Tautala se Asini

PE NA e faalogo i se asini e tautala? ‘Leai,’ atonu o lau tali lena. ‘E le mafai ona tautala mea ola.’ Peitai ua taʻu mai e le Tusi Paia se asini na tautala. Sei vaai pe na faapefea ona tupu.

Ua toe itiiti lava sauni Isaraelu e o atu i totonu o le laueleele o Kanana. Ua fefe Palako, le tupu o Moapi i a Isaraelu. O lea sa ia aami ai le tagata poto e igoa i a Palaamo e sau e fetuu i a Isaraelu. Na tauto Palako na te avea ni tupe se tele i a Palaamo, o lea na tietie loa Palaamo i lana asini ma alu atu i a Palako.

Sa lei manao Ieova e fetuu Palaamo i ona tagata. O lea na ia auina atu ai le agelu ma le pelu umi e tu i le ala e taofi i a Palaamo. E le mafai e Palaamo ona iloaina le agelu, ae sa iloa e lana asini. Sa taumafai le asini e alo ese mai le agelu, ma na oo ai ina taoto i lalo i le auala. Ua ita tele Palaamo, ma sa ia sasaina loa lana asini i le laau.

Ona faatautala ai lea e Ieova le asini a o faalogo Palaamo. ‘⁠O le a laʻu mea ua fai iā te oe ua e sasaina ai aʻu?’ o le fesili lea a le asini.

‘Ua e faia se mea e foliga ai aʻu o se vale,’ o le tala lea a Palaamo. ‘Ana i ai saʻu pelu ua ou fasimateina oe!’

‘Pe sa ou faia faapea muamua iā te oe?’ sa fesili ai le asini.

‘Leai,’ o le tali atu lea a Palaamo.

Ona faavaaia ai lea e Ieova o Palaamo i le agelu o loo tu i le auala ma le pelu. Ona faapea mai ai lea o le agelu: ‘Aiseā ua e sasaina ai lau asini? Ua ou sau e taofi lou ala, auā e le tatau ona e alu e fetuu i a Isaraelu. Ana le faliu ese lau asini mai i a te aʻu, se manū ua ou taina oe ia e oti, ae ou te le faamanuaina lau asini.’

Sa fai atu Palaamo: ‘Ua ou agasala. Ou te lei iloaina o loo e tu mai i le ala.’ Sa tuu atu e le agelu Palaamo e alu e vaai Palako. Ua taumafai pea ia e fetuu i a Isaraelu, ae peitai, na faia e Ieova ina ia faamanuia atu e ia Isaraelu faatolu.