Mataupu 3
Le Uiga o le Malo mo lo Tatou Lalolagi
1, 2. E faapefea ona faaalia i le oo mai o le Malo o loo silasila alofa mai le Atua i le lalolagi ma tagata o loo iai?
UA FAAAUAU le tatalo faaaʻoaʻo a Iesu i upu nei: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) O loo manatu mamafa mai le Atua i lo tatou lalolagi, ma i latou uma o ē o soifua ai nei, atoa ma i latou o ē na soifua ai i taimi ua mavae. O le pogai lena e oo mai ai le Malo, ina ia “faaleagaina i latou o ē faaleagaina le lalolagi,” ia saunia ai mo le toe faatutūina mai o ē ua oti, e soloiesea ai le fili o le oti ma ia faia lo tatou lalolagi o se aiga fiafia ma le filemu, ina ia nonofo ai tagata.—Faaaliga 11:15, 18; 21:1, 3, 4.
2 Maeu la le naunautai, e tatau ai ona tatou tatalo i na lava upu, “Ia oo mai lou malo”! O le malo lea o le Atua i aao o lona Alo, le Alii o Iesu Keriso. E auala i lea malo o le a faapea ona faia moni ai le finagalo o Ieova, o ia lava o le “Tupu o le vavau,” i luga o lenei lalolagi. Manatunatu i le uiga o lena mea o le a iai mo tagata o atunuu uma:
E PULE LE “PERENISE O LE FILEMU”
3, 4. (a) O ā upu faavaloaga e ui lava ina aveina i fale e Malo Aufaatasi ae na lē taulau ai lava o ia, ma aiseā? (e) Ua na o le ā lava le sui e toatasi e mafai ona ia saunia le filemu tumau, ma e auala i le ā?
3 I le tagai atu i luma i le pulega a le Malo o Keriso, ua faamatalaina o ia e le perofeta a le Atua o le “Perenise o le Filemu,” ma ua faaopoopo mai faapea, “E leai se mea e gata mai ai ona tele o lana pulega faaperenise ma le filemu.” Na faamautinoaina mai e le perofeta lava lea ia i tatou e faapea: “O le a latou tuʻi ai i a latou pelu e fai ma uamea o suotosina, ma a latou tao e fai ma polo e teu aʻi vine: o le a lē sii atu le pelu e le tasi nuu i le tasi nuu, latou te lē toe aʻoaʻo foi i taua.” E ui lava o nei upu o loo vaneina i le puipui o le lotoā i le isi itu o le ala e faafeagai ma Malo Aufaatasi, ae e lē o le faalapotopotoga faavaomalo fevaevaeaʻi lea ua faataunuuina lena valoaga. Auā o Malo Aufaatasi ua matuā lē taulau ona avea ma faapotopotoga mo le faavaeina o le filemu ma le saogalemu i va o atunuu.—Isaia 2:4, AV; Isaia 9:6, 7, NW.
4 O le filemu moni ma le tumau e manaomia ona iai le faamasinoga tonu mo tagata taitoatasi uma, o se faatinoga moni o le amiotonu. E na o le malo lava o le “Perenise o le Filemu” e mafai ona faamautinoaina lenei mea; o le a ‘faatumauina ma faamausalīina’ lea Malo ‘i le amiotonu.’ Ioe, o le malo lena o le a fai ma meafaigaluega a le Atua mo le saunia o “le filemu i le lalolagi ma le finagalo alofa i tagata.”—Isaia 9:7; 32:17; Luka 2:14, NW.
