Faaopoopoga
Molimau a Ieova—Le Tofotofoga i Taotoga ma Mataupu Faavae Tau Amio
Toe lomia i le faatagaga a le American Medical Association mai le Journal of the American Medical Association (JAMA), Novema 27, 1981, Tusi 246, Nu. 21, itulau 2471, 2472. Aiā e lomia ai 1981, American Medical Association.
O loo faafeagai foma‘i ma se lu‘i faapitoa i le togafitia o Molimau a Ieova. O sui o lenei lotu e iai so latou talitonuga maumaututū faalelotu e teena ai le taliaina o toto mai se isi po o le toto o le tagata lava ia, e aofia ai RBC [sela mūmū], ma WBC [sela papae], po o sela ninii e pogai ai ona to‘a le toto (platelets). E toatele o le a latou talia le faaaogaina o masini (e faaola i se vailaau e lē se toto) mo le togafitia o le fatu ma le māmā, o le masini e togafitia ai fatugao (dialysis), po o isi foi mea faigaluega faapena, pe afai o le a lē faalavelaveina ai le taamilosaga a le toto i fafo o le tino. E lē manaomia ona atugalu fua tagata galulue faafoma‘i faapea ina ne‘i tuua‘ia i latou, auā o le a uia e Molimau a Ieova laasaga uma faaletulafono, e lava lelei lea e aveesea ai se tuua‘iga e tusa ai ma lo latou lē taliaina o le toto ona o mea ua a‘oa‘oina ai i latou. Latou te talia isi vailaau e mafai ona avea ma togafitiga e aunoa ma se tuigā toto. O le faaaogaina o nei vailaau ma isi togafitiga poto, ua faia ai e foma‘i ni taotoga tetele o so o se ituaiga ma‘i, i gasegase Molimau, o ē matutua faapea foi tamaiti. Ua faapea ona atiina a‘e ai se faiga ua talafeagai mo ia gasegase ina ia ogatasi ma le mea moni e uiga i le togafitiga o le “tagata atoa.” (JAMA 1981;246:2471-2472)
O LOO faafeagai foma‘i ma se lu‘i ua tuputupu a‘e ua avea ma mataupu tāua tau le soifua mālōlōina. O loo iai le sili atu i le ‘afa miliona Molimau a Ieova i le Iunaite Setete o ē latou te lē taliaina tuigā toto. Ua faateleina le aofai o i latou ua auaumea ma Molimau a Ieova. E ui lava talu ai nei, sa toatele ni foma‘i ma ni falema‘i na manatu faapea, o le teena o le tuigā toto o se faafitauli faaletulafono, ma latou sailia ai faatagaga faaletulafono ina ia tuiina ai e pei ona latou talitonu, o se mea lea ua alagatatau i faiga faafoma‘i, ae ua faaalia lata mai nei e tusi faafoma‘i e faapea, ua iai se suiga iloga i manatu ua tulai mai. O lenei mataupu atonu o se iuga lea o le tele o le poto masani ua maua mai taotoga sa faia i gasegase e maualalalo o latou hemoglobin e feaveaia le okesene i le toto, ma atonu foi ua atagia mai ai le agaigai pea i luma o le amanaiaina o mataupu faavae faaletulafono e uiga i le maliega aloaia.
O lenei la, e tele le aofaiga o taotoga fuafuaina lelei, atoa ma manu‘a e faafuaseia e aafia ai Molimau o ē matutua ma ē laiti ua mafai ona faafoe e aunoa ma tuigā toto. Talu ai nei, sa feiloai ai sui o Molimau a Ieova ma tagata o ē faafoeina pulega ma taotoga i nisi o falema‘i tutotonu e sili ona tetele i le atunuu. O nei fonotaga sa faaleleia ai le malamalamaga ma fesoasoani ai i fesili e uiga i le laveaiina mai le toto, suiga o totoga, ma le alofiaina o feteenaiga faafoma‘i po o le tulafono.
TULAGA O MOLIMAU I TOGAFITIGA
E talia e Molimau a Ieova faiga faafoma‘i ma togafitiga e pei o taotoga. O le mea moni, e toatele i latou o ni foma‘i, ma o ni foma‘i foi o taotoga. Peitai, o Molimau o ni tagata e matuā aafia tele i la latou lotu o ē e talitonu faapea, o le tuiina o le toto e faasāina mo i latou, e faavae mai i faaupuga faale-Tusi Paia e pei o le: “A o le aano . . . o i ai le ola, o lona toto foi lea aua tou te aai ai” (Kenese 9:3-4); “[Ia e] sasaaina lona toto ma ufiufi i le eleele” (Levitiko 17:13-14); ma “Ia taumamao mai . . . [le faitaaga] ma mea titina, ma le toto” (Galuega 15:19-21).1
E ui o nei fuaiupu e lē o tusia mai i ni faaupuga faafoma‘i, ae ua manatu i ai Molimau, o le faasaāga atoa lea o le tuigā toto, o le RBC, ma le vaega faasuavaia o loo iai kopusele (plasma), e faapena foi sela WBC atoa ai foi ma le vaega o sela faato‘a toto (platelets). Peitai, o lea malamalamaga faalelotu e lē faasāina faasoloatoa ai aogā o vaega o le toto e pei o le polotini e ta‘ua o le albumin, le immune globulin, ma ni sauniuniga e faaleoleo pe afai ua alu tele le palapala (hemophiliac); e ao i Molimau taitoatasi ona filifili le tagata lava ia pe na te mafai ona taliaina ia vaega.2
Ua talitonu Molimau, o le toto ua toesea mai le tino e tatau ona lafoai ese, o lea latou te lē taliaina ai le toto o le tagata lava ia na muamua ona tui ma teuina ona faato‘ā toe tui mulimuli ane lea ia te ia lava (autotransfusion). O faiga i le taimi e fai ai le taotoga, lea e ao mai ai le toto ona toe faafoi lea i le tino o le ma‘i a o alu pea le taamilosaga e lē taofia, po o le hemodilution, lea e aofia ai le teuina o le toto, latou te lē taliaina. Peitai ane, e toatele Molimau latou te talia le faaaogaina o masini e togafiti ai fatugao (dialysis) ma le masini mo taotoga o le fatu ma le māmā (e faaola i se vailaau e lē se toto) e faapena foi e pei o le ao mai o le toto i le taimi e taoto ai, pe a lē faalavelavea ai le taamilosaga a le toto; e ao ona feutagai le foma‘i ma gasegase taitoatasi e tusa ai ma le mea e faatonu mai e lona loto fuatia ifo.2
E lē manatu Molimau e faapea, o loo tautala tuusa‘o le Tusi Paia i suiga o totoga (transplants); e ui i lea, o faaiuga e tusa ai ma le suiga o le afeimata (cornea), fatugao, po o le suia foi o isi totoga e tatau lava ona faia e Molimau taitoatasi.
