ā le itu?

O le tausi taimi e faailoa atu ai lou agavaa. O lou tausi taimi e faaalia ai o loo mafai ona e puleaina lou olaga, nai lo o le faatagaina o isi mea e taofia ai oe mai le faia o mea e te manaʻo e fai.

O le tausi taimi e faailoa atu ai lou maufaatuatuaina. Ua tatou ola i se siʻomaga ua fai ma masani a tagata le lē tausisi i a latou folafolaga, ma o le tele o taimi e lē naunau e faataunuu fuafuaga ua uma ona fai. O lea, e talisapaia e tagata i latou e tausisi i a latou folafolaga. O tagata maufaatuatuaina e faaaloalogia e a latou uō ma aiga. E tāua i pule o galuega i latou e taunuu i taimi saʻo o galuega, ma ausia taimi ua uma ona faatulaga e māeʻa ai se galuega. E ono tauia foʻi i latou i se totogi telē, ma atili ai ona maufaatuatuaina i latou.

LE MANATU O LE TUSI PAIA

E iai mau o le Tusi Paia e fesootaʻi atu i le tausi taimi. O se faataʻitaʻiga ua faapea mai le Tusi Paia: “Ia faia mea uma i se tulaga talafeagai ma le maopoopo.” (1 Korinito 14:40) Pe a malilie ni tagata se toʻalua e feiloaʻi i se taimi ma se nofoaga patino, e lelei ma e talafeagai mo i laʻua ona feiloaʻi i le taimi ua faatulagaina. Ua taʻua foʻi i le Tusi Paia: “E iai le taimi e atofaina mo mea uma, e iai foʻi le taimi mo mea uma e tutupu i lalo o le lagi.” (Failauga 3:1) O loo faamatalaina i le siʻomaga o lenei fuaiupu e iai “le taimi e totō ai ma le taimi e liaʻiina ai mea na totō.” (Failauga 3:2) E totō e le faifaatoʻaga a latou meatotō i le taimi saʻo, ina ia maua mai ai ni fua e sili ona lelei. I nisi faaupuga, o le tausi taimi o le faifaatoʻaga e maua ai iʻuga lelei.

Ua faaalia i le Tusi Paia se māfuaaga e sili ona tāua ai le tausi taimi: E faaalia ai le faaaloalo mo isi ma le tāua o o latou taimi. (Filipi 2:3, 4) I se faaeseesega, o i latou e masani ona faifaiaga atonu o loo latou faamaʻimauina le taimi o isi.

“Ia vaavaai ma le naunau e lē gata i au lava mea, ae i mea foʻi e lelei ai isi.”​—Filipi 2:4.

O le ā e mafai ona e faia ina ia tausi taimi ai?

LE MANATU O LE TUSI PAIA

O loo faalaeiauina i tatou e le Tusi Paia ina ia fuafua mamao. (Faataoto 21:5) Pe afai e masani ona e tuai mo ni fuafuaga ua uma ona fai, atonu la ua pisi tele lau faasologa. Aiseā la e lē aveese ai mea e lē tāua ma mea e maʻimau ai le taimi? Ia lava lelei le taimi e faatulaga i le va o fuafuaga taʻitasi, ma taumafai ia vave ona taunuu. O le faia faapea e nofosauni ai mo ni tulaga lē maʻalofia e tulaʻi mai, e pei o le pisi o le auala po o le leaga o le tau.

Ua fautua mai foʻi le Tusi Paia ina ia faamaulalo. (Faataoto 11:2) O lona uiga o lou iloa lea o le mea e gata ai lou malosi. A o leʻi faia se fuafuaga, ia vaai muamua lau faasologa po o fetaui. O lou taumafai e fai ni mea se tele nai lo o mea e te gafatia, o le a faateleina ai le popole ma le lē fiafia e lē gata iā te oe ae faapea foʻi i isi!

Ua taʻua foʻi i le Tusi Paia ia faaaogā tatau o tatou taimi. (Efeso 5:15, 16) Ia faamuamua mea e sili ona tāua. (Filipi 1:10) O se faataʻitaʻiga, a o iai i luga o auala o femalagaaʻiga po o faatali foʻi mo se isi, ia faaaogā tatau lenā taimi e ala i le faitau o se tusi pe fuafua foʻi isi mea e fai i lenā aso.

“O fuafuaga a le tagata toʻaga e manuia ai o ia.”​—Faataoto 21:5.