Mataupu 37

Aiseā e Lē Mafai ai Ona Ou Alu e Fai Sina Tafao?

I AFIAFI o Aso Faraile, sa masani lava ona alu atu ai Polinia i sauniga faa-Kerisiano. E fiafia tele o ia i talanoaga, peitaʻi o nisi taimi e lē fiafia ai ona o lona manatu faapea o loo iai o ia iinā, ae o loo ō atu uma ana uō i le aʻoga e tafafao ma faafiafia i latou lava.

Pe a tuua le sauniga, i le foʻi atu o Polini i le fale, e na te pāsia ai se nofoaga o loo iai i lo latou vaipanoa, o iinā e masani ona tafafao ai le ʻautalavou. Ua ia faapea mai: “Ona o loʻu tosina atu i le leo tetele o musika ma molī feemoemoaʻi, sa ou autilotilo atu ai i faamalama a o matou pāsia le nofoaga, ma faaata ma le moomoo i loʻu mafaufau se taimi manaia atonu o loo maua e na tagata.” Na iʻu lava ina iai se taimi na oo ai ina sili ona tāua i lona olaga lona faanaunauga ina ia alu e fiafia faatasi ma ana uō.

E iai nisi taimi atonu e oo ai ia te oe faalogona e pei o Polini faapea, talu ai lou avea o se Kerisiano, ua iai la se mea ua e misia. E te fia matamata i le ata o le TV lea o loo talanoa uma i ai isi, ae fai atu ou mātua o loo tumu i faiga sauā. E te fia alu atu i le nofoaga o faleoloa ma feofeoaʻi solo ai ma isi tamaiti o le tou aʻoga, ae fai atu ou mātua o na tamaiti o ni ‘aumea leaga.’ (1 Korinito 15:33) E te fia alu atu i le patī lea o le a auai uma atu i ai au aumea i le aʻoga, ae fai atu Tinā ma Tamā e te lē alu.

E foliga mai o loo saʻoloto au aumea i le aʻoga i mea latou te fiafia ai, o loo auai i faafiafiaga faamusika ma fai a latou patī seʻia oo i le malama o le isi aso, e aunoa ma le faalavelave i ai o o latou mātua. E te ono fuā ai i lo latou saʻolotoga. E lē faapea e te manaʻo e faia ai se mea leaga. E na ona e manaʻo lava seʻi e alu e fai sina tafao tasi.

Faafiafiaga—Le Silafaga a le Atua

Ia e mautinoa e lē sesē lou manaʻo ina ia iai ni mea e te maua ai le fiafia. Aemaise ai, o Ieova o ia o “le Atua fiafia.” (1 Timoteo 1:11, NW) Ma e ala mai i le tagata poto o Solomona, ua Ia fetalai mai ai: “Talavou e, ina olioli ia i lo outou talavou. Ia outou fiafia a o outou talavou pea. Ia fai le mea tou te mananaʻo e fai, ma ia faamalie manaʻoga o o outou loto.” Ae peitaʻi, na lapataʻi mai Solomona: “Ia manatua o le a faamasinoina outou e le Atua i mea uma lava tou te faia.”—Failauga 11:9, 10, Today’s English Version.

O le iloaina faapea e te tali atu i le Atua mo au gaoioiga e matuā ese ai la le vaaiga e faatatau atu i faafiafiaga. E ui ina lē faasalaina e le Atua se tasi mai le faaaluina o se taimi e fai ai sina tafao, ae na te lē taliaina se tasi o lē e ‘tele le manao i mea faafiafia,’ o se tagata e ola mo na o faafiafiaga. (2 Timoteo 3:1, 4) Aiseā ua faapea ai? Seʻi manatu i le tupu o Solomona. Sa ia faaaogā le tele o ana ʻoa e tofotofoina ai mea uma lava sa ono mafai ona faafiafiaina ai le tagata. Ua ia faapea mai: “O mea uma foi sa fia vaai i ai oʻu mata ua ou le vaoia i ai; na ou le taofia foi loʻu loto i se mea e tasi e fiafia ai.” O le ā le iʻuga? “Faauta foi, o mea faatauvaa uma lava ia, ma le ʻai i le matagi.” (Failauga 2:10, 11) Ioe, e silafia e le Atua, e pau le mea e iʻu i ai se olaga o loo faananau atu i faafiafiaga, e tuua ai oe ma lagona lē taulau ma le lototigā.

