Mataupu 21

E Mafai Faapefea Ona Ou Maua (ma Tausia!) se Galuega?

O SE suʻesuʻega sa lomia i le mekasini Senior Scholastic, na fesiligia ai ni tamaiti aʻoʻoga i aʻoga maualuga i Amerika e taʻu mai i se fuafaatatau po o lē fea sini o le olaga latou te manatu i ai e “sili ona tāua.” E valusefulufā pasene na tali mai e faapea: “O le mauaina lea o se galuega tumau.”

Atonu o loo e fia faigaluega pe a uma le aʻoga e fesoasoani ai i tupe faaalu a le aiga ma oe lava. Pe atonu foʻi o loo e saʻilia se galuega faavaitaimi ina ia tausia ai oe o se faievagelia faataimi atoa. (Tagaʻi i le Mataupu 22.) I so o se mea lava, o le taugatā o le soifuaga i le lalolagi atoa ma le faaitiitia o le manaʻoga mo tagata faigaluega e leai ni tomai, ua faapogaia ai ona faafaigatā ona maua ni galuega pe afai o oe o se talavou. E faapefea la, ona mafai ona e ulufale atu i le itulagi o galuega e aunoa ma ni faafitauli?

Aʻoga—Se Faavae e Toleni ai mo Galuega

O Cleveland Jones, o se tasi e galue faapitoa i le faaofiina atu o tagata faigaluega fou i galuega mo le tele o tausaga, na avatua le fautuaga lenei: “Ia lelei lou tulaga tauaʻoaʻoga i se aʻoga maualuga. Ou te matuā faamamafaina le tāua tele o le aʻoaʻoina lelei o le faitau, o le tusitusi, ma le tautala. Aʻoaʻo ia amio faaaloalo ma maopoopo i le auala e te laʻei ai, ina ia mafai ona e feutagaʻi lelei ma tagata i le lalolagi faigaluega.”

O se avepasi e tatau ona iloa faitau lelei faasologa mo le taimi taunuu ma taimi e malaga ese ai. O tagata faigaluega i falegaosimea e manaʻomia ona iloa le auala e faatumuina ai tiketi o galuega ua uma ona faia po o isi lipoti faapena. E faatalitalia faatauoloa e iloa faaopoopo fuainumera. I le toetoe lava o so o se ituaiga o galuega, e manaʻomia ai le tomai i fesootaʻiga. O tomai nei e mafai ona e aʻoaʻoina i le aʻoga.

E Tauia le Maumauaʻi

“Aua le fiugofie pe afai ua e lē toe aʻoga ma o loo e saʻilia se galuega,” o le faamatalaga lea a Jones. “ʻAlofia le alu atu i faatalanoaga mo se galuega e tasi pe lua, ona alu lea i le fale e nofonofo ma faatalitali mai ai. E lē taitai ona e mauaina se galuega i le auala lena.” Sa saʻilia e le talavou o Sela se galuega mo le fitu masina ae faatoʻā maua. “E masani ona ou fai ifo ia te aʻu lava: ʻO laʻu galuega o le saʻilia lea o se galuega,’” o le tala lea a Sela. “E valu itula o le aso o vaiaso taʻitasi na ou faaaluina e saʻilia ai se galuega mo masina e fitu. E masani ona ou vave amata i taeao taʻitasi ma ʻgalue’ seʻia ta le fā i le afiafi. O le tele o po e tigā ai oʻu vae. I le taeao e sosoo ai ou te ʻtoe faamalosi ai foʻi’ e toe amata laʻu saʻiliga.”

O le ā na taofia Sela mai le fiugofie? “O so o se taimi lava ou te iai i le ofisa o le pule,” o lana tali lea, “ou te manatua ai fetalaiga a Iesu e faapea: ‘Ia outou finafinau.’ Ou te mafaufau pea e sau le aso o le a ou faigaluega ai ona mou atu ai lea o lenei taimi leaga.”—Luka 13:24.

