I Luga o le Mauga o Olive

O IESU lena i luga o le Mauga o Olive. O tamaloloa e toafa o loo faatasi ma ia o ona aposetolo. O le au uso o Aneterea ma Peteru, ia ma le au uso o Iakopo ma Ioane. O le malumalu o le Atua o loo mafai ona e iloa atu i sina mamao atu.

Ua lua aso talu ona tietie atu Iesu i le tamai asini i Ierusalema. O le aso Lua lenei. O le amataga o le aso na i ai Iesu i le malumalu. O i ina na taumafai ai le au faitaulaga e pue Iesu ia fasiotia. Ae na latou fefefe e faia auā e toatele tagata e fiafia i a Iesu.

‘O outou o gata ma fanau a gata!’ O le taʻu lea a Iesu mo le au taʻitaʻi lotu. Ona fai atu lea o Iesu o le a faasala i latou e le Atua ona o mea leaga ua latou faia. Ina ua mavae lena ona sau lea o Iesu i le Mauga o Olive, ona fesili lea o le au aposetolo e toafa. Pe e te iloa o ā a latou fesili i a Iesu?

O loo fesili le au aposetolo e uiga i mea i le lumanai. Na latou iloa o le a aumaia e Iesu se iʻuga i mea leaga uma i le lalolagi. Ae na latou fia iloa po o afea e taunuu ai ia mea. Po o afea e toe sau ai Iesu e pule o se Tupu?

Na iloa e Iesu o le a le mafai e ona au soo ona vaai iā te ia pe a toe sau. Talu ai ona o le a i ai o ia i le lagi, ma o le a le mafai ona latou vaai atu iā te ia i ina. O lea na taʻuina e Iesu i ona aposetolo ni isi o mea o le a tutupu i le lalolagi pe a pule o ia o se Tupu i le lagi. O ā ni isi o ia mea?

Na fai atu Iesu o le a i ai taua tetele, e toatele tagata o le a mamaʻi ma fia aai, o le a leaga tele le solitulafono, ma o le a i ai mafuie tetele. Na taʻua foi e Iesu e talaʻia le tala lelei o le malo o le Atua i le lalolagi uma. Pe ua tatou vaaia ea ua tutupu nei mea i o tatou taimi? Ioe! Ma e mafai ona tatou mautinoa ua pule nei Iesu i le lagi. Ua toeitiiti nei ona ia aumaia lea o se iʻuga i mea leaga uma i le lalolagi.