E finagalo foʻi le Atua ina ia e ʻaloese mai faiga na o loo faaleagaina ai, e pei o le faaaogāsesēina o fualaau faasāina ma feusuaʻiga a o leʻi faaipoipo. (2 Korinito 7:1) Peitaʻi, o le tele o mea o loo faia e talavou mo lo latou faafiafiaina e mafai ona oo ina maileia ai se tasi i nei faiga. Mo se faaaʻoaʻoga, sa filifili se tasi teine talavou ina ia auai atu i se faatasiga ma ni uō i le aʻoga e aunoa ma se tagata matua o vaavaaia lena faatasiga. Ua faapea mai o ia: “E uigaese le manaia o musika na tāina, sa mananaia siva, sa manaia meaʻai māmā na fai, ma le matuā fiu e ʻata.” Ae teʻi loa “ua aumai e se tasi ni mariuana e ulaina. Ua aumai foʻi ma ava malosi. O iinā loa na amata ai ona lē toe pulea tulaga o mea.” Na iʻu i le faia ai o feusuaʻiga lē tatau faaleituaiga. Na taʻutino mai le teine: “Sa matuā leaga lava oʻu faalogona, ma o loo mafatia pea loʻu mafaufau talu mai lena taimi.” Pe a aunoa ma le vaavaaiga mai se tagata matua, e faigofie lava i na faatasitasiga ona avea o ni “patī mataʻutia,” po o ni poula!—Kalatia 5:21, Byington.

E lētioa la ona matuā manatu mamafa ou mātua i le auala o loo e faaaluina ai ou taimi paganoa, atonu i le faatapulaaina o mea e mafai ona e alu i ai ma po o ai foʻi e mafai ona e aumea atu i ai. O le ā le la māfuaaga? Ina ia fesoasoani ia te oe e utagia le lapataʻiga a le Atua: “Ina faatea ese atu ia le tigā i lou loto, ma tuu ese atu le leaga i lou tino; auā o le tama itiiti ma le taulealea e faatauvaa ia.”—Failauga 11:10.

Pe Fuā Atu ea i Ē o Loo Saʻilia Faafiafiaga?

E faigofie lava ona galo uma nei mea ae fuā atu i le saʻolotoga e foliga o loo olioli ai nisi talavou. Na taofia e Polini lona auai atu i sauniga faa-Kerisiano ae aufaatasi atu ia i latou o loo saʻilia faafiafiaga. Ua ia faapea mai: “Na oo ina ou faatinoina mea leaga uma lava sa lapataʻia ai aʻu.” O le auai atu o Polini i faiga faafiafiaga na iʻu ai i le puʻeina o ia ma tuu i se aʻoga mo teine talavou ua lē mafai ona pulea!

I aso ua leva, sa iai i le tusitala o le Salamo 73 lagona ia e pei ona lagona ai Polini. Sa taʻutino mai le tusitala: “Na ou mataua i e vālea; na ou vaai i le manuia o e ua amio leaga.” Na oo lava ina lē mautonu o ia i le tāua o le ola e tusa ai ma mataupu silisili amiotonu. Na ia faapea mai: “E moni lava, ua ou faamamāfuaina loʻu loto, ma aʻu fafano oʻu lima ina ua ou le sala, a e fai fua lava.” Peitaʻi na toe oo ane ia te ia se malamalama aogā: O tagata amioleaga o loo “i mea maseesee,” o loo fememeaʻi i latou auā ua toetoe ona fetaiaʻi lea ma mala!—Salamo 73:3, 13, 18.