5. I le faavaeina o le filemu moni, o ā ni mea e maofa ai ua faataunuuina e le Malo?
5 O le a faapefea ona faia lenei mea e le Malo? O le a faapea lava ona faia i se tulaga maoaʻe, e auala lea i le “oo mai” o le malo o le Atua i lana “Perenise o le Filemu” i le faasaga atu i malo faitaua o le lalolagi. Ua valaaulia i tatou e le Salamo 46:8, 9 e faapea: “Ina o mai ia, ina vaavaai i galuega a Ieova, o le ua faia faatafunaga i le lalolagi. Ua faaiua e ia o taua e oo lava i tuluʻiga o le lalolagi; ua gagau e ia le aufana, ma vavae le tao; ua susunuina foi e ia kariota i le afi.” O le a faasāina e le Malo auupega uma o faiga sauā. I le ma lea, o le a na lē faatagaina tagata amioleaga faasauā ma tagata o ē tosoina faamalosi teine, latou te feofeoaʻi i alatetele. Auā i lalo o le malo o le Atua, “o e agamalu, e fai mo latou le nuu; e faafiafia foi i latou ia te i latou ona o le manuia e tele.”—Salamo 37:9-11.
O SE TALA FAATUSA FAAVALOAGA
6. O le ā le faataunuuga faamamaluina na iai i le valoaga a le Tusi Paia i lona ono o senituri T.L.M.?
6 E tele valoaga o le Tusi Paia o loo faatatau i le faatagataotauaina o Isaraelu o aso ua mavae. Ina ua uma ona latou tautuaina Papelonia mo le 70 o tausaga, ona toe foi ai lea o se vaega totoe faamaoni o tagata Isaraelu i lo latou laueleele moni i le 537 T.L.M. O na tausaga uma lava, sa taatia ai le laueleele i sona tulaga lafulafua, o se vaomatua. I inā, ona o le faamanuiaga a Ieova i luga o ona tagata, e uigaese se toe suiga na iai. Na oo mai le faataunuuga faamamaluina o le valoaga na tusia i le faitau selau o tausaga a o leʻi oo atu i lena taimi:
“E olioli ona o i latou le vao lafulafua, ma le nuu naumati; e fiafia le toafa, ma fua mai e pei o le aute. E fua tele mai lava ia, e fiafia foi ma le fiafia tele, ma le alaga; e avatu i ai le lalelei o Lepanona, ma le matagofie o Karamelu ma Sarona, latou te vaavaai i le pupula o Ieova, o le matagofie o lo tatou Atua.”—Isaia 35:1, 2; tagai foi i le Isaia 65:18-25; Mika 4:4.
7. O le ā la e mafai ona tatou faatalitalia mo lo tatou lalolagi pe a “oo mai” le malo o le Atua?
7 E pei ona molimauina mai e talafaasolopito, o nei valoaga sa iai so latou faataunuuga ofoofogia e faatatau i tagata o le Atua sa toe faafoisia i le vaitaimi o le senituri ina ua mavae lo latou faasaolotoga mai Papelonia. Ma pe a “oo mai” le malo o le Atua mo le faamanuiaina o le fanau uma a le Atua i inei i luga o le lalolagi, faamata o le a itiiti ai ea le mea e faia pe a toe faafoisia mai tulaga faaparataiso i lo tatou lalolagi? O le tali e Leai lava! O le a faamautinoa e le Malo ua faia ia maeʻaeʻa lelei le uluai faatonuga a le Atua i le fanau a tagata ia ‘faatoilalo le laueleele,’ ma ia avea atoa e fai ma parataiso faa-Etena.—Kenese 1:28; 2:8-14; Isaia 45:18.
O SE PARATAISO I LE LALOLAGI ATOA
8. I lalo o le Malo, o le ā o le a tupu i mea taumafa ma suāuu, ma ona o le faaaogāina o le ā le tulafono?
8 Pe a “oo mai” le malo o le Atua, o le a mou atu le lē lava o mea taumafa ma le siitai o tau o mea, auā “o taumafa o saito i le nuu i tumutumu lava o mauga; o le a fau ma soloi.” O lo tatou Tamā alofa o le a ia toe “faatupu mai le mea e ʻai i le eleele; ma le uaina e faafiafia ai loto o tagata, ina ia pupula ai o latou mata e sili i le suāuu, o le mea e ʻai foi e malosi ai tagata.” (Salamo 72:16; 104:14, 15) O le a leai se faafitauli i le tufatufaina atu o mea taumafa i le va o atunuu, e leai se toe vavae faatatau, e lē toe faatali ina ia maua le suāuu. O tagata fai polofiti matapeapea o le a lē toe iai. O le a usiusitai tagata uma i le tulafono tautupu, “Ia e alofa atu i lē lua te tuaoi, ia pei o oe lava ia te oe,” i le fefaasoasoai o le tasi ma le isi e tusa ma o latou manao.—Iakopo 2:8.
