E Faapefea i le Faatekinolosi Ona Aafia ai Ou Mafaufauga?

E manaʻomia e tagata ona aʻoaʻoina le tele o mea mo le aʻoga, o galuega po o isi māfuaaga ma e fesoasoani le faatekinolosi e faia ai faapea. E leai se taimi i le talafaasolopito na faigofie ona maua ai faamatalaga e aunoa ma le tuua o lou fale, nai lo o le taimi nei.

E ui i lea, o le toʻatele ua tele ina faaaogāina le faatekinolosi ua latou iloa . . .

le faigatā ona uaʻi atu i se mea o loo faitau i ai.
le faigatā ona uaʻi i le faia o ni mea se lua i le taimi e tasi.
e vave ona lagona le tuua toʻatasi pe a na o ia.

MEA E TATAU ONA E ILOA

O se tamaʻitaʻi talavou o loo faia ni mea se tele i le taimi e tasi. O loo faia ana text, talanoa atu i sana uō i le initaneti ma faia ana suʻesuʻega.

FAITAU

O tagata e masani ona faaaogā masini faaonapōnei e lē onosaʻi e faitau se mataupu atoa, ae e na o le vave faitau i ai ina ia maua le manatu autū.

E aogā le vave o le faitau pe a manaʻo e vave maua se tali o se fesili. Peitaʻi, e lē o se auala lelei lea e faitau ai pe a e manaʻo e malamalama lelei i se mataupu.

IA MAFAUFAU I AI: O le ā le lelei o lau faitau pe a e faitauina se mataupu umī? Aiseā e sili atu ai lou aʻoaʻoina o se mea pe afai e te faitau ma le faaeteete i ai?—FAATAOTO 18:15.

UAʻI

Na taʻua e nisi tagata ua mafai e le faatekinolosi ona avatu iā i latou le tomai e faia ai ni mea se lua i le taimi e tasi, e pei o le text o au uō a o faia au suʻesuʻega. Peitaʻi, o le faia faapea o le a lē lelei ai le auala e faia ai na mea ma lē uaʻi ai i se mea se tasi.

E ui e faigatā le uaʻi ma ʻalofia le faalavelavea, ae e fesoasoani iā te oe e te aʻoaʻoina ai se mea. Na taʻua e se talavou e igoa iā Grace: “O le a faaitiitia ai lou faia o mea sesē ma lou popole. Ua ou iloa ai le tāua o le uaʻi atu i se mea se tasi i le taimi e tasi ma ʻalofia ai le faalavelavea i isi mea.”

IA MAFAUFAU I AI: Po o faafaigatā e le faatekinolosi ona e uaʻi ma manatua mea o loo e aʻoaʻoina?—FAATAOTO 17:24.

TUUA TOʻATASI

O nisi e lē mananaʻo e tuua toʻatasi, ma e latou te faaaogā le faatekinolosi e faafiafia ai i latou. Na taʻua e se fafine e igoa iā Olivia, “e lē mafai ona ou nofonofo i le 15 minute e aunoa ma le siakiina o laʻu telefoni, tablet pe ki foʻi le TV.”

E ui i lea, o i tatou uma lava e tusa pe talavou pe matutua, ina ia tatou aʻoaʻoina se mea, e manaʻomia se taimi na o i tatou ina ia manatunatu loloto ai.

IA MAFAUFAU I AI: Pe e te faaaogā taimi e na o oe ai e te manatunatu loloto ai?—1 TIMOTEO 4:15.

MEA E MAFAI ONA E FAIA

IA ILOILO LE AUALA O LOO E FAAAOGĀ AI LE FAATEKINOLOSI

O ā auala e ono fesoasoani ai le faatekinolosi i lou tomai e mafaufau ai? E faapefea ona faalavelavea ai lou tomai e uaʻi ma aʻoaʻoina ai se mea?

MATAUPU SILISILI FAALE-TUSI PAIA: “Ia e taofimau i le atamai aogā ma le mafaufau lelei.”—FAATAOTO 3:21.

IA FESILI IFO . . .

Po o faigatā iā te aʻu ona ou malamalama i mea o loo oʻu faitau i ai i se masini faaonapōnei? Afai o lea, o le ā le mea o faafaigatā ai?
O ā auala e mafai ona ou faia ina ia faaitiitia pe ʻalofia ai le faalavelavea?

Fesoasoani: Ia faataʻitaʻi ona faitau se palakalafa se tasi ona faasolosolo lea ona faitau ni palakalafa se tele. Ia faitau leotele ma i se leo mālū, ina ia e uaʻi atu ai i mea o loo e faitauina.

O ā fetuunaʻiga e manaʻomia ona ou faia ina ia maua ai le taimi e manatunatu ma faaāta mea o loo oʻu faitauina?

Fesoasoani: I le faaiʻuga o lau suʻesuʻega, ia faaaogā se sefulu minute e autalu ai mea na e aʻoaʻoina.

O ā taimi ou te taumafai ai e faia ni mea se lua i le taimi e tasi?
O ā fetuunaʻiga e mafai ona ou faia ina ia uaʻi atu ai i se mea se tasi i le taimi e tasi?

Fesoasoani: Pe a faia au suʻesuʻega, ia aveese so o se mea e faalavelavea ai.

MATAUPU SILISILI FAALE-TUSI PAIA: “Ia maua le atamai, ia maua foʻi le malamalama.”—FAATAOTO 4:5.