Sa aʻoaʻoina e Polini lenei lesona—i se auala faigatā. Ina ua mavae atu ana faiga ma taaga faalelalolagi sa iai, ona ia faia lea o ni suiga mataʻina olaga ina ia toe maua le finagalo malie o le Atua. Ae o oe, e lē tatau ona e pagatia i le puʻeina o oe, lou maua i se faamaʻi pipisi mai feusuaʻiga lē mamā, po o lou pagatia ina ua mavae le faaaogāina o fualaau faasāina ma e iloa ai le mataʻutia o le tau e totogia mo le mauaina o ‘se taimi seʻi tafao tasi ai.’ E tele auala aogā ma le atiina aʻe ai, e olioli ai se tasi o loo maua e aunoa ma na lamatiaga. O ā nisi o na auala?

O Tafaoga e Fiafia ma Aogā

O se suʻesuʻega na faia i talavou Amerika na faaalia ai, e fiafia talavou “i ni tafaoga ma ni fiafiaga e ō atu faatasi ai ma le aiga i nisi taimi.” O le faia faatasi o mea o se aiga e lē gata e mālie ae mafai foʻi ona atili autasi ai le aiga.

E sili atu ona uigā lenei mea na i lo le tau ina matamata faatasi i le TV. Ua faapea mai Dr. Anthony Pietropinto: “O le faalavelave o le matamata TV, e ui atonu o loo iai ma isi tagata o loo matamata faatasi, ae o le mea moni lava o se gaoioiga o loo faia toʻatasi lava a se tagata. . . . Peitaʻi, o mea e faaaogā i ai le taimi e pei o ni taaloga i totonu o le fale, ni taaloga i tuāfale o le fale, le faia o ni kuka, ni galuega taulima, ma le faitauina leotele o ni tusi, e mautinoa le aumaia ai o ni avanoa e sili atu ona tele ina ia talatalanoa ai, felagolagomaʻi, ma faatupuina ai manatunatuga atamai na i lo le televise lea ua tele ina fao uma ai le taimi o le aiga.” E pei ona fai mai Ioane, o se tamā e toʻafitu ona ālo: ‘E oo lava i le faamamāina o le laufanua pe valiina le fale e mafai ona maua ai le fiafia pe a faia faatasi o se aiga.’

Pe afai e leʻi faia faatasi e lou aiga na mea, ia tausolomua nei ona taʻu atu na mea i ou mātua. Taumafai e faaali atu ni manatu e mananaia ma faafiafia ai, mo ni mea e ō faatasi le aiga e tafafao ai po o ni galuega latou te faia faatasi.

Peitaʻi, e lē tau tulia i le faifaimea faatasi ma isi ina ia e fiafia ai. O Maria, o se talavou o lē e faaeteete lava i le filifilia o ana aumea, ua ia iloa le auala e fiafia ai i ni ona taimi na o ia. Fai mai a ia: “Ou te tāina le piano ma le vaiolini, ma ou te faaaluina ni taimi e aʻoaʻo ai.” E faapena foʻi le tala a Melisa, o se isi teine talavou: “O nisi taimi ou te faaaluina ai le taimi e tusi ni tala po o ni solo e faafiafia ai lava aʻu.” E mafai foʻi ona e aʻoaʻoina le faaaogā lelei o le taimi e ala i le atiina aʻe o ni tomai e pei o le faitautusi, galuega faakamuta, po o le tāina o se meafaifaaili.

Faatasitasiga Faa-Kerisiano

Mai lea taimi i lea taimi, e maua foʻi le fiafia i le faifaimea faatasi ma uō. Ma i le tele o vaipanoa, e anoanoaʻi ni mea aogā e mafai ona outou olioli ai. O le faataavale polo, faasee, tietie uila, o taaloga pesipolo, ma le pasiketipolo, o kirikiti, volipolo o taaloga ua taatele. E mafai foʻi ona e taumafai e asiasi i se fale mataaga po o se nofoaga e tausi ai manu. Oi, ioe, e lē āfaina foʻi le auaufaatasi ma tau lava ina tātā ai ni pese pe matamata i se ata lelei i le TV faatasi ma isi talavou Kerisiano.

