Mataupu 28

E Faapefea Ona Ou Aveesea Faalogona o le Alofa Faavalea?

“MO LE tele o talavou, o faalogona o le alofa faavalea ua avea o se mea masani e pei o le fulū,” o le tusi mai lena a se mekasini e faapitoa ana tusitusiga mo talavou. Ua toetoe lava o talavou uma ua oo i ai lena mea, ma e toetoe foʻi o i latou uma ua mafai ona sao mai ai i o latou olaga talavou, a o tausisia pea lo latou mamalu ma uiga mālie. E ui i lea, pe a oo ina lofia oe e faalogona o le alofa faavalea, e matuā leai lava se mālie. Fai mai se tasi talavou: “Sa matuā leai soʻu fiafia, ona sa leai lava ma se mea e mafai ona ou faia i ai. Sa ou iloa e matua tele le tamaʻitaʻi ia te aʻu, ae sa ou manaʻo lava ia te ia. Sa matuā suia ai loʻu tagata i lenei mea.”

Le Iloiloga o se Faalogona o le Alofa Faavalea

E lē o se agasala le iai o ni faalogona malolosi mo se isi tagata—tau lava ina ia aua neʻi lē mamā pe lē saʻo (mo se tasi ua faaipoipo). (Faataoto 5:15-18) Peitaʻi afai o lena e te talavou, o “tuʻinanau o taulelea” e masani lava ona pulea ai ou mafaufauga ma gaoioiga. (2 Timoteo 2:22) A o taumafai pea e pulea faanaunauga malolosi fou na ua tutupu aʻe i le amataga o le olaga talavou, e mafai ona faatumulia se talavou i lagona alofa fetosinaaʻi i le va o ituaiga ua faatupulaʻia—ae leai se tasi e sasaa atu i ai na lagona.

E lē gata i lea, “o teine e vave lava ona toʻa ma faigofie ona feagai ma tagata i le amataga o o latou olaga talavou na i lo tama.” O le iʻuga, “e masani ona latou iloa ai faapea, o a latou uō tama i le vasega e leʻi avea ma tagata matutua ma e lē maua ai se fiafia pe a faatusatusa atu i faiaʻoga” po o isi tagata ua matutua atu. (le mekasini o le Seventeen) Atonu e manatu ai se teine faapea o se faiaʻoga e sili atu ona ia fiafia i ai, po o se tagata pese lauiloa, po o se tagata matua e masani lelei ai, o le tama lea ua “fetaui lelei.” Ua masani foʻi ona iai faanaunauga o le alofa faavalea i tama. Peitaʻi, o le alofa ua lagonaina mo na tagata e matuā lē tupulaga, e mautinoa o loo faapogaia mai mafaufauga e pei o ni miti ae lē o ni mea moni.

Faalogona o le Alofa Faavalea —Le Māfuaaga e Mafai ai Ona Mataʻutia

E ui o le tele o faalogona o le alofa faavalea e lē umi ona iai, ae mafai lava ona matuā faaleagaina ai se talavou. Mo se tasi o māfuaaga, o le tele o mea o loo faanaunau alofa atu i ai se talavou ua na o ni mea e lē tatau i ai se faatāuaina. Sa taʻua e se tasi tagata poto: “Ua tofia le valea i mea silisili.” (Failauga 10:6) O lea, ua faatāuaina se tagata pese ona o lona leo mālū po o le aulelei foʻi o ona foliga. Ae po o ana amio ea ua tatau i ai le faamālō? Po o ia ea o “i le Alii” i le avea o se Kerisiano tuuina atu?—1 Korinito 7:39.

Ua lapataʻi mai foʻi le Tusi Paia: “O sē fia uo ma le lalolagi, ua avea o ia ma ita i le Atua.” (Iakopo 4:4) Po o le a lē faaleagaina ai le lua faauōga ma le Atua pe afai e tuu atu lou loto i se tagata e taʻusalaina e le Atua lana amio? Ua poloaʻi mai foʻi le Tusi Paia: “Ia leoleo outou ia te outou ia taumamao i tupua.” (1 Ioane 5:21) O le ā lau taʻu pe a teuteuina atoa e se talavou puipui o lona potu i ata o se tagata pese lauiloa? Po ua lē fetaui ea i ai le upu “ifo i tupua”? E mafai faapefea e lena mea ona faafiafiaina ai le Atua?