Nofoaga e Maua ai Galuega

Pe afai o e nofo i se nuu maotua, e mafai ona amata saʻili sau galuega i faatoʻaga o i lo outou nuu po o togalaau ‘aina, po o lou saʻilia foʻi o se galuega galuefanua. Pe afai o loo e nofo i se taulaga telē po o se aai, taumafai e faitau nusipepa i faasalalauga mo avanoa faigaluega. O nei faasalalauga e aumaia ai ni manatu i agavaa o loo manaʻomia mo nisi galuega ma e mafai ona fesoasoani ia te oe e faamatala atu i lē o vaaia le galuega le māfuaaga e mafai ai ona e faataunuuina na manaʻoga. E mafai foʻi ona e faafesootaʻia mātua, faiaʻoga, ofisa o galuega, ofisa o pule, o uō, ma ou tuaoi.

Tausia o Lau Galuega

E faanoanoa lava, pe a oo ina leai ni galuega ona ua mapuna aʻe omiga tautamaoaiga, o talavou o faigaluega e masani lava ona muamua vāea. Ae lē manaʻomia ona tupu lenei mea ia te oe. “O tagata o ē tumau i galuega o i latou ia e sogasogā e faigaluega ma e faaalia se uiga lotomalie e faia so o se mea e manaʻo i ai le pule,” o le tala lea a le susuga ia Jones.

O ou uiga faaalia o le auala lea o loo e mafaufau ai—o ou faalogona e uiga i lau galuega e faapena foʻi i tagata o loo e faigaluega ai ma i latou tou te faigaluega faatasi. O ou uiga faaalia o le a faaatagia mai i le auala o loo faatino ai lau galuega. E faamasino lou agavaa e lou pule e faavae aʻe e lē gata i le auala o loo faia ai lau galuega ae faapea foʻi ou uiga faaalia.

“Ia iloa e lē o loo faafaigaluegaina oe e faapea e lē gata e mafai ona e mulimuli i faatonuga ae sili atu mea e mafai ona e faia na i lo mea o loo manaʻomia e aunoa ma sē e vaaia oe i taimi uma,” ua faaauau atili mai ai Jones. “Auā ona o le tau leai o ni galuega, o tagata faigaluega o loo tumau pea, e lē o i latou ua leva ona iai, ae o i latou e fua mai a latou galuega.”

Na faamaonia e Sela le saʻo o lenei mea. Na ia faapea mai: “E masani lava ona ou taumafai e galue faatasi ma lē o vaaia laʻu galuega. Sa ou lotomalie e fetuunaʻi laʻu faasologa pe a manaʻomia, mulimuli i faatonuga ma faaaloalo i lē o vaaia laʻu galuega.” Ua faamanatu mai ai se tasi o timaʻiga a le Tusi Paia, “ia usiusitai i o outou matai faaletagata, e lē faapea seʻiloga o vaavaai atu pe faia ina ia faafiafia ai o ia, ae o se faaaliga faamaoni o lou tuutoina atu i le Alii.”—Kolose 3:22, Phillips.

Manumalo Mai le Mataʻu

Afai o oe e te fou atu i le galuega, e masani lava ona iai lagona popole i uluaʻi aso. Atonu e te tau mānatu: ‘Faamata o le a latou fiafia mai ia te aʻu? Pe mafai ona ou faia le galuega? Po o le a latou fiafia i laʻu galuega? Talosia ia aua neʻi pei aʻu o se tagata faavalevalea.’ E manaʻomia iinei ona e faaeteete, neʻi teʻi ua faavaivaia e lou popole lau vaaiga mautinoa.

E mafai ona faavavevave ona faia sau fetuutuunaʻiga ma faafilemuina faalogona popole i le aʻoaʻoina atili e uiga i le kamupani. Ia vaavaai, ia faalogo, ma faitau. I taimi tatau, fesili atu i lē o vaaia lau galuega i fesili talafeagai e uiga i lau galuega ma le auala o e faatinoina ai—o le a lē pei ai oe e te faavalevalea. Fesili ifo ia te oe lava, ʻE faapefea ona ofi atu laʻu galuega o laʻu matagaluega, agaʻi i le aotelega o fuafuaga o faanaunauga a le kamupani?’ O tali o nei fesili e mafai ona fesoasoani ia te oe e atiina aʻe auala lelei e faia ai galuega ma faafiafiaina i le galuega.

