Lagolagoina Tautupe e Ala i Foai Tauofo

O gaoioiga uma ua uma ona muai faamatalaina e lagolagoina e tagata galulue tauofo, ua faapea ona maulalo ai tupe e faaalu. E faia foi i le tulaga tauofo le faiva i lea fale ma lea fale ma le tufatufaina atu o lomiga e Molimau a Ieova. E totogi e i latou lava a latou tupe faaalu. E leai foi ni totogi mo auaunaga a toeaina o ē o loo vaavaaia faapotopotoga, ma auauna o le faiva o loo fesoasoani atu i ai. E totogi e i latou lava a latou tupe faaalu uma.

E oo foi i tane o le Vaega Pule ma isi uma o loo galulue i taimi atoa i le sauniuniga ma le gaosiga o Tusi Paia ma lomiga faale-Tusi Paia, e na o o latou potu lava ma meaʻai faapea ma sina alauni itiiti e totogi ai tupe faaalu. E faapena foi ona moni i ovasia faimalaga faataimi-atoa.

O foai e lē telē ua maua mai mo lomiga, o le tele lava ua aofia ai na o tau o mea e fai ai lomiga, o le totogi o le gaosiga ma le laʻuga. O isi tupe faaalu uma ua totogia lea e ala i foai tauofo o tupe mai Molimau a Ieova lava latou, e ala i ni meaalofa po o ni uili ua faaletulafonoina.

I sauniga uma lava a Molimau a Ieova, pe i faapotopotoga po o ni fonotaga, e avanoa ai pusa mo foai mo i latou o ē naunau e faia ni foai. E leai ni lafoga po o peleti e aoina. E lē totogia ni taulaga po o ni sefuluaʻi. E pei ona faataatia mai e le Tusi Paia, e taitasi le tagata ma foai e pei ona malie i ai o lona loto.​—2 Korinito 8:12; 9:7.

• E faapefea ona lagolagoina gaoioiga uma a Molimau a Ieova i tulaga tautupe?