O nisi talavou ua oo lava ina latou faataga o latou mafaufauga faivavale e aveesea ai manatunatuga lelei. Ua faapea mai se tasi o tamaʻitaʻi talavou: “So o se taimi lava ou te fesili atu ai ia te ia po o ā ona faalogona—e masani lava ona ia faafiti mai e leai ni ona faalogona ia te aʻu. Ae mafai ona ou iloa atu i lana pupula ma ana gaoioiga e lē moni lenei manatu.” O le alii talavou sa fesiligia o loo taumafai e faaali atu lona lē manaʻo i le tamaʻitaʻi i se auala agalelei, peitaʻi o lea tamaʻitaʻi e matuā lē mafai lava ona ia talia le tali atu e leai.

Ua tusi mai le isi tamaʻitaʻi e faatau i ona faalogona alofa faavalea mo se tagata pese lauiloa: ‘Ou te manaʻo e avea o ia ma aʻu uō tama, ma ou te tatalo ina ia taunuu moni lenei mea! E masani ona ma momoe ma lipine o ana pese ona o le mea pito latalata lena e mafai ona ou oo atu ai ia te ia. Ua ou oo i le tulaga afai o le a lē mafai ona ou mauaina o ia, o le a ou pule i loʻu ola.’ Po o nei ea tuʻinanauga faaleituaiga e aunoa ma le mafaufau e faafiafiaina ai le Atua, o lē ua ia faatonuina i tatou e auauna atu ia te ia ma ‘le manatu mamā’?—Roma 12:3.

Ua taʻua e le Tusi Paia i le Faataoto 13:12: “O le faamoemoe ua tuai ona taunuu e faanoanoa ai le loto.” O le faatupu aʻe o faamoemoega mo se faiā lē taulau e maʻi ai, na taʻua e fomaʻi faapea o le lē tauia mai o le alofa o se māfuaaga lea o le “maʻi i mafatiaga, popolega, ma faanoanoaga e masani ai . . . le lē moe i le po, po o le auvaivai, tigā o le fatafata, po o le tau mole.” (Faatusatusa i le 2 Samuelu 13:1, 2.) Sa taʻutino mai e se tamaʻitaʻi na alofa faavalea: “E lē mafai ona ou ʻai . . . e lē mafai ona ou toe suʻesuʻe. Ou te . . . moemiti ia te ia i le ao. . . . Ua ou leagafaia lava.”

Mafaufau i le faaleagaina e oo ia te oe pe a e faataga ni mafaufauga lē moni e pulea lou olaga. Ua taʻua e Dr. Lawrence Bauman faapea o se tasi o uluaʻi faamaoniga o faalogona o le alofa faavalea ua lē mafai ona pulea, o le “faaitiitia o le agaga taumafai i le aʻoga.” O se isi faailoga masani o le vave ese mai uō ma aiga. E mafai foʻi ona oo i le faalumaina. “Ou te masiasi lava e faailoa atu lenei mea,” ua faapea mai ai le tusitala o Gil Schwartz, “ae sa ou amio faavalevalea i le taimi o oʻu faalogona alofa faavalea mo Siuli.” E tusa po ua leva ona tuanaʻi atu taimi o faalogona o le alofa faavalea, ae mafai pea ona manatuaina lou taumulimuli solo i se tasi, lou faia o ni gaoioiga aliali i luma o le lautele, ma au gaoioiga i le tulaga masani sa pei ai oe o se vale.