Ia Felagolagomaʻi ma Tagata Faigaluega

O so o se galuega lava e aofia ai le feutagaʻi ma isi tagata. O le iloaina o le auala e tausia ai le lelei o faiā ma isi e tāua i le tausia o se galuega. “Afai e mafaia ia te outou, ia outou nofo lelei ma tagata uma lava.” (Roma 12:18) O le faia faapea e mafai ai ona fesoasoani ia te oe e ʻalofia feupuaʻiga lē manaʻomia ma fevesiaʻiga i se galuega.

O nisi o taimi o tagata o tou faigaluega faatasi e eseese o latou tupuaga ma o latou uiga totino mai ia te oe. Ae aua e te manatu faapea e faatauvaa se tasi ona e ese. Ia faaaloalogia lana aiā e ese ai o ia. E leai se tasi e manaʻo e feutagaʻi atu ia te ia ma le leai o se faaaloalo; e faapogaia ai ia te ia lagona faapea o ia e lē aogā. E mananaʻo tagata uma lava e iai lagona faapea o ia o loo manaʻomia—ma o ia e tāua. Ia e maua le faaaloalo mai ē tou te faigaluega ma lou pule e ala i le feagai ai ma i latou ma le faaaloalo.

ʻAlofia le Faitala

“O se mailei mataʻutia,” o le tala lea a Sela, “ona o le faitala e mafai ona sesē ai lau vaaiga i le pule po o isi.” O talafeaveaʻi e lē o se puna sili lena e maua ai faamatalaga, ma atonu e iʻu ai i ni tala e te tigā ai. O talasalatua e mapuna aʻe i talafeaveaʻi e masani lava ua na o ni faamatalaga lē tāua ua soona faamamafa e faapea ona mafai ai ona faaleagaina tulaga lelei o isi—e faapena foʻi ma lou lava tulaga lelei. O lea la, ia tineia le naunau atu e faitala.

Ia manatua foʻi, e leai se tasi e fiafia i sē e faitio. Afai o iai se mea o faafatuulu ia te oe i le galuega, aua le faasalalauina e ala i talafeaveaʻi. Alu ma talanoa i lē o loo vaaia lau galuega. Peitaʻi ane, aua e te osofaʻi atu i lona ofisa i lou ita ua mumū faaafi ma mulimuli ane e toe salamō ona o ni faaupuga lē logolelei. Ia faapea foʻi ona ʻalofia mailei o le osofaʻia o se tagata patino. Ia tausisi i faamatalaga moni. Ia manino ma faamaoni i le tele e tatau ai i le faamatalaina atu o le faafitauli. Atonu e mafai ona e amata i lou faia o se faamatalaga e pei o le, ʻOu te manaʻomia lau fesoasoani . . . pe, ‘Atonu e sesē aʻu, ae o loʻu manatu e uiga . . . ’

E Tāua le Tausia o le Taimi

E lua māfuaaga sili ua māfua ai ona lē taulau tagata i le tausia o se galuega, o le tuai mo le galuega ma le tiaʻi galuega. Na faapea mai se faatonusili e toleniina tagata faigaluega mo se falegaosimea telē i se tasi o aai e uiga i talavou faigaluega: “E manaʻomia ona latou aʻoaʻoina ia alapō, ia iloa le auala e talia ai faatonuga. Afai latou te lē mafai ona aʻoaʻoina nei mea, o le a faavavau pea ona iai le faamaʻi o le leai o ni galuega.”

Na aʻoaʻoina e Sela se lesona o le tausi taimi i se auala faigatā. “Na leiloa laʻu uluaʻi galuega ina ua faatoʻā mavae le tolu masina ona o le faiaga,” o lana tala faanoanoa lea, “ma na faafaigatā ai e lenei mea ona toe maua se isi galuega.”

Le Tāua o le Faamaoni

Na faapea atili mai Jones o lē e galue faapitoa i le faaofiina atu o tagata faigaluega fou i galuega: “E fesoasoani le faamaoni i se tagata e tumau ai i le galuega.” O le faamaoni e aofia ai le ʻalofiaina e lē gata o le gaoia o mea faitino ae faapea foʻi le gaoia o le taimi e ala i le faia o mālōlōga e sili atu i le taimi ua faatulagaina. O se tagata faigaluega e faamaoni e faatāuaina ma faamoemoeina. Mo se faataʻitaʻiga, o se tasi talavou molimau a Ieova o lē na faigaluega i se fale ofu sa ia te ia se lauiloa i le faamaoni.

