Taugatā le Soifuaga i le Lalolagi Aoao—O le ā se Manatu o le Tusi Paia?

I se lipoti iā Iuni 2022, na lapataʻi mai ai le peresitene o le World Bank Group e faapea: “Ua toe faalētonu foʻi le tulaga tau tamaoaiga i le lalolagi aoao. Ua matuā taugatā le soifuaga i le taimi lenei, ae i le taimi e tasi ua matuā laʻitiiti le tupe maua.”

Ua faapea mai le International Monetary Fund, “Ua matuaʻi vave le siitia o tau o meaʻai ma le penisini, ma ua sili ona aafia ai tagata matitiva i atunuu e vaivai le tamaoaiga.”

Ua fesoasoani mai le Tusi Paia iā i tatou, ina ia iloa le māfuaaga ua tatou fesagaʻia ai faafitauli tau tamaoaiga, o le auala e onosaia ai, ma le faamoemoe mo se vaifofō e tumau.

Taugatā le soifuaga i “aso e gata ai”

• O loo taʻua i le Tusi Paia aso o loo tatou ola ai, o “aso e gata ai.”—2 Timoteo 3:1.

• Na fetalai Iesu o le a mātaulia lenei vaitaimi i “vaaiga e matataʻu ai.” (Luka 21:11) O le siitia o le tau o le soifuaga, ua faapogaia ai le matataʻu po o le popole o tagata. Ua popole tagata e faatatau i lo latou lumanaʻi ma le tausia o o latou aiga.

• Na valoia i le tusi o Faaaliga le taugatā o le tau o meaʻai i lenei vaitaimi. “Ona ou faalogo lea i se leo. . . . ua faapea atu: ʻO le tau o le kilokalama o saito po o kilokalama e tolu o karite, e tutusa lea ma le totogi o le tagata faigaluega i le aso.’”—Faaaliga 6:6, Easy-to-Read Version.

Mo nisi faamatalaga e faatatau i “aso e gata ai” ma le valoaga i le tusi o Faaaliga, maimoa i le vitiō Ua Suia le Lalolagi Talu Mai le 1914 pe faitau i le mataupu “Tagata Tiʻetiʻe Solofanua e Toʻafā—O Ai i Latou?”

Le vaifofō i faafitauli tau tamaoaiga uma

• “O le a latou fausia fale ma nonofo ai; e latou te totō foʻi togāvine ma latou aai i ona fua. O le a latou lē fausia ae e nonofo ai isi; o le a latou lē totō ae e aai ai isi.”—Isaia 65:21, 22.

• “O le a tele saito i le laueleele; o le a fau ma soloi i tumutumu o mauga.”—Salamo 72:16.

• “ʻOna o le faileagaina o ē ua mafatia, ma ona o le mapuitigā foʻi o ē ua matitiva, o le a ou tulaʻi ai nei,’ ua fetalai mai ai Ieova.”—Salamo 12:5.a

Ua toeitiiti lava ona faamutaina lea e le Atua o faiga lē tonu ua faapogaia ai faafitauli tau tamaoaiga i le lalolagi aoao. Ina ia iloa le auala o le a faia ai faapea e le Atua, faitau i le mataupu “Pe e Mafai Ona Foʻia Faafitauli Tau Tamaoaiga?”

E mafai foʻi ona fesoasoani le Tusi Paia iā te oe e feagai ma le siitia o le tau o le soifuaga i aso nei. E faapefea? O loo i le Tusi Paia fautuaga aogā i le auala e faaaogā tatau ai tupe. (Faataoto 23:4, 5; Failauga 7:12) Mo nisi faamatalaga atili, faitau i le mataupu “Ia Puipuia le Tausiga Faaletino” ma “Le Auala e Feagai ai ma le Utiuti o Tupe Maua.”