Fesagaʻi ma Mea Moni

O le tupu o Solomona, o se tasi o tane sa sili lona atamai i ē uma na fananau mai, na matuā uluʻitinoina i le alofa atu i se teine o lē na leai ni ona faalogona mo ia. Sa sasaa atu ona lagona i le teine e ala i nisi o solo fatu aupito sili ona mananaia na ia tusia, sa taʻu atu ai i le teine faapea o ia ua “lalelei mai e pei o le masina; e pupula mai e pei o le la”—ae sa lē uaʻi mai lava le loto o le teine ia te ia!—Pese a Solomona 6:10.

E ui i lea, na oo ina faamuta e Solomona ana taumafaiga ina ia maua le teine. E mafai faapefea foʻi e oe, ona e puleaina ou faalogona? Ua taʻua e le Tusi Paia: “O le ua faatuatua i lona lava loto, o le vale ia.” (Faataoto 28:26) E matuā moni lenei manatu pe afai ua lofia oe i se moomooga alofa faivavale. Peitaʻi, “o lē savali ma le poto, e laveaiina o ia.” O lona uiga o le vaai i mea e tusa ai ma o latou tulaga moni o iai.

“E mafai faapefea ona e iloa le faamoemoe moni e ese mai le faamoemoega e lē faavaea?” o le fesili lea a Dr. Howard Halpern. “E ala i lou vaai totoʻa ma faamautinoa lelei mea moni.” Seʻi manatunatu: O le ā le tele o se avanoa o iai e ati aʻe ai se faigauō moni ma lea tagata? Afai o lea tagata o se tagata lauiloa, o le mea moni la o le a lē taitai ona e feiloaʻi atu i lena tagata! O ou avanoa foʻi la mo se tagata e matua atu e pei o se faiaʻoga e faapena foʻi ona matuā misi atoa.

E lē gata i lea, po o le tagata lea e te manaʻo i ai ua ia faailoa atu sona fiafia ia te oe? Afai e leai, po o iai la se māfuaaga moni e talitonu ai o le a suia tulaga o mea i le lumanaʻi? Po o e faauigasesē i le alofa fetosinaaʻi i le va o ituaiga, upu ma gaoioiga mamā a se alii po o se tamaʻitaʻi? E tusa ai o lenei mataupu, i le tele o atunuu o se tū masani mo alii le tausolomua i le faaali atu o faatosinaga alofa. E mafai e se teine talavou ona ia faalumaina o ia lava pe a taumafai faamalosi e taumulimuli i se tasi e lē o ano ane i ai.

E lē gata i lea, o le ā lau mea e fai pe afai e talia mai e lena tagata ou faanaunauga alofa? Po ua e sauni ea mo tiute tauave faalefaaipoipoga? Afai e leai, ia “faatea ese atu ia le tiga i lou loto” e ala i le teena o mafaufauga faivalea. E iai “ona po e alofa ai,” ma atonu o le a taunuu i le tele o tausaga mulimuli ane pe a e matua.—Failauga 3:8; 11:10.

Ia Iloilo Ou Faalogona

Na taʻua e Dr. Charles Zastrow e faapea: “O le alofa faavalea e tupu pe a faaata e se tagata i lona mafaufau le tagata lea o loo ia alofa faavalea i ai o se ‘manamea ua lelei atoatoa’; o lona uiga, e faapea ua iai i lea tagata uiga uma e moomia mo se paaga.” Peitaʻi, e leai se tasi e taʻu o se “manamea ua lelei atoatoa” o iai. Ua faapea mai le Tusi Paia: “Auā ua agasala tagata uma lava, ma ua le oo i le mamalu o le Atua.”—Roma 3:23.

Ia fesili ifo la ia te oe lava: O le ā le lelei o loʻu iloa o lea tagata ua taulaʻi atu i ai loʻu loto? Po ua ulu ea loʻu alofa i le na o se ata? Po o ua ou faatauasoina ea oʻu mata i vaivaiga o lenei tagata? Atonu e tasi lava sau iloiloga mautinoa e te faia i lau paaga o loo e moemiti i ai, e lava lena e toe aveese ai mai lou alofa faavalea! E aogā foʻi le iloiloina o le ituaiga alofa o loo e lagona mo lenei tagata. Ua faapea mai le tusitala o Kathy McCoy: “O le alofa e leʻi lava se loloto e mafai ona oo mai ma toe mou atu i le na o se taimi puupuu lava . . . O le taulaʻiga o loo uaʻi uma atu ia te oe, ma ua na ona e maʻi alofa i le manatu faapea ua ulu le alofa ia te oe . . . O le alofa e leʻi lava se loloto e taofiofi mamau, e lima mau, e fuā. . . . O le alofa e leʻi lava se loloto e faatalitalia le lelei atoatoa.”—Tagaʻi i le eseesega i le 1 Korinito 13:4, 5.

