SE LALOLAGI UA TUMU I FAAFITAULI

1 | Ia Puipuia Lou Soifua Mālōlōina

LE MĀFUAAGA E TĀUA AI

E eseese auala e aafia ai soifua mālōlōina o tagata ona o faafitauli.

E lagona e tagata le popole pe a tutupu tulaga faigatā, ma o le umi e popole ai e faigofie ai ona maua i maʻi.
O mala, e ono faafaigatā ai pe faaitiitia ai ona maua togafitiga ma vailaau faafomaʻi.
O mala, e aafia ai le tamaoaiga, ma lē lava ai le faasoa mo meaʻai paleni ma togafitiga faafomaʻi.

Mea e Tatau Ona E Iloa

O maʻi tugā ma le soona popole e ono aafia ai lou tomai e faia filifiliga lelei, lea e iʻu ai i le tuua o masaniga e lelei mo lou soifua mālōlōina.
Pe a lē togafitia faafitauli tau soifua mālōlōina, e ono faateteleina le leaga pe iʻu atu ai i le oti.
Pe a lelei lou soifua mālōlōina, o le a mafai ona e faia filifiliga lelei pe a tutupu faafitauli.
Po o le ā lava lou tulaga tau tamaoaiga, e iai mea e mafai ona e faia e puipuia ai lou soifua mālōlōina.

Mea e Mafai Ona E Faia i le Taimi Nei

O se tagata atamai e na te iloilo lamatiaga e ono tulaʻi mai, ma fai taumafaiga uma e ʻalofia ai. E faatatau atu foʻi lenei manatu i le soifua mālōlōina. O le tele o taimi e mafai ona faaitiitia le maua i se maʻi, pe a faatumauina le tumamā. E sili le puipuia i lo o le tautogafitia.

“O le faatumauina o le tumamā, ua faaitiitia ai tupe faaalu i fualaau ma le vaaia o le fomaʻi.”—Andreas.a

a Ua suia nisi igoa i lenei mekasini.

LE AUALA E FEAGAI AI—Fautuaga Aogā

Pe a feagai ma faafitauli, ia puipuia lou soifua mālōlōina i auala nei

FAATUMAUINA LE TUMAMĀ

Faatumauina le tumamā

Le manatu o le Tusi Paia: “O lē ua iai le utaga mamao e na te iloa atu le mala ma lafi ai.” (Faataoto 22:3) Ia taumafai e iloa tulaga e ono lamatia ai lou soifua mālōlōina ma ia ʻalofia.

Ia fai ma masani le fufulu mamā o lima i le vai ma le fasimoli aemaise a o leʻi tagofia se meaʻai ma pe a uma ona faaaogā le falelētaʻua.
Ia toʻaga e faamamā lou fale aemaise i vaega e masani ona paʻi i ai.
ʻAlofia le faalatalata i tagata o loo iai āuga o se faamaʻi pipisi.

TAUMAFA I MEAʻAI PALENI

Taumafa i meaai paleni

Le manatu o le Tusi Paia: “E leai se tane e ita i lona lava tino; ae e na te fafaga ma faapelepele i ai.” (Efeso 5:29) E tatou te faapelepele i o tatou tino, e ala i le faaeteete i mea e taumafa ai.

Ia toʻaga e inu le vai.
Ia taumafa i fualaau ʻaina ma fualaau faisua eseese.
Ia faaitiitia le ʻai i meaʻai e tele ai le gaʻo, masima ma le suka.
Aua le ulaula tapaa pe soona tagofia le ʻava malosi, aua foʻi le faaaogāina fualaau faasāina.

“Ina ia ʻalofia le maua i maʻi, e ma te aai i meaʻai paleni. Pe afai e leai, o le a tele ai tupe e ma te faaalu e vaai ai le fomaʻi ma faatau ai fualaau. E sili atu iā i maʻua le faaalu o le tupe e faatau ai meaʻai e lelei mo le soifua mālōlōina.”—Carlos.

IA FAAMALOSITINO MA LAVA LE MĀLŌLŌ

Faamalositino

Le manatu o le Tusi Paia: “E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.” (Failauga 4:6) E manaʻomia ona tatou faigaluega, ae e manaʻomia foʻi ona lava le mālōlō.

Ia toʻaga e faamalositino. E mafai ona amata e ala i le faaalu o sina taimi e savali ai. O le faagaoioi o le tino e mafai ona faaleleia ai lou soifua mālōlōina e tusa po ua e matua, iai ni aafiaga tumau o le tino, po o se maʻi tumau.
Ia lava le mālōlō

Ia lava le mālōlō. Pe a lē lava le mālōlō, e mafai ona faateteleina ai le popole ma lē uaʻi ai i se mea. Pe a fai ma masani le lē lava o le mālōlō, e mafai ona iʻu atu ai i faafitauli tau soifua mālōlōina.
Ia faatulaga se taimi e moe ma ala ai, ma ia tausisi i na taimi i aso taʻitasi.
Ia ʻalofia le matamata TV pe faaaogā se masini faaonapōnei i le taimi e moe ai.
ʻAlofia le ʻai i meaʻai mamafa, inu ʻava malosi po o isi meainu e iai le vailaau o le caffeine a o leʻi moe.

“Ua ou iloa e telē le aafiaga lelei o le lava o le mālōlōga i loʻu soifua mālōlōina. Pe a lē lava le mālōlō, o nisi taimi e tigā loʻu ulu ma loʻu tino. Ae pe a lava le mālōlō, ou te maua le malosi e faia so o se mea e manaʻomia ona ou faia. Ou te lagonaina le malosi, ma e seāseā ou maua i se maʻi.”—Justin.