La Tatou Faatatauga Faigofie mo le Tufatufaina o Lomiga
1 Ua maeʻa nei ona faatinoina le faatatauga faigofie mo le tufatufaina o lomiga e aunoa ma se totogi i Samoa i Sisifo ma Amerika Samoa e tusa o se tausaga. Pe o faamaonia ea le taulau o lenei faatatauga? Ua faaalia i lipoti o le auaunaga i le fanua le faateleina o lomiga e tuua toetoe lava o vaega eseese uma. E faitau afe tagata ua avatu i ai le avanoa e “sau ia . . . ave fua ia le vai o le ola.”—Faaa. 22:17.
2 Peitai, ua lē faatonuina i tatou, pe tatou te faanaunau, e tau ina avatu lomiga i so o se tagata o le a na talia. E pei a ona tatou faaaogāina ma le atamai a tatou lava mea faitino, ua iai foi la i tagata talaʻi taitoatasi le avega tauave e faaaogā ai ma le atamai lomiga na te maua e aunoa ma se totogi mai le Sosaiete e ala i lana faapotopotoga. Ona ua faaavanoa mai e le Sosaiete ana lomiga i tagata talaʻi e aunoa ma se totogi, e mautinoa o le a lē uiga ai faapea e leai se tau e totogia mo lona gaosiga ma le tufatufaina. E ao ia i tatou uma lava ona talisapaia faapitoa le aogā o a tatou lomiga o loo fesoasoani atu i tagata loto faamaoni i la latou sailiga mo le poto saʻo e faatatau ia Ieova le Atua ma lona Alo o Iesu Keriso.—Ioane 17:3.
3 E mafai faapefea ona saunia e le Sosaiete ana lomiga i tagata uma e aunoa ma se totogi? Ua totogia tau e lē maalofia o lona gaosiga ma le tufatufaina i foai faamealofa. O le puna autū o lenei lagolagosua o auauna tuuina atu a Ieova. Ua lē vaavaai atu Molimau a Ieova i tagata lautele mo le lagolagoina o lenei galuega ua silisili ona faanatinati o le folafolaina o le Malo. Tatou te leʻi auai muamua lava i se suegā tupe i le lautele pe i le taimi nei foi. Peitai, o nai foai laiti mai tagata e naunau faamaoni ma le loto faafetai tatou te feiloai i le fanua e talisapaia.
MEA UA FAATAULAUINA E A TATOU FOAI
4 O lea, e talafeagai ai ona tatou nofo sauni e faamatala atu puupuu ma manino le auala ua lagolagoina ai la tatou galuega tau aʻoaʻoga faale-Tusi Paia i le lalolagi aoao i foai tauofo. O tupe uma e maua mai ua faaaogā e totogi ai le anoanoai o tupe faaalu i le faataunuuina o le galuega talaʻi o le Malo i lenei vaitaimi faaonaponei. E faaopoopo i le gaosia o lomiga mo le tufatufaina i le lalolagi aoao, ua tausia foi e le Sosaiete ofisa o le lala, aiga Peteli, aʻoga mo le faiva ma misionare, misionare, ovasia femalagai, nofoaga mo le tufatufaina o lomiga, atoa ma le tele o isi galuega lagolagosua e manaomia mo le faataunuuina o le tofiga aoao na tuuina mai e Iesu i ona soʻo.—Mata. 24:14; 28:19, 20.