9. O le ā le faamautinoaga ua ia i tatou faapea o le a leai se mea e faaleagaina ai le fanau a tagata?
9 E lē gata i lea, tatou te mafai ona faatalitalia faapea o le a pulea e le Malo suiga tetele ma gaoioiga faanatura, e pei o mafuiʻe ma afā. Sa faaalia e Iesu pe faapefea ona fai o ia mea ina ua ia faatoʻafilemuina “le matagi tele lava.” O lea, sa matauina lava e ona soʻo na ‘oo lava i le matagi ma le vai na faalogo ia te ia.’ (Mareko 4:37-41) I le siomaga atoa lava faalelalolagi o le malo o le Atua, o le a leai se mea e ogotia ai, e faaleagaina ai pe aumaia ai foi faatamaʻiaga.—Faatusatusa i le Isaia 11:6-9.
10. O le ā sa faaalia i le tele o vavega a Iesu e faatatau i le Malo?
10 O le a lē toe manaomia maota gasegase tetele e tausi ai gasegase o le tino ma le mafaufau. O faamaʻi o le fatu, kanesa ma isi faamaʻi faavaivai tino o le a soloia, auā o le Matai Fomaʻi, o Iesu Keriso, o le a ia faaaogāina le aogā o lana taulaga togiola “e faamalolo ai nuu.” O le tele o vavega o faamalōlōga a Iesu ma le toe faatutūina o ē ua oti, na faia a o iai o ia i le lalolagi, ua na o ni faailoga laiti ia o mea o le a ia faataunuu e ala i lana pule mamana i lona Malo. E oo lava i le tulaga o le oti tuufaasolo i tagata o le a soloia, auā o lea ua faamautinoa mai ia i tatou o le a “leai foi se toe oti.”—Faaaliga 21:4; 22:1, 2; Mataio 11:2-5; Mareko 10:45; Roma 5:18, 19.
11. I le vaitaimi o le pulega o le Malo o Keriso, o le ā le olioli silisili o le a iʻu atu i ai?
11 Maeu se fiafiaga!—auā o le a lē toe iai ni tuugamau e faamatagāina ai le fogaeleele, auā o nei foi mea o le a faagaogaoina. O “uluaʻi fua” o le toetu, le 144,000 o soʻo faamaoni o Iesu, o le a faatasi atu ma ia i le lagi e fai ma ana aumea i lona malo. O le a faataunuuina foi le folafolaga ofoofogia a Iesu e faapea “e faalogo ai i lona leo o i latou uma ua i tuugamau, ma latou o mai ai; . . . e toe tutū.” O i latou nei o le a maua le avanoa fiafia e aumaia ai i le lelei atoatoa faaletagata e fai ma tagatanuu o le Malo i inei i luga o le lalolagi.—Ioane 5:28, 29; Faaaliga 14:1-5; 20:4-6, 11, 12.
12. (a) Aiseā e ao ai ona e manao ia ola e faavavau i le parataiso? (e) E tusa ai ma le Ioane 17:3, o le ā e tatau ona tatou faia ina ia tatou iai i inā?