E mafai foʻi ona e talosagaina ou mātua e fesoasoani ia te oe i le fuafuaina o se faatasiga aloaʻia. Fai ia mālie e ala i le faatulaga o ni mea eseese e fai, e pei o ni taaloga e fai vaega ma ni pese e usu vaega. Pe afai e iai ni taleni tau musika a nisi o au uō, atonu e mafai ona e fai atu i ai ina ia latou faatinoina mai sina taleni. E mafai foʻi ona faaopoopo atu i le manaia o se faatasiga le iai o ni taumafa lelei, ae lē tau manaʻomia ona matuā mananaia pe faataugatā. O nisi taimi e mafai lava e malo ona aumai ni ituaiga eseese o meaʻai.

Po o iai se paka po o se nofoaga e latalata ane e mafai ona taaalo ai i se polo pe tāʻeele ai? Aiseā e lē fuafua ai se tafaoga? E mafai foʻi e aiga ona saosaolaumea i le aumaia o meaʻai ina ia leai ai se isi e mafatia i le tulaga tau seleni.

O le fai fuafua o le ki autū lena. E lē manaʻomia ona matuā leotele naʻuā le musika ina ia mālie i le faalogo, e lē tau tulia foʻi i ni siva matagā ma ni siva faalelalolagi ina ia maua ai le mālie. E faapena foʻi i taaloga e faia i fafo, e mafai lava ona olioli ai e aunoa ma ni faiga faatauvā ua lē pulea. Peitaʻi, ua lipotia mai e se tasi matua: “O nisi taimi ua oo ina finau ai nisi talavou, e toetoe lava fufusu ai.” Ia faia na mea i se tulaga e olioli ai e ala i le uia o fautuaga a le Tusi Paia ina ia ʻalofia le ‘fefaatavā.’—Kalatia 5:26.

O ai e tatau ona e valaauliaina? Ua faapea mai le Tusi Paia, “Ia alolofa atu i le au uso.” (1 Peteru 2:17) Aiseā e faagata mai ai a outou faatasitasiga i na o ē tou te tupulaga? Ia faalautele atu au auaufaatasiga. (Faatusatusa i le 2 Korinito 6:13.) Sa mātauina e se tasi matua e faapea: “O ē matutua, e ui e masani ona lē faia sa latou vaega i nisi o gaoioiga, ae fiafia lava pe a latou ō mai ma matamata i mea o loo fai.” O le iai o ē matutua e masani ona fesoasoani e puipuia ai mai le oo ina lē pulea. Peitaʻi, e lē mafai ona valaauliaina “le au uso” uma i so o se faatasitasiga. Aemaise ai, o faatasitasiga laiti e sili atu ona faigofie le puleaina.

O faatasitasiga faa-Kerisiano e aumaia ai foʻi le avanoa e atiina aʻe ai le tasi i le isi i le itu faaleagaga. O le mea moni, ua lagona e nisi talavou faapea o le faaopoopo atu o mea faaleagaga i se faatasiga e aveesea ai le mālie. Na faitio mai se isi tamaitiiti Kerisiano: “Pe a fai a matou faatasitasiga, e pau lava mea e fai o le ‘Nofo i lalo, avane lau Tusi Paia, ma faia ni taaloga faale-Tusi Paia.’” Ae peitaʻi, na faapea mai le faisalamo: “Amuia le tagata . . . e naunau o ia i le tulafono a Ieova.” (Salamo 1:1, 2) O talanoaga—po o ni taaloga foʻi—e faaautū i le Tusi Paia e mafai ona fiafia ai. Atonu e pau le mea e te manaʻomia o le faamaaiina o lou poto i le Tusi Paia ina ia mafai ona e faia atoatoa ai se sao.

O le isi manatu o le iai lea o nisi latou te faamatala maia auala na avea ai i latou ma Kerisiano. Pe faaopoopo atu foʻi sina lagona māfana ma sina ʻata e ala i le valaaulia o nisi e faamatala mai ni a latou tala mālie. E masani ona maua mai i nei mea ni lesona aogā. O loo iai nisi mataupu o lenei tusi o loo faataatia mai ai le faavae mo se talanoaga manaia e faia e se vaega pe a faia se faatasitasiga.

