Faia e Noa se Vaa

O NOA sa i ai lana avā ma atalii e toatolu. O igoa o ona atalii o Semu, Hamo ma Iafeta. Sa i ai ni avā a nei tama uma. E toavalu la tagata o le aiga o Noa.

Sa fai atu le Atua i a Noa na te faia se mea uiga ese. Sa taʻu atu i ai na te faia se vaa telē. O lenei mea e pei o se vaa telē, ae foliga mai e pei o se pusa umī lapoa. ‘Fai ia tolu ni fogāfale,’ fai mai ai le Atua, ‘ma tuu i ai ni potu.’ O potu mo Noa ma lona aiga, mea ola ma mea ai mo i latou uma.

Sa fai atu foi le Atua e fau ia aua neʻi sao i ai se vai i totonu. Sa ia fai atu foi: ‘O le a ou faatupuina se lolo tele ma faaumatia ai le lalolagi atoa. O tagata uma e le i ai i totonu o le vaa o le a feoti.’

Sa usitai Noa ma ona atalii i a Ieova ma amata loa le galuega. Ae na ona toē mai i ai isi tagata. Sa faaauau pea ona leaga i latou. Sa leai se isi na talitonu i a Noa ina ua ia taʻu atu le mea o le a faia e le Atua.

Sa umi se taimi na fausia ai le vaa talu ai e telē tele. Ina ua mavae le tele o tausaga ona maeʻa ai lea. Sa taʻu atu e le Atua i a Noa e aumai loa mea ola i le vaa. Sa fai atu le Atua ia aumai taʻi lua mai le ituaiga, o mea ola poʻa ma mea ola fafine. Ae o isi ituaiga o mea ola, sa fai atu le Atua e aumai taʻi fitu. Sa fai atu foi le Atua i a Noa e aumai ituaiga eseese o manu felelei. Sa faia e Noa mea uma na fai atu ai le Atua.

Mulimuli ane, ona o lea o Noa ma lona aiga i le vaa. Ona tapunia lea e le Atua le faitotoa. Sa faatalitali Noa ma lona aiga i totonu. Pe o le a i ai moni lava se lolo e pei ona sa fai mai ai le Atua?