Avea Iosua ma Taʻitaʻi

NA MANAO Mose e o atu i Kanana ma Isaraelu. Ona ia fesili atu lea: ‘Ia e tuu mai i a te au ia ou sopoia le Vaitafe o le Ioritana, Ieova e, ma ou matamata i mea lelei i le laueleele.’ Ae na fetalai mai Ieova: ‘E leai! Aua e te toe fai mai i lena mea!’ Pe e te iloa ai se ā?

Talu ai ona o mea sa tupu ina ua tāina e Mose le papa. Manatua sa le taulau ona la faapaiaina ma Arona i a Ieova. Sa laua le taʻuina atu i tagata o Ieova sa aumaia le vai mai le papa. O le mafuaaga lena na fai atu ai Ieova la te le oo i totonu o Kanana.

O lea, i ni nai masina talu ona mavae le oti o Arona, sa tulei ai Ieova i a Mose: ‘Ia ave Iosua, ma faatu i luma o Eleasaro le faitaulaga ma tagata. Ma i luma o tagata uma lava, ia taʻu atu i ai o Iosua le taʻitaʻi fou.’ Sa faia e Mose mea uma, e pei ona e vaai atu i ai i le ata.

Ona fai atu lea o Ieova i a Iosua: ‘Ia e loto toa, ma aua le fefe. O le a e taʻitaʻiina Isaraelu i le atunuu o Kanana sa ou tauto ai mo i latou, ma o le a ou i ai pea ma oe.’

Mulimuli ane sa tulei Ieova i a Mose e alu aʻe i le tumutumu o le Mauga o Nepo i Moapi. Ua mafai ai e Mose ona vaavaai atu i le Vaitafe o Ioritana ma iloa atu ai le atunuu matagofie o Kanana. Ona tulei atu lea o Ieova: ‘O le atunuu lenei na ou tauto ai e avatu mo le fanau a Aperaamo, Isaako ma Iakopo. Ua tuuina atu e te vaai i ai, ae e te le alu atu i ai.’

O i ina i le tumutumu o le Mauga o Nepo na oti ai Mose. Sa 120 tausaga lona matua. Na malosi pea o ia, ma sa lelei foi lana vaai. Ua faanoanoa tele ma fetagisi tagata talu ai ua oti Mose. Ae ua fiafia foi e fai Iosua ma o latou taʻitaʻi fou.