12 E te manao ea e avea oe o se tasi o i latou o ē o le a soifua ina ia vaai o faamamāina lenei lalolagi mai amioga leaga uma ae o le a suia i se parataiso e fiafia ai? E te manao ea ina ia e soifua i lena taimi e te faafeiloaia ē o le a toe tutū mai? E te fiafia ea ina ia e ola e faavavau i luga o se lalolagi ua faia ia pupula matagofie—e lē toe iai se tasi e ola vaivai ona o le tino matua pe fiu foi i fiafiaga o le a maua i aso taitasi o le olaga? E te mafaia, pe afai o le a e mulimuli i faatulagaga manaomia a le Atua mo le mauaina o le ola. Sa faafaigofie ia Iesu lea faamatalaga, ina o ia faapea atu i le tatalo i lona Tamā: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” (Ioane 17:3) Maeu se faaeaga o le a iai o le ola e faavavau i le parataiso, pe a “tumu le lalolagi i le malamalama o le mamalu o Ieova, faapei ona ufitia o le iliti tai i le suāsami”!—Sapakuka 2:14.
“A MATOU MEA E ʻAI E TATAU MA LE ASO”
13. Aiseā e mafai ai ona tatou tatalo ma le mautinoa mo ‘a tatou mea e ʻai e tatau ma le aso’?
13 Ae peitai, o i tatou i aso nei ua manatu mamafa tele i mea e manaomia mo le taimi nei. Auā ua avea ma luʻi mo le toatele lava o i tatou le tausiga o le soifuaga ma sauniuniga mo o tatou aiga. O lea ua lē gata ina manaomia ai ona tatou tatalo mo le Tamā ina ia faapaiaina lona suafa sili ma ia faia lona finagalo i le lalolagi e auala i le oo mai o lona malo; e manaomia foi ona tatou tatalo i le Atua mo mea e tatau i lea aso ma lea aso, mo a tatou “mea e ʻai e tatau ma le aso.” Tatou te mafai ona faia lenei mea ma le mautinoa atoatoa e faapea, pe afai tatou te taumafai ia ola e talafeagai ma mataupu silisili amiotonu a le Atua ma faamuamua manaoga o lona malo i o tatou olaga, o le a faia e le Atua lana vaega i le avea o Lē Sili e Saunia Mea. E pei lava ona taʻu mai e Iesu ia i tatou: “O lenei, aua neʻi outou popole, ma faapea ane. Ni a mea tatou te aai ai, ni a foi mea tatou te inu ai, ni a foi mea tatou te oofu ai? auā o mea uma ia ua sailia e nuu ese. Auā ua silafia e lo outou Tamā o i le lagi e aoga ia mea uma ia te outou.”—Mataio 6:11, 31-33.
“FAAMAGALO IA TE I MATOU I A MATOU AGASALA”
14, 15. (a) I le tatalo i upu o le Mataio 6:12, o le ā e tatau ona tatou lotomalilie e fai? (e) I lenei mea, o ā faaaʻoaʻoga ofoofogia atonu o le a tatou faataʻitaʻi i ai?
14 I le atiina aʻe o se faiā vavalalata faatasi ma lo tatou Tamā, tatou te manaomia ai ma le loto maulalo ona malamalama i lo tatou nofo aitalafu ia te ia, ma ia iloa lelei foi a tatou agasala i le Atua ma o tatou uso. Ua talafeagai ai la, ona tatou tatalo i le Atua e faapea: “Ia e faamagalo ia te i matou i a matou agasala, e pei o i matou foi ona matou faamagaloina atu i e ua agaleaga mai ia te i matou.”—Mataio 6:12.
15 Ona o se agalelei ofoofogia, o se matuā alofa tunoa ia i tatou, na auina mai ai e le Atua lona Alo, o Iesu, i le lalolagi, ina ia mafai ona “foaiina atu lona ola e fai ma togiola e sui aʻi tagata e toatele” o i tatou o tagata o lenei lalolagi. Ua saunia ai i lenei mea se faavae mo le faamagaloina o a tatou agasala. (Mataio 20:28) Maeu le telē o le alofa mutimutivale o le Atua ua faapea ona faaalia i le fanau agasala a tagata! Maeu se pogai e faamalosia ai ua ia i tatou ina ia faagaloina vaivaiga o o tatou uso! E tatau ona sili atu le tele o mea tatou te lotomalilie e fai: e ao ona tatou faamagalo e oo lava i agasala matuiā ua fai mai ia i tatou. I lenei auala e mafai ai ona tatou faaali atu i isi le uiga o le alofa naunautaʻi na fetalai i ai Iesu o le a avea o se faailoga e mataulia ai Kerisiano moni.—Ioane 13:35; Kolose 3:13; 1 Peteru 1:22.
