Tagata Matamata e 12

VAAI atu i fualaau o loo amo e na tamaloloa. Sei vaai i le lapoa o lena taufuifui vine. E manaomia ni tagata e toalua la te amoina i le amo. Ma vaai atu i mati ma rimoni. O fea sa aumai ai na fualaau aina mananaia? E mai le atunuu a Kanana. Manatua, o Kanana sa nonofo ai Aperaamo, Isaako ma Iakopo. Ae talu ai ona a le oge i ina, sa o atu loa Iakopo ma lana aiga i Aikupito. E tusa ma le 216 tausaga mulimuli ane ai, ona taʻitaʻiina lea e Mose Isaraelu e toe foi i Kanana. Ua oo atu nei i latou i le nofoaga e igoa a Katesa.

Sa mau tagata leaga i le atunuu a Kanana. O lea na aauina atu e Mose ni tagata matamata e 12 ma fai atu i ai: ‘Ia sue mai pe toafia e o nonofo i ina, ma pe malolosi foi i latou. Saili pe lelei lona eleele mo mea tōtō. Ma ia mautinoa ia outou aumaia nisi o ona fua.’

Ina ua foi mai tagata matamata i Katesa, sa latou fai atu i a Mose: ‘O se atunuu manaia tele.’ Sa faamaonia i fua na faaali i a Mose. Ae peitai o tagata matamata e toa 10 sa latou fai atu. ‘O tagata o loo mau ai e ese le malolosi ma toe lapopoa. O le a fasiotia i tatou pe a tatou taumafai e faoa le atunuu.’

Sa fefefe Isaraelu ina ua faalogo atu i ai. ‘E sili pe ana matou feoti i Aikupito pe o i inei foi i le vaomatua,’ o a latou upu ia. ‘O le a fasiotia i matou i le taua, ma pueina a matou avā ma fanau. Sei o tatou toe filifili so tatou taʻitaʻi fou e sui i a Mose, ma tatou toe fai i Aikupito!’

Ae sa faatuatua tagata matamata e toalua i a Ieova, ma taumafai e faafilemu tagata. O la igoa a Iosua ma Kalepo. Sa laua faapea mai: ‘Aua tou te fefefe. O loo faatasi mai Ieova. O le a faigofie ona maua le atunuu.’ Ae sa lei faalogo tagata. Sa mananao foi e fasioti i a Iosua ma Kalepo.

Sa ita tele Ieova i lena mea, ma fai atu i a Mose: ‘E leai se isi mai le 20 tausaga agai i luga o le a oo atu i le atunuu o Kanana. Sa latou vaai i vavega na ou faia i Aikupito ma i le vaomatua, ae latou te le talitonu mai lava i a te au. O le a latou taamilomilo i le vaomatua ma le 40 tausaga seia oo ina oti le toe tagata. Na o Iosua lava ma Kalepo e oo atu i le laueleele o Kanana.’