AUALA E FEAGAI AI MA LE TAUGATĀ O LE SOIFUAGA
Ia Faamasani i le Tulaga ua Iai
E seāseā o tatou mātauina le faasolosolo ona siitia o tau o oloa, aemaise pe afai o loo siitia o tatou totogi. Ae e oo iā i tatou faalogona popole, pe a faafuaseʻi ona siitia tau o oloa ae e lē siitia o tatou totogi, aemaise pe afai o loo tatou tausia se aiga.
Ua faasolo ina taugatā le soifuaga, ma e lē mafai ona tatou suia lenā tulaga. Peitaʻi, e tele aogā e tatou te maua pe a tatou faamasani i le tulaga ua iai.
LE MĀFUAAGA E TĀUA AI
O tagata e amanaʻia le mea moni o loo faasolo ina taugatā le soifuaga . . .
e latou te lagona le toʻafilemu. Pe a tatou toʻafilemu, e mafai ona tatou mafaufau lelei ma faia filifiliga lelei.
e latou te ʻalofia gaoioiga lē atamai. O se faataʻitaʻiga, o se gaoioiga lē atamai le lē totogiina o pili po o le soona faaalu o tupe.
e latou te lē finau i tupe ma tagata o o latou aiga.
e latou te iloa faasoasoa lelei tupe ma faatau na o mea e manaʻomia moni.
MEA E MAFAI ONA E FAIA
Ia lotomalie e fetuutuunaʻi. O se faiga atamai le faaitiitia o tupe faaalu aemaise i taimi e faafuaseʻi ai ona siitia tau o oloa. O le taumafai e ola pea i se olaga taugatā e ui i le utiuti o le faasoa, e tai pei o se tagata o loo taumafai e aau agaʻi i se vaitafe o loo tatafe malosi. O le a iʻu ina matuā vaivai ai o ia. Pe afai o loo e tausia se aiga, o se faalogona masani le popole po o le a faapefea ona tausia i latou. Ae ia manatua, e sili atu ona tāua i lou aiga lou faifaimea faatasi ma i latou ma lou naunau alofa iā i latou.
O le taumafai e ola pea i se olaga taugatā e ui i le utiuti o le faasoa, e tai pei o se tagata o loo taumafai e aau agaʻi i se vaitafe o loo tatafe malosi