Soifua Mālōlōina i le Tino
O le Tusi Paia e lē o se tusi faafomaʻi. Peitaʻi, o loo iai mataupu silisili e fesoasoani iā i tatou ina ia iloa auala aogā e maua ai le soifua mālōlōina. Mātau nisi o na mataupu silisili.
IA TAUSI LELEI LOU TINO
MATAUPU SILISILI FAALE-TUSI PAIA: “E leai se tane e ita i lona lava tino; ae e na te fafaga ma faapelepele i ai.”—Efeso 5:29.
LE UIGA: O loo faalaeiauina i tatou e lenei mataupu silisili, ina ia faia le mea sili e tausia ai o tatou tino. Ua taʻua i se tasi suʻesuʻega o le tele o faafitauli i le soifua mālōlōina, e māfua ona o le auala e filifili le tagata e ola ai. O lea, o le faia o filifiliga saʻo e maua ai le soifua mālōlōina lelei.
MEA E MAFAI ONA E FAIA:
Taumafa Paleni. Ia pulea au meaʻai e ala i le ʻai i meaʻai paleni ma ia tele le vai e inuina.
Ia Faamalositino. O le faamalositino e mafai ona faaleleia ai lou soifua mālōlōina e ui i le tulaga matua, lē atoatoa le malosi o le tino po o le faatapulaa foʻi o mea e mafai ona fai ona o se maʻi faaumiumi. E ui lava e mafai ona aumai e o tatou aiga, uō faapea fomaʻi fautuaga ma faalaeiauga i le faamalositino, ae e tatau ona e faatinoina ina ia e maua ai aogā.
Ia Lava le Moe. O tagata e fai ma masani le lē lava o le moe e ono maua i se maʻi tigāina. O le māfuaaga, ona e latou te filifili e fai isi mea i le taimi e tatau ai ona momoe. O lea la, o le lava o le moe o le a maua ai le soifua mālōlōina lelei.
IA ʻALOFIA MASANIGA LEAGA
MATAUPU SILISILI FAALE-TUSI PAIA: “Seʻi o tatou faamamā ai iā i tatou mai i mea uma e faaleagaina ai le tino ma le agaga.”—2 Korinito 7:1.
LE UIGA: O le a tatou maua se soifua mālōlōina lelei, pe afai e tatou te ʻalofia mea e faaleagaina ai le tino e pei o le tapaa, lea ua avea ma pogai autū o faamaʻi ma le oti.
MEA E MAFAI ONA E FAIA: Ia faataatia se aso e tuu ai lau ulaula, ona maka lea i luga o lau kalena. A o leʻi oo i lenā aso, ia lafoaʻi sikareti, tā lefulefu, afi penisini, ma isi mea e fesootaʻi atu i lenā masaniga leaga. Ia ʻalofia nofoaga o loo iai isi e fiafia i lenei masaniga. Ia faailoa i au uō ma aiga lau filifiliga ina ia mafai ona latou fesoasoani iā te oe.
ISI MATAUPU SILISILI FAALE-TUSI PAIA
E mafai ona e maua se kopi o le Tusi Paia e ala i le faafesootaʻi o se tasi o Molimau a Ieova i lou vaipanoa
FAATĀUA LE SAOGALEMU.
“Afai e te fausia se fale fou, ia e fausia foʻi ma se puipui e siʻo ai le taualuga, neʻi e nofosala i le faamasaatoto pe afai e paʻū ai se tasi mai i lou fale.”—TEUTERONOME 22:8.
IA PULEA LOU ITA.
“O lē e telegese lona ita e tele lona faautaga loloto, a o lē e lē lava le onosaʻi e faaalia lona valea.”—FAATAOTO 14:29.
AUA LE SOONA ʻAI.
“Aua neʻi avea oe . . . o se tagata e soona ʻai tele.”—FAATAOTO 23:20.