Aveesea o le Tama po o le Teine Mai Lou Mafaufau

E ioeina faapea, po o ā lava manatu lelei uma o lenei lalolagi, e lē tineia atoatoa ai le auala o e lagona ai. Ae mafai ona e taofia le faatuputeleina o le faafitauli. O le faitauina o tusi e faatatau i faiga alofa, o le matamata i ata o faiga alofa i le televise, pe tau foʻi o le faalogologo i ni musika patino e mafai ona leaga atili ai ou faalogona o le tuua toʻatasi. Ia ʻalofia la le soona mafaufau umi i na tulaga. “A leai se fafie, e mate ai le afi.”—Faataoto 26:20.

O se mafaufauga alofa faavalea e lē taitai ona suitulaga i tagata o ē alolofa moni ia te oe ma manatu mamafa ia te oe. Aua e te ‘vavaeesea oe.’ (Faataoto 18:1) Atonu o le a e iloaina ane, e mafai ona telē se fesoasoani atu a ou mātua. Po o ā lava au taumafaiga uma e nanā ai ou faalogona, atonu ua leva ona la iloaina e iai se mea o loo faalētonu ia te oe. Aiseā e lē faalatalata atu ai ia i laʻua ma tatala atu i ai lou loto? (Faatusatusa i le Faataoto 23:26.) Atonu foʻi e mafai e se Kerisiano taʻumatuaina ona faalogologo lelei atu ia te oe.

“Ia tele ni au gaoioiga e fai,” ua faalaeiau mai ai Esther Davidowitz. Ia faatino se mea o loo fai ma ou mausa, fai ni faamalositino, aʻoaʻo se gagana fou, amata se mataupu e fai ai ni saʻiliʻiliga faale-Tusi Paia. O le faaaafia atoatoa i galuega aogā e mafai ona tau faafeololo ifo ai āuga o le musu.

E lē faigofie le taumafai e aveesea faalogona o le alofa faavalea. Peitaʻi a o faagasolo taimi, o le a mou ese atu ai tigā. O le a e aʻoaʻoina le tele o mea e faatatau ia te oe ma ou faalogona, ma o le a sili atu ai ona sauniunia lelei oe e fesagaʻi ma le alofa moni pe a teʻi ua oo mai i le lumanaʻi! Peitaʻi o le a mafai faapefea ona e iloaina lelei le ‘alofa moni’?

Fesili mo Talanoaga

◻ Aiseā ua taatele ai faalogona o le alofa faavalea i talavou?

◻ O ai e masani ona avea ma taulaʻiga o le alofa faavalea o talavou, ma aiseā?

◻ Aiseā e mafai ai ona mataʻutia faalogona o le alofa faavalea?

◻ O ā nisi o mea e mafai e se talavou ona fai e foʻia ai se faalogona o le alofa faavalea?

◻ E mafai faapefea e se talavou ona ʻalofia le faatupuina aʻe o le alofa faavalea?

[Faamatalaga faaopoopo i le itulau 223]

‘E lē mafai ona ou ʻai. E lē mafai ona ou toe suʻesuʻe. Ou te moemiti ia te ia i le ao. Ua ou leagafaia lava’

[Ata i le itulau 220]

O se mea masani le tupu aʻe o ni faalogona alofa faavalea mo tagata o le isi ituaiga, o ē matutua atu, ma e lē o avanoa

[Ata i le itulau 221]

O lou matuā silasila totoʻa atu ma le toʻafilemu i lena tagata atonu e foʻia ai ou lagona o faanaunauga alofa