Na Lē Usiusitaʻi Atamu ma Eva i le Atua

I se tasi aso a o iai na o Eva, na faapea atu se gata iā te ia: ʻPe e moni na faapea atu le Atua e lē mafai ona lua aai i laau uma?’ Na tali atu Eva: ʻE mafai ona ma aai i laau uma, ae e iai le laau e tasi e aua ma te aai ai. Pe afai e ma te aai i le fua o lenā laau, o le a ma feoti.’ Ua fai atu le gata: ʻE lua te lē feoti. Pe a lua aai i le fua o lenā laau, ona pei ai lea o oulua o le Atua.’ Pe e saʻo lenā tala? E leai, e pepelo. Ae na talitonu i ai Eva. O le umi na tilotilo ai Eva i le fua o le laau, o le tele foʻi lenā o lona manaʻo i ai. Na ʻai e Eva le fua o le laau ma avatu iā Atamu. Na iloa e Atamu o le a la feoti pe afai e la te lē usiusitaʻi i le Atua. Ae na ʻai lava e Atamu le fua o le laau.

Ina ua oo i le afiafi, na fesili atu Ieova iā Atamu ma Eva, i le māfuaaga ua la lē usiusitaʻi ai iā te ia. Na tali mai Eva o le gata le māfuaaga, ae faapea mai Atamu o Eva na māfua ai. O lo la lē usiusitaʻi iā Ieova, na tuliese ai e Ieova i laʻua mai i le faatoʻaga o Etena. Ina ia faamautinoa e la te lē toe ō atu i totonu o le faatoʻaga, na tuu ai e Ieova ni agelu ma se pelu afi mumū i le pito e ulu atu ai i totonu o le faatoʻaga.

Na faapea atu Ieova o le a faasala foʻi lē na pepelo iā Eva. O le mea moni, e lē o le gata na tautala atu iā Eva, auā e leʻi faia e Ieova gata ina ia tautatala. Ae o se agelu leaga, lea na ia faaaogā le gata e tautala atu ai ina ia faasesē ai Eva. O lenā agelu leaga e igoa iā Satani le Tiapolo. I le lumanaʻi, o le a faaumatia ai e Ieova Satani, ina ia lē mafai ai ona ia toe faasesēina tagata e faia mea leaga.