O le a ʻTele le Filemu’ i le Pulega o le Malo o le Atua

Ua toeitiiti ona aumaia lea e le Malo o le Atua, o se faigāmalo na faavaeina e le Atua, le filemu ma le autasi i le lalolagi. Ua folafola mai e le Salamo 72:7 e faapea, “E tele foʻi le filemu” o le a iai. Ae o afea o le a amata pule ai le Malo o le Atua i le lalolagi atoa? E faapefea ona faataunuu e le Malo o le Atua lenā tulaga? E faapefea ona e maua aogā mai i lenā pulega?

O AFEA O LE A OO MAI AI LE MALO O LE ATUA?

Ua valoia mai i le Tusi Paia ni tulaga mataʻutia o le a tutupu e faailogaina ai ua toeitiiti ona oo mai lea o le Malo o le Atua. O le a aofia ai i lenā “faailoga,” taua i le lalolagi atoa, oge, faamaʻi, tele o mafuiʻe ma le faateleina o le amioleaga.—Mataio 24:3, 7, 12; Luka 21:11; Faaaliga 6:2-8.

O loo taʻua foʻi e se isi valoaga e faapea: “O aso e gata ai e oo mai ai aso e sili ona faigatā. Auā e avea tagata ma ē e alolofa iā i latou lava, o ē e mananaʻo tele i tupe, . . . o ē e lē usiusitaʻi i mātua, o ē e lē lotofaafetai, o ē e lē faamaoni, o ē e lē lotoaiga, o ē e mumusu i maliega, o ē e faia tala taufaaleaga, o ē e lē amio pulea, o ē e sauā, o ē e lē fiafia i mea lelei, . . . o ē ua faafefeteina i le faamaualuga, o ē e pupū i mea faafiafia nai lo o le alolofa i le Atua.” (2 Timoteo 3:1-4) Na iai lava ni tagata sa faaalia nei uiga, peitaʻi ua taatele i le taimi lenei.

Na amata ona faataunuuina na valoaga i le 1914. Ua ioe tusitala o le talafaasolopito, tagata aloaʻia, ma tusitala, ua matuā suia le lalolagi ina ua mavae lenā tausaga. O se faaaʻoaʻoga, ua taʻua e se tusitala Tenemaka o Peter Munch e faapea: “O le gāpā o le taua i le 1914 o se taililiu i le talafaasolopito. Ua amata ai se tupulaga o mala, le gatete i le mataʻu, feitagaʻi, faatasi ai ma le lē saogalemu i so o se mea, ua suia ai se olaga lelei na amata ona iai.”

I le isi itu pe a mavae atu nei mea uma, o le a iai se tulaga filemu i le lalolagi. Ua faailoa mai ai ua toeitiiti ona pule lea o le Malo i le lalolagi. O le mea moni, na faaaofia e Iesu se vala e lelei ai lenei faailoga o le iʻuga ina ua ia faapea mai: “O le a talaʻiina atu foʻi lenei tala lelei o le Malo i le lalolagi atoa e fai ma molimau i atunuu uma, ona oo mai ai lea o le iʻuga.”—Mataio 24:14.

O lenā tala lelei, o le manatu autū lenā o le feʻau a Molimau a Ieova. O le mea moni, ua faaulutalaina la latou lomiga autū i Le Olomatamata Faasilasilaina le Malo o Ieova. E masani ona talanoaina i Le Olomatamata mea matagofie o le a faia e le Malo o le Atua mo tagata ma le lalolagi.

O LE A FAAPEFEA ONA PULE LE MALO O LE ATUA?

O le tali i lenei fesili e aofia ai ni manatu moni se fa:

1. E lē faaaogāina e le Malo o le Atua taʻitaʻi o malo faapolotiki o lenei lalolagi.

2. O le a lē mananaʻo taʻitaʻi faapolotiki e aveesea lo latou tulaga pule ma latou teena ai le pulega o le Malo o le Atua.—Salamo 2:2-9.

3. O le a faaumatia e le Malo o le Atua malo faapolotiki ia e mananaʻo e pulea pea tagata. (Tanielu 2:44; Faaaliga 19:17-21) O lenei feteenaʻiga mulimuli i le lalolagi atoa ua taʻua o Amaketo.—Faaaliga 16:14, 16.

4. O i latou uma e lotomalilie e gauaʻi i le Malo o le Atua, o le a faasaoina mai iā Amaketo i se lalolagi fou filemu. O le a latou faia aʻe “se motu o tagata e toʻatele” lea o loo taʻua i le Tusi Paia, ma atonu e faitau miliona lo latou fuainumera.—Faaaliga 7:9, 10, 13, 14.

E FAAPEFEA ONA E MAUA AOGĀ MAI I LE MALO O LE ATUA?

O le auala muamua e avea ai ma tagatānuu o le Malo o le Atua, e manaʻomia ona aʻoaʻoina. Ua taʻua e Iesu i lana tatalo i le Atua e faapea: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.”—Ioane 17:3.

Pe afai e iloa lelei e tagata Ieova le Atua, o le a latou maua le tele o aogā. Mātau ni auala se lua: Muamua, o le a latou atiaʻe le faatuatua malosi iā te ia. O lenā faatuatua e faavae mai i faamaoniga e faatalitonuina ai i latou, o le Malo o le Atua o se mea moni ma ua toeitiiti ona oo mai lea o lenā pulega. (Eperu 11:1) Lona lua, e tuputupu aʻe ai lo latou alofa mo le Atua ma tuaoi. O le alofa i le Atua e uunaʻia ai i latou e usitaʻi iā te ia ma le lotomalie. O le alofa i tuaoi e uunaʻia ai i latou e faatatau upu a Iesu lea e masani ona taʻua o le Tulafono Faaauro. O loo faapea mai: “E pei ona outou mananaʻo e faia mai e tagata iā te outou, ia faapea lava ona outou faia iā i latou.”—Luka 6:31.

I le pei o se tamā alofa, e finagalo o ia ina ia tatou maua mea e sili ona lelei. E finagalo o ia ina ia tatou maua “le ola moni” lea o loo taʻua i le Tusi Paia. (1 Timoteo 6:19) O le olaga i aso nei e lē o se “ola moni.” Mo le toʻatele o tagata ua matuā faigatā o latou olaga. Ina ia faaāta le “ola moni,” ia mātau nisi o mea matagofie o le a faia e le Malo o le Atua mo ona tagata.