O Mea e Lē Iloa e Saienitisi

E toetoe o le vateatea atoa ua suʻesuʻeina e saienitisi. Peitaʻi, o loo iai pea fesili tāua e lē o mafai ona latou taliina.

Pe e mafai e saienitisi ona faamatala le amataga o le vateatea ma le ola? O le tali faigofie o le leai. Ua faapea mai nisi, e mafai e saienitisi e suʻesuʻeina le vateatea ona faamatalaina le amataga o le vateatea. Peitaʻi, ua faapea mai Marcelo Gleiser o se polofesa i Dartmouth College, ma e lē mautinoa pe e iai se Atua: “E leʻi mafai ona matou faamatalaina le amataga o le vateatea.”

Ua faapea mai foʻi se mataupu i se mekasini o le Science News e faatatau i le amataga o le ola: “Atonu e lē mafai ona iloa le amataga o le ola i le lalolagi. Ua lē o toe iai le tele o maa ma toega o mea e faailoa mai ai le mea na tupu i le amataga o le lalolagi.” Ua tatou iloa mai i nei faamatalaga e lē o mafai e le faasaienisi ona taliina le fesili, O le ā le amataga o le vateatea ma le ola?

Atonu e te taumānatu, afai e iai se amataga o le ola, o ai la na foafoaina? Pe atonu na e taumānatu foʻi i fesili nei: ʻAfai e iai Sē e atamai ma alofa na foafoaina mea, aiseā ua ia faataga ai tagata e mafatia? Aiseā ua ia faataga ai le tele o tapuaʻiga eseese? Aiseā ua ia faataga ai ona tagata tapuaʻi e faia mea leaga?’

E lē mafai e le faasaienisi ona taliina na fesili. Peitaʻi, e lē faapea ai o le a e lē maua ni tali faamalieina i na fesili. E toʻatele tagata ua latou mauaina tali o na fesili i le Tusi Paia.

Pe afai e te fia iloa pe aiseā ua suʻesuʻe ai e nisi saienitisi le Tusi Paia ma talitonu ai e iai Sē na foafoaina mea, tagaʻi i le jw.org. Saʻili le faasologa o vitiō, Manatu e Faatatau i le Amataga o le Ola.

Faamaoniga mai i le faasaienisi ma le Tusi Paia

Georgiy N. Koidan, se saienitisi e suʻesuʻeina vailaau

“O laʻu galuega e aofia ai le tuufaatasia o vailaau eseese. E manaʻomia ai ni gaoioiga faaeteete. Afai e iai se gaoioiga e sesē, o le a faalēaogāina ai le galuega atoa. E ui e faigatā laʻu galuega, ae e faatauvaa pe a faatusatusa atu i le galuega e faia e se sela o le tuufaatasia o vailaau. O le māfuaaga lea ou te talitonu ai e iai Sē na foafoaina mea.

“Ina ua ou suʻesuʻeina le Tusi Paia, na ou iloa ai e ese mai lava i isi tusi. Na māeʻa ona tusia le Tusi Paia i le pe ā ma le 2,000 tausaga ua mavae, ae ou te talitonu o loo aogā pea fautuaga o loo iai i aso nei. Mo se faataʻitaʻiga, o le faaleleia o feeseeseaʻiga i totonu o le aiga, o galuega ma tuaoi. Na ou iloa ai o nei fautuaga lelei na aumai i se tasi e sili atu nai lo o tagata.”

Yan-Der Hsuuw, se saienitisi e suʻesuʻeina le faatoʻa afuafua o se pepe

“Pe a afuafua se pepe, e galulue faatasi sela ina ia suia nisi sela e avea ma neula, musele, ponaivi, toto ma isi mea manaʻomia ina ia afuafua ai. E tatou te lē o malamalama atoatoa pe faapefea ona afuafua se pepe mai i nei sela. Ou te manatu la, e iai sē e atamai na foafoaina le ola.

“O le auala e afuafua ai se pepe i totonu o le manava o se tinā lea o loo faamatalaina i le Salamo 139:15, 16, e tutusa ma le mea ua iloa e saienitisi i le faitau sefulu tausaga ua mavae. Na faapefea ona faamauina ma le saʻo aʻiaʻi i le Tusi Paia le auala e afuafua ai se pepe i le tele o tausaga ua mavae? E mautinoa na faailoa mai e Lē na foafoaina mea.”

Maimoa i le vitiō Rocío Picado Herrero: A Chemistry Teacher Explains Her Faith, i le jw.org.