“I se tasi aso,” o lana tala lea, “na mauaina ai e le pule ni mea i le potu teuoloa, o nanā i totonu o isi ofu. O se tasi o tagata faigaluega sa gaoi mai le fale oloa. I le taimi na tapunia ai sa ou alu ai i luga i le ofisa o le pule ma na faateʻia aʻu i le vaai atu o loo iai uma tagata faigaluega iinā. Sa taofia uma iinā tagata faigaluega ina ia suʻesuʻeina ai. Sa na o aʻu na lē taofia i lena suʻesuʻega.”

E toʻatele talavou Kerisiano e iai mea faapena na tutupu ai ma ua avea nei ma tagata faigaluega ua faatāuaina. O lea, ia galue mamafa i le saʻilia o se galuega. Ia maumauaʻi. Aua le faavaivai. Ma pe a e mauaina le galuega lena na faaalu ai au taumafaiga fitā mo le saʻilia, ia galue mamafa e tumau ai!

Fesili mo Talanoaga

◻ E faapefea i au galuega i lau aʻoga ona aafia ai lou tomai i le saʻilia o se galuega?

◻ Aiseā e tāua ai le maumauaʻi pe a saʻilia se galuega?

◻ O ā nisi o nofoaga e te suʻea ma tagata e te fesili i ai pe a saʻili galuega?

◻ O ā nisi o manatu mo le taulimaina o faatalanoaga o galuega?

◻ O le ā e mafai ona e faia e puipuia ai oe mai le tuliesea?

[Faamatalaga faaopoopo i le itulau 166]

“Ou te matuā faamamafaina le tāua tele o le aʻoaʻoina lelei o le faitau, o le tusitusi, ma le tautala”

[Faamatalaga faaopoopo i le itulau 170]

“E masani ona ou fai ifo ia te aʻu lava: ʻO laʻu galuega o le saʻilia lea o se galuega’”

[Pusa/Ata i le itulau 168, 169]

Taulimaina o Faatalanoaga mo Galuega

“A o leʻi alu atu i se faatalanoaga mo se galuega, ia manatua, o uiga e muaʻi faaalia o uiga foʻi na e manatuaina pea,” o le fautuaga lea a se tagata faufautua mo galuega, o Cleveland Jones. Sa ia lapataʻia faapea ia aua le ofuina ni ofuvae lī ma ni seevae taalo pe a alu i se faatalanoaga mo se galuega ma e matuā fautuaina foʻi le manaʻomia ona mamā ma teuteu lelei. E masani lava ona faapea mai manatu o pule o galuega, o le auala e laʻei ai se tagata o le auala foʻi lena o le a faigaluega ai.

Pe a talosaga atu mo se galuega faaofisa, ia laʻei i le auala e laʻei ai se tagata faipisinisi. Pe a talosaga atu mo se galuega i se falegaosimea, ia ofu se ofuvae ma se ofutino o loo mamā ma mafolafola lelei, ma ni seevae mamā. Afai o oe o se tamaʻitaʻi, ia laʻei onomea ma aua le soona faapapanuina au vali. Ae afai o loo talosaga mo se galuega faaofisa, ia fai ni totini ma ni seevae lelei e faafetaui i se laʻei.

Ia fai ma masani le alu na o oe i se faatalanoaga o se galuega, ua lapataʻi mai ai Jones. Afai e te alu ma ave lou tinā po o ni au uō i le faatalanoaga, atonu o le a manatu ai le pule o le galuega e lē o oe o se tagata matua.

‘Ae faapefea pe a fesili mai le pule ia te aʻu pe iai soʻu potomasani i se galuega sa iai muamua, e faapefea ona ou tali atu?’ o ou manatu ia e ono oso aʻe. Aua e te palafu. E masani lava ona iloa mai e tagata pule ia tala gugutu. Ia e faamaoni.

