Sopo‘ia le Vaitafe o Ioritana

VAAI! ua sopoiaina e Isaraelu Le Vaitafe o Ioritana! Ae o fea o i ai le suavai? Auā o le tele o timuga e maligi i lena vaitaimi o le tausaga, sa tumu le vaitafe i ni nai minute lava ua mavae atu. Ae ua matutu nei! Ma ua ui atu Isaraelu i le eleele matutu e pei ona i ai i le Sami Ulaula! O fea ua alu uma i ai le vai? Sei o tatou vaai.

Ina ua oo mai le taimi e sopoia ai e Isaraelu le Vaitafe o Ioritana, ona tulei atu lea o Ieova i a Iosua e fai atu i tagata: ‘E tatau ona aveina e le au ositaulaga le atolaau o le feagaiga ma muamua atu i a i tatou. A papai atu loa o latou vae i vai o le vaitafe, o le a le toe tafe loa le vai.’

Ona amoina loa lea e le au ositaulaga le atolaau o le feagaiga, ma muamua atu i luma. Ina ua oo atu i le Ioritana, sa o atu loa le au ositaulaga ma laasia le vai. O loo tafe malosi nei toe loloto. Ae ina ua papai atu o latou vae i le vai, sa amata loa ona le toe tafe! O se vavega! Ua faatoa e Ieova suavai i le mea na tafe mai ai. Ma e lei umi lava a e le toe i ai loa ni vai i le vaitafe!

Ua o atu i le ogatotonu o le vaitafe matutu le au ositaulaga o loo tauaveina le atolaau o le feagaiga. A o tutu i latou i ina, sa savavali atu uma lava Isaraelu i le isi itu o le Vaitafe o Ioritana i le eleele matutu.

Ina ua o uma atu tagata i le isi itu, ona tulei atu lea o Ieova i a Iosua e fai atu i tamaloloa e toa 12 malolosi: ‘Ia o atu i le vaitafe i le mea o tutu ai le au ositaulaga ma le atolaau o le feagaiga. Ia aumai ni maa e 12, ma fatufatu i le mea o le a outou api ai nanei. Ma, i le lumanai, pe a fesili atu a outou fanau po o le a le uiga o na maa, ona outou tali atu lea i ai sa pe le vai ma ua sopoia e le atolaau a Ieova le Ioritana. E faamanatu ai lenei vavega!’ Sa faaputu foi e Iosua maa e 12 i le mea lea sa tutu ai ositaulaga i le alitivai.

Mulimuli ane, ona faapea atu lea o Iosua i le au ositaulaga o loo tauaveina le atolaau o le feagaiga: ‘O mai loa i luga.’ Ina ua latou faia, sa toe tafe loa le vai.