Ia Faalautele Atu Lau Faauōga

Le Faafitauli

Pe afai e faaesea i tatou mai i ē tatou te manatu faatauvaa i ai, atonu e faamalosia ai lo tatou uiga faailoga tagata. Pe afai tatou te faauō na o tagata e pei o i tatou, e tatou te ono manatu ai, o le auala tatou te mafaufau ai, o tatou faalogona ma gaoioiga, e pau lea o le auala saʻo.

Mataupu Silisili Faale-Tusi Paia

“Ia faalautele atu o outou loto.”—2 KORINITO 6:13.

O le ā le uiga? E mafai ona faasino atu le “loto” i o tatou faalogona alofa. Pe afai tatou te alolofa na o tagata e pei o i tatou, o le a taofia ai i tatou mai le faalautele atu o o tatou loto. Ina ia ʻalofia lenā faafitauli, e tatau ona tatou lotomalilie e faauō atu i ē e ese mai iā i tatou.

Le Tāua o le Faalautele Atu o Lau Faauōga

Pe a tatou faamasani i isi, o le a tatou malamalama ai i le māfuaaga e ese ai le auala latou te faia ai mea. A o tatou atiaʻe le alofa mo i latou, o le a suia foʻi la tatou vaaiga iā i latou. O le a tatou faatāuaina i latou ma o le a tutusa ai o tatou faalogona.

Ia mātau le faaaʻoaʻoga a Nazaré. Sa iai le taimi na ia faailoga tagata ai iā i latou na siitia atu i le atunuu o loo nofo ai. Na ia faamatalaina le mea na fesoasoani iā te ia: “Na ou faaalu le taimi e faatasitasi ai ma galulue ma i latou. Na ou feiloaʻi i tagata na matuā ese o latou uiga mai i faamatalaga sa faia e faatatau iā i latou. Pe a e faauō i tagata e ese a latou aganuu, o le a e aʻoaʻoina ai le aua le muaʻi faamasinoina i latou ma o le a e atiaʻe ai le alofa ma e faatāuaina i latou.”

Mea e Mafai Ona E Faia

Saʻili avanoa e talanoa atu ai i tagata mai i isi atunuu, i isi ituaiga pe ese foʻi le gagana. E mafai ona e

Fesili i ai e faamatala mai se mea e faatatau iā i latou.
Valaaulia i latou e tou te faiʻaiga faatasi.
Faalogologo lelei i tala e faatatau i o latou olaga, ma vaai po o ā mea e latou te faatāuaina.

O lou taumafai e malamalama pe faapefea ona aafia o latou uiga ona o mea na tutupu iā i latou, e ono fesoasoani lea iā te oe e maua ai se vaaiga saʻo e faatatau iā i latou.

Se Mea Moni na Tupu: Kandasamy ma Sookammah (Kanata)

“Na ma feola aʻe i Aferika i Saute i le taimi na malosi ai le faailoga tagata. Sa faamalosia le nonofo eseese o ituaiga o tagata, lea na faaauiluma ai le faailoga tagata. E lē o i maʻua o ni tagata papaʻe, ma e ma te leʻi fiafia iā i latou ona o nisi na leaga le auala na latou feutagaʻi mai ai. I lenā taimi, e ma te leʻi mafaufau ua ma faailoga tagata, ae na ma manatu ua latou faailoga tagata mai.

Ina ia suia o ma manatu, na tausolomua ona ma faalautele atu o ma loto ma faauō atu i tagata mai i ituaiga eseese. A o amata ona matou faifaimea faatasi ma tagata papaʻe, na ma iloa ai e tele mea matou te tutusa ai. E tutusa mea na tutupu i o matou olaga ma faafitauli na matou fesagaʻia.

Na ma talimālō foʻi i se ulugalii papaʻe mo se taimi umi. Na ma masani lelei iā i laʻua. Na oo ina ma vaai iā i laʻua o ni a ma uō ma e tutusa i matou. O le iʻuga ua suia ai la ma vaaiga i tagata papaʻe.”