Ia Tausia Pea le Paleni o Faafiafiaga!

E mautinoa sa leʻi teena e Iesu Keriso le iai o sina taimi e faafiafiaina ai. O loo taʻua e le Tusi Paia lona auai atu i le tausamaaga o se faaipoipoga i Kana, lea e mautinoa sa tele ai meaʻai, musika, siva, ma ni auaufaatasiga faalaeiau. Na oo foʻi ina faia e Iesu se sao mo le sologa lelei o le tausamaaga o le faaipoipoga e ala i lona saunia faavavega o le uaina!—Ioane 2:3-11.

Peitaʻi sa leʻi faaautū atu le soifuaga o Iesu i ni faiga patī faalausosoo. Sa ia faaaluina le tele o lona taimi i le saʻilia o manaʻoga faaleagaga, i le aʻoaʻoina o tagata i le finagalo o le Atua. Na ia fetalai: “O laʻu mea e ʻai, ia ou faia le finagalo o le na auina mai aʻu, ma faaiu lana galuega.” (Ioane 4:34) O le faia o le finagalo o le Atua na avatu ai ia Iesu le fiafiaga e sili ona tumau na i lo nisi lava faafiafiaga e vave mavae. I aso nei, o loo iai pea “o mea e tele e faia i le galuega a le Alii.” (1 Korinito 15:58, NW; Mataio 24:14) Ae pe afai e iai ni taimi, e te lagona ai se manaʻomia mo sina faafiafiaga, ia olioli ai i se auala e paleni ma ia mamā. E pei ona faaupu mai e se tasi tusitala: “E lē o taimi uma lava e tumu ai le olaga i mea mananaia ma mea e fiafia ai—atonu e oo foʻi ina e matuā lē lavā pe ana fai o le tulaga lena!”

[Faamatalaga faaopoopo]

Fesili mo Talanoaga

◻ Aiseā e fuā ai nisi talavou Kerisiano i talavou o le lalolagi? Po ua iai ea se taimi na oo ai ia te oe lena lagona?

◻ O le ā le lapataʻiga ua tuuina atu e le Atua i talavou e faatatau i a latou amio, ma e tatau faapefea i lenei mea ona aafia ai la latou filifiliga o faafiafiaga?

◻ Aiseā e valea ai le fuā atu i talavou na o loo solia tulafono ma mataupu silisili a le Atua?

◻ O ā nisi o auala e te olioli ai i ni faafiafiaga e mamā (1) ma tagata o lou aiga, (2) pe a na o oe lava, ma (3) nisi uso Kerisiano?

◻ Na faapefea ona faataatia e Iesu Keriso se faaaʻoaʻoga i le tulaga paleni i faafiafiaga?

[Faamatalaga faaopoopo i le itulau 297]

“Ona o loʻu tosina atu i le leo tetele o musika ma molī feemoemoaʻi, sa ou autilotilo atu ai i faamalama a o matou pāsia le nofoaga, ma faaata ma le moomoo i loʻu mafaufau se taimi manaia atonu o loo maua e na tagata”

[Faamatalaga faaopoopo i le itulau 302]

“Ua aumai e se tasi ni mariuana e ulaina. Ua aumai foʻi ma ava malosi. O iinā loa na amata ai ona lē toe pulea tulaga o mea”

[Ata i le itulau 299]

Po o misia moni ea e talavou o ē usitaia mataupu silisili faale-Tusi Paia, se taimi e fai ai sina tafao?

[Ata i le itulau 300]

O le faatinoina o se mea patino e fiafia ai (hobby) o se tasi lena auala aogā e faaaogā i ai taimi paganoa

[Ata i le itulau 301]

E sili atu ona mālie faatasitasiga faa-Kerisiano pe a iai ni mea eseese e fuafuaina ma eseese uma tupulaga o tagata o loo auai