Tamaʻi Povi Auro

OI, AUE! O le ā ua faia nei e tagata? Ua latou tatalo nei i se tamai povi! Aiseā?

Ina ua umi ona alu Mose, sa faapea ifo loa tagata: ‘Ua le iloa po o le ā le mea ua tupu i a Mose. Sei fai so tatou atua na te taʻitaʻiina ese i tatou mai lenei laueleele.’

‘Ua lelei. Aveese o outou tautaliga auro ma aumai i a te au.’ O le tala lea a Arona le uso o Mose. Sa ia faamataaina loa ma fai ai le povi auro. Ona faapea mai lea o tagata: ‘O lo tatou Atua lenei, sa ia taʻitaʻiina mai i tatou mai Aikupito!’ Ona fai ai lea e Isaraelu se fiafia tele, ma tapuai atu i ai.

Ona ita ai lea o Ieova, ma faapea atu i a Mose: ‘Faavave ma e alu ifo i lalo. Ua leaga tele mea o loo faia e tagata. Ua galo ia i latou aʻu tulafono ma ua latou ifo atu nei i le tamai povi auro.’

Ua faavave atu nei Mose i lalo o le mauga. Ma sa ia vaaia ai ua pepese ma sisiva tagata faataamilo i le tamai povi auro! Ua ita tele Mose ma sa ia togia loa i lalo papa maa e lua ua i ai tulafono, ma sa nutililii i vaega e tele. Ona ia faamataaina lea o le tamai povi auro ma oloina e fai ma pauta.

Ua faia e tagata se mea leaga tele. Ona fai atu lea o Mose i isi tamaloloa: ‘O tagata leaga o e na tapuai i le tamai povi auro e tatau ona feoti.’ Ona fafasi lea e tamaloloa o tagata e 3,000! Pe e le faaalia ai i lenei mea le manaomia ona tatou faaeteete e tapuai tau o Ieova, ae le o isi atua sese?