Amata se Olaga Faigatā

I FAFO o le faatoaga o Etena, sa tele ni faafitauli o Atamu ma Eva. Sa galulue mamafa i laua mo a la mea ai. Na i lo laau fua lelei sa la vaaia le tele o laau tuitui ma laau talatala. O le mea lena sa tupu ina ua le usiusitai Atamu ma Eva i le Atua ma taofia ai le avea o i laua ma Ana uo.

A e leaga atu i lo lena, ua amata nei ona oti Atamu ma Eva. Ia manatua sa lapataia i laua e le Atua la te oti pe afai e aai i fua mai i se laau faapitoa. Ia, o le aso lava sa aai ai sa amata loa ona la feoti. Paga le valea o lo la lē faalogo i le Atua!

O fanau a Atamu ma Eva sa fananau uma ina ua uma ona tuueseina mai e le Atua o latou matua i fafo i le faatoaga i Etena. O lona uiga la e ola matutua foi fanau ma feoti.

Ana fai sa usiusitai pea Atamu ma Eva i le Atua, o le olaga o le a fiafia tele mo i laua ma a la fanau. E ono mafai ona ola e faavavau ma le fiafia i le lalolagi. E leai se tasi o le a ola matua, maʻi ma oti.

E finagalo le Atua ia ola fiafia e faavavau tagata, ma ua tauto mai Ia o se isi aso o le a latou faapena ai. E le gata o le a manaia le lalolagi, ae o tagata uma o le a malolosi. Ma o le a lelei le faiga uo a tagata uma ma faapena foi ma le Atua.

Ae ua le toe avea nei Eva ma uo a le Atua. Sa ia fanaua ni tamaiti, ae sa le faigofie mo ia. Sa iā te ia le tiga. O lona le usiusitai i le Atua sa aumaia ai le tele o faanoanoaga iā te ia, pe e te le ioe i ai?

Sa toatele atalii ma afafine o Atamu ma Eva. O lo la uluai atalii o Kaino. Sa faaigoa lo la atalii lona lua i a Apelu. O le ā sa tupu i a i laua? Pe e te iloaina?