5 O le tuputupu aʻe matuā tāua ua oo i tagata o Ieova, ua uunaia ai le toatele e fesilisili po o le ā se mea e mafai ona latou faia e fesoasoani ai. O le toatele lava o tagata e lē mafai ona fesoasoani totino i le fausia o lala fou ma Maota o le Malo pe malaga atu foi i atunuu mamao e fesoasoani ai i taumafaiga faaevagelia i inā. Ae ina ia iai sina latou vaega i ia taualumaga faagaeetia i le tele latou te mafai ai, e toatele tagata talaʻi ma o latou aiga ua faifai pea ma latou masani le faataatia ese o se meaalofa e foai atu mo le galuega i le lalolagi aoao. (Faatusatusa 1 Korinito 16:1, 2.) O le auala lenei, ua lagolagoina ai gaoioiga uma a le Sosaiete, e aofia ai le tufatufaina o lomiga. E lē tatau ona manatu se tasi i foai tauofo i le galuega i le lalolagi aoao e faapea ua na o se totogi lea e ufitia ai le tau o se lomiga.
6 Pe a feiloai ma tagata o aiga po o isi mo le faamoemoe e avatu i ai se molimau, e ao ona tatou sauniuni e talanoaina ma i latou se mataupu o le Tusi Paia. E fau ma matalasi faatomuaga mananaia, faatasi ma le tele o mataupu talafeagai o le Tusi Paia, ua fautuaina i le Reasoning From the Scriptures. Pe atonu tatou te faaaogāina le Mataupu mo Talanoaga ua fautuaina i La Tatou Faiva o le Malo. E tatau i le tagata talaʻi ona filifili pe faapefea ona faaauau e tusa ma le ofoina o lomiga, e faalagolago i le tali mai a le tagata i le feau o le Malo. Afai e aliali mai e lē lava le naunau e fai ma faamaoniga e ofo atu ai se tusi po o se isi lomiga, e mafai ona e filifili e faamuta filemu le talanoaga ae agaʻi atu i le asiga e sosoo ai. Pe atonu foi e te manao e tuu ai se pepa lomia po o se sāvali pe afai e polomisi mai le tagata o le a ia faitauina le feau o loo iai. Ia mautinoa ua faia se faamaumauga o le tagata naunau ina ia mafai ai ona faia se toe asiga. O le mea lava lena e tasi e mafai ona fai i feiloaiga pe afai e lē lava le taimi e atiina aʻe ai se talanoaga uigā ma se tasi ona o lona pisi pe ona ua tatou ō atu i se taimi e lē o avanoa.
7 Ua fesoasoani le faatatauga faigofie mo le tufatufaina o lomiga e iloa ai e tagata uma e lē sue tupe la tatou galuega tau aʻoaʻoga faale-Tusi Paia i so o se itu. E fesoasoani foi lea ia i tatou ina ia tuu faamuamua ai lo tatou sini o le talaʻia o le tala lelei o le Malo ma le faia o soʻo o Iesu Keriso. I se eseesega iloga ma faalapotopotoga o loo auai i “aogā lafoga,” ua fiafia Molimau a Ieova e iloa e mafai ona maua lomiga mo tagata uma e aunoa ma se totogi. Ua lē taitai ona aoina mai foai mo le galuega i le lalolagi aoao ia i latou e lē naunau faamaoni i la tatou feau. (Vaai Le Olomatamata faa-Peretania o Tesema 1,1990, itulau 22 ma le 23.) Ua faaaogāina le selau pasene o foai uma e lagolagoina ai lenei galuega tau aʻoaʻoga faale-Tusi Paia i le lalolagi aoao, ona o tagata faigaluega uma e tauofo ma e leai se totogi po o se tupe maua e totogia i so o se tasi i le faalapotopotoga. O le mataupu i foai e fesoasoani ai i le galuega i le lalolagi aoao, faatoʻā iloiloina lava ia i latou o ē e talosaga mai pe o ē atonu e faaalia le naunau i la tatou galuega.
8 A o tatou faalauteleina ma le maelega la tatou faiva, i le faaaogāina tatau o lomiga tautele a le Sosaiete, o le a faaauau pea ona aumaia e Ieova le faatelega. Ua sapaitalia e tagata loto faafetai i so o se mea a tatou faamalamalamaga mafaufau loloto i le natura o la tatou faiva ma ua fiafia ai e faaleoina mai la latou lagolagosua e ala ia latou foai tauofo.