Atonu e te lē o iloaina, ae o loo ia te oe se potomasani e tusa lava po o se galuega muamua lea ua e saʻilia e “tumau” ai. Pe sa iai muamua ea sau galuega faatuuaga? Pe sa e tausitama muamua? Pe sa iai pea sau matafaioi i lou aiga e tausia ai galuega a le aiga? Pe sa iai ni tiute tauave e tuuina atu ia te oe e tausia ai ni tiute faapitoa i le nofoaga o lau tapuaʻiga? Pe sa toleniina ea oe e tautala atu i le lautele? Afai o lea, e ono taʻua ia tulaga i le faatalanoaga po o le faia o se lisi ma tuufaatasi i le mea o iai au pepa faamaonia ina ia faaalia ai faapea e mafai ona e taulimaina ia tiute tauave.

O se isi manatu e tāua i pule o galuega o le auala e te faaalia ai le naunau i la latou kamupani ma le galuega ua ofoina mai. E tatau lava ona e faatalitonuina i latou faapea e te manaʻo e fai le galuega ma e mafai ona e faia. O le uiga naunau “po o le ā saʻu mea aogā e maua mai ai” o le a vave liua ai le naunau mai o lē o faia le faatalanoaga.

O le talosagaina ma le mauaina mai o se galuega faasoloatoa po o se galuega faavaitaimi o se luʻi e mafai ona e faafetaiaʻia ma le manuia. Ma afai e faaaogā lena galuega e fai ma meafaigaluega e fesoasoani atu ai i isi, ae lē na o oe, e avea ai le faamalieina e maua mai ai o se faaopoopoga aogā.

[Pusa i le itulau 171]

Mea e Fai a o Faatalanoaina mo se Galuega

Ia faatagata matua, ia pei o se tagata faipisinisi. Ia faafeiloaʻi atu i le pule i ni uiga faaaloalo talafeagai. Ia taʻua o ia “Susuga”—ae lē o “Siaki,” “Uso,” po o “Uō.”

Ia nofo saʻo lelei i le nofoa, ia tutū lelei ou vae i lalo; ia mataalia le pupula. O le lava o au sauniuniga o le a fesoasoani ia te oe e te toʻa, sologa lelei, ma lē popolevale ai.

Ia mafaufau a o leʻi taliina se fesili. Ia faaaloalo, ia saʻo, faamaoni, ma tuusaʻo le manatu. Ia avatu se faamatalaga e atoatoa. Aua le gugutu.

Ia iai se pepa taʻiala ia te oe, o loo tusitusi uma ai au galuega, o aso na e galue ai, o ou totogi sa iai, o ituaiga o galuega sa e faia, ma māfuaaga na e tuua ai le galuega.

Ia nofo sauni e faaalia le auala o le a fesoasoani ai ia te oe lau toleniga ma lou tomai tau galuega e te taulau ai i le galuega o loo e faatalosagaina.

Mo ni faamaoniga, ia taʻua igoa (ma tuatusi atoa) o ni tagata se toʻatolu e sili ona maufaatuatuaina o ē latou te iloa oe ma lau galuega.

Ia mautinoa, ia mataalia, ae aua le palafu. Ia faaaogā le gagana lelei ma tautala manino. Aua le soona tautala.

Ia faalogologo lelei; ia faaaloalo ma faautauta. O le mea e sili ona manatu mamafa i ai, aua neʻi faia ni finauga ma lē e ono avea ma ou pule o le galuega.

O le pule e na o le pau le mea o loo naunau i ai po o le ā e fetaui lelei ma le galuega. Aua le taʻua fua ou faafitauli totino, faafitauli i le aiga, po o ou faafitauli tautupe.

Afai e foliga mai o le a e lē mauaina le galuega, ia talosaga atu i se fautuaga a le pule e faatatau i nisi galuega atonu o le a ono tulaʻi mai i le kamupani.

Ia avatu i le pule sina tusi faafetai puupuu i le taimi lava e uma ai le faatalanoaga.a

[Faaopoopoga i lalo]

[Ata i le itulau 167]

O tomai o loo e aʻoaʻoina i le aʻoga atonu e sau se aso ona faamaonia lea le aogā i se galuega