Sau Iesu o se Tupu

INA UA mavae le faamaloloina o tagata tauaso e toalua, ona oo mai lea o Iesu i se nuu laitiiti i tafatafa o Ierusalema. Na ia fai atu i ona soo e toalua: ‘Ia o i totonu o le nuu ma o le a lua maua ai se tamai asini. Tatala ma aumai i a te au.’

Ina ua aumaia le asini, ona tietie ai loa lea o Iesu. Ona ia tietie lea e le mamao tele i Ierusalema. Ina ua ia latalata atu i le aai, sa o mai tagata e toatele e faafetaiai ma ia. O le toatele o i latou na talai o latou ofu talaloa ma fofola i luga o le ala. O isi na tata mai lala o le pama. Na latou tuu na mea i luga o le ala, ma latou alalaga: ‘Ia faamanuia le Atua i le tupu o lē afio mai i le suafa o Ieova!’

I aso ua leva i Isaraelu e tietie tupu fou i se tamai asini e faaalia atu ai i latou i tagata. O le mea lena o loo faia e Iesu. Ma o tagata nei o loo faaalia latou te mananao ia fai Iesu ma o latou tupu. A e le mananao tagata uma iā te ia. E mafai ona tatou iloa pe a tatou vaai i mea na tutupu ina ua alu Iesu i le malumalu.

I le malumalu e faamalolo ai e Iesu tagata tauaso ma pipili. Ina ua vaaia e tamaiti lenei mea, na latou valaau atu viiga i a Iesu. Ae na ita ai le au faitaulaga, ma latou fai i a Iesu: ‘Pe o e faalogo i upu o loo fai mai ai tamaiti?’

‘Ioe,’ o le tali lea a Iesu. ‘Pe tou te lei faitau ea i le Tusi Paia o faapea mai: “E aumaia e le Atua viiga mai gutu o tamaiti?” O lea na faaauau pea ona vivii tamaiti i le tupu a le Atua.

Tatou te mananao ia tatou pei o na tamaiti, a ea? O nisi tagata e taumafai e taofia i tatou mai le tautala e uiga i le malo o le Atua. Ae o le a tatou faaauau pea ona taʻu atu i isi mea matagofie o le a faia e Iesu mo tagata.

E le o le taimi lea e pule ai Iesu o se tupu a o i ai o ia i le lalolagi. O afea e oo mai ai lena taimi? Na fia iloa e soo o Iesu. O le a tatou faitau nei i ai.