Faapefea Ona Faasaoina le Pepe o Mose

SEI VAAI i le pepe lena e tagi ma tago atu i le lima tusi o le tamaitai. O Mose lena. Pe e te iloa o ai lena tamaitai aulelei? O ia o se alo tamaitai i Aikupito, o le afafine o Farao.

Sa faalafi e le tinā o Mose lana pepe seia atoa le tolu o ona masina, auā sa ia le manao ia fasiotia o ia e tagata Aikupito. Peitai sa ia iloa e iʻu ina maua Mose, o le mea la lenei sa ia faia ia faasaoina ai o ia.

Na ia ave se ato ma fai faalelei ina neʻi sao i ai se vai. Ona ia tuuina lea i ai o Mose, ma tuu le ato i vao uumi i le Vaitafe o le Naila. Sa faatonuina Miriama le tuafafine o Mose, ia tu ai i tafatafa ma vaai po o le ā o le a tupu.

Ona sau lea o le afafine o Farao i le Vaitafe o le Naila e taele ai. Na faafuasei ona ia iloa se ato, ona ia valaau lea i lana auauna teine: ‘Alu e aumai le ato mo aʻu.’ Ina ua tatala e le alo tamaitai le ato, sa ia vaaia ai se pepe aulelei tele! Sa tagi si tamai Mose, ma sa faanoanoa le alo tamaitai ona o ia. Sa ia le manao ia fasiotia o ia.

Ona sau loa lea o Miriama. E mafai ona e iloa atu o ia i le ata. Sa fesili Miriama i le afafine o Farao: ‘Pe ou te alu atu ea ma fai i se fafine Isaraelu na te tausia le pepe mo oe?’

Sa fai atu le alo tamaitai: ‘Ioe, faamolemole, ia faia.’

Ona faavave lea o Miriama i lona tinā. Ina ua taunuu mai le tinā o Mose i le alo tamaitai, sa fai atu o ia: ‘Ave le pepe ma tausi mo aʻu, ma o le a ou totogi iā te oe.’

Na toe tausia lava e le tinā o Mose lana tama. Ma ina ua matua Mose, ona ia ave lea o ia i le afafine o Farao, o lē na faatamafaiina o ia e pei o lana lava tama. O le auala lena na ola aʻe ai Mose i le fale o Farao.