“LAVEAʻI IA I MATOU AI LE LEAGA”
16, 17. (a) E faapefea ona tatou malamalama i nei upu, “Aua foi e te taʻitaʻiina i matou i le tofotofoga”? (e) E ono mafai faapefea ona tatou gaoioi e talafeagai ai ma le tatalo ‘ia laveaʻi i matou mai le leaga’?
16 I lona faaiʻuga, ua faatonu ai i tatou e Iesu e tatalo i le Atua e faapea: “Aua foi e te taʻitaʻiina i matou i le tofotofoga; a ia e laveaʻi ia i matou ai le leaga.” (Mataio 6:13) Seʻi soia tatou te manatu faapea ua tuu e le Atua tofotofoga i o tatou ala, e mafua ai ona tatou paʻūū. Na i lo lena, o le leaga lava lena o Satani, o loo tetee i le Atua, o loo ia manao tatou te liliuese mai le Atua.
17 Peitai, ua faaauupegaina i tatou e le Tamā e “tetee atu i togafiti a le tiapolo,” ioe, ia tatou tauivi ma le manuia faasaga ia te ia, atoa foi ma malosi o agaga leaga o loo ia pulea. Ina ia lē ‘taʻitaʻiina i tatou i tofotofoga,’ ua saunia ai e le Atua mo i tatou se ofutau atoatoa faaleagaga, lea e mafai ona tatou oofu ai. O loo faamatalaina e le aposetolo o Paulo lea ofu i le Efeso 6:10-18. A o tatou tūtūmau i le faaaogāina o nei auupega ua tuuina mai e le Atua, ma tatalo pea, o le a silasila lava le Tamā i ai e lē ‘taʻitaʻiina atu ai i tatou i tofotofoga, peitai e ‘laveaiina ai mai lē o leaga.’—1 Peteru 5:6-9.
18. I lona otootoga, o le ā o loo aofia i totonu o le Tatalo Faaaʻoaʻo?
18 Tau ina ia lē pine ona faapaiaina lea o le suafa mamalu o Ieova e ala i le ‘oo mai o lona malo.’ Tau ina ia faia lona finagalo i le lalolagi i le soloiesea lea o mea leaga uma ma i le faia o lenei lalolagi atoa o se parataiso mo lona viiga. Po o le ā lava le umi o totoe o lenei faiga o mea amioleaga i le taimi nei, tau ina ia saunia pea e lo tatou Tamā alofa faalelagi mo i tatou mea e tatau ai mo le ola, e fesoasoani ai ia tausia pea lo tatou faiā lelei ma isi ma laveai ia i tatou mai mailei a Satani. O mea nei na aʻoaʻoina e Iesu i tatou ina ia tatalo atu i ai. O loo iai nei mea uma i lana tatalo faaaʻoaʻo.
[Pusa i le itulau 25]
O MEA O LE A FAIA E LE MALO O LE ATUA
● E sapasapaia le pule aoao a Ieova, ma faagata le pulega a Satani.
● E faamamāina le lalolagi mai lotu sese ma pule sauā.
● E aumai ai le pulega a Keriso o le “Perenise o le Filemu.”
● E pogai ai ona fuga mai le laueleele uma e pei se parataiso matagofie.
● E aveesea uma le lē lava o fale, mea taumafa ma suāuu.
● E faavaeina le olaga masani i luga o le faavae o le alofa faaleuso.
● E pulea malosiaga faanatura o le lalolagi, ma taofia mala.
● E soloiesea le oi, popolega, tiga, mafatiaga, ma le aumatuā.
● E faaumatia le fili o le oti, maʻi ma faanoanoaga uma.
● E faatutūina aʻe le faitau piliona o ē oti, ina ia ola e faavavau i le lalolagi.