E MAFAI LAVA ONA FAIA TAOTOGA FAIGATA
E ui ina lē talia i nisi taimi e foma‘i e faia taotoga lo latou togafitia o Molimau, talu ai ua latou manatu, ua pei le tulaga o Molimau i le lē faaaogaina o vaega o le toto o se mea, “ua taofia ai le sa‘olotoga o foma‘i,” peitai ua toatele foma‘i ua filifili nei e sili ai le manatu i lea tulaga ua na o se lu‘i ua sili ona faigata i o latou tomai. Talu ai ona e lē tetee Molimau i vailaau e pei o le colloid po o le crystalloid e fai ma sui, e lē tetee foi i meafaigaluega e faaaogā ai le uila (electrocautery), faagase i le faapa‘ūina i lalo o le toto maualuga (hypotensive anesthesia),3 po o le faaitiitia o le vevela, ina ia faigofie ona fai le taotoga (hypothermia), ua mafai ai ona faamanuiaina le faaaogaina o nei togafitiga. O le faaaogaina o le hetastarch,4 ma se fua maualuga e faaui atu i le alatoto o le iron dextran i le taimi nei ma le lumanai,5,6 atoa ma si tamai matānaifi e faaaogā i tipiga e ta‘ua o le “sonic scalpel,”7 ua taulau manuia na mea uma ma e lē feteenai i talitonuga faalelotu. E lē gata i lea, afai e faamaonia le malupuipuia ma aogā8 o le vailaau e sui ai, lea na faato‘ā maua talu ai nei e ta‘ua o le fluorinated blood substitute (Fluosol-DA), o lona uiga la, e lē feteenai ma talitonuga o Molimau a Ieova lona aogā.
I le 1977, na fai mai ai e Ott ma Cooley9 se faamatalaga e uiga i taotoga o le fatu ma le taamilosaga i alatoto (cardiovascular) sa faia i Molimau e to‘a 542 e aunoa ma le tuiina o le toto, na la faapea mai e tusa i lenei faiga, e mafai lava ona fai “auā e maulalo tele lona lamatiaga.” I le tali mai la i la tatou talosaga, na faia ai talu ai nei e Cooley se toe autaluga o fuainumera o le 1,026 taotoga, ae 22 pasene sa faia o tamaiti, sa mautinoa ai e faapea “o le lamatiaga o taotoga i gasegase i le vaega a Molimau a Ieova, e lē tulaga maualuga naua nai lo isi.” E faapena foi, Michael E. DeBakey, MD, na faapea mai a ia: “I le tele o tulaga [na aofia ai Molimau] o le lamatiaga o taotoga sa faia e aunoa ma le faaaogaina o le tuigā toto, sa leai lava se eseesega ma lamatiaga i gasegase na matou faaaogaina i ai tuigā toto” (o se talanoaga moni ma ia, Mati 1981). O loo faamauina foi i tusi, taotoga tetele na faamanuiaina, o alāfeaulata10 ma taotoga e faaleleia ai mea faaletonu o le ponaivi11 (urologic ma orthopedic). Na tusia foi e G. Dean MacEwen, MD, ma J. Richard Bowen, MD, e faapea, o taotoga e 20 o tamaiti [Molimau] sa faia ma le faamanuiaina (faamaoniga sa lei lomia, Aokuso 1981). Na la faaopoopo mai: “E manaomia e se foma‘i o taotoga ona faavaeina e ia se filosofia o le faaaloalo mo aiā tatau a se gasegase na te teena se tuigā toto peitai, na te faia pea lava taualumaga i se auala e tatala atu ai le saogalemu mo le gasegase.”
Ua lipotia mai foi e Herbsman12 ni tulaga na faamanuiaina, e aofia ai tulaga na aafia ai ni talavou, “sa leaga ma tele naunau le toto na alu.” Na ia ta‘utino mai o “Molimau ua i se tulaga faigata pe a oo i le tulaga e manaomia ai le toto. Ae ui lava i lea, ua faapea foi ona manino mai ua iai nei a tatou vailaau aogā e suitulaga i le toto.” I le mātau atu e toatele foma‘i o taotoga e iai se lagona e faatautū mai i le taliaina o Molimau o ni gasegase ona o “ē fefefe i āuga e tusa ma tulafono,” ua ia faaalia e faapea, e lē o se atugaluga o toe aogā.
ATUGALUGA FAALETULAFONO MA Ē ITI
Ua uma ona sainia e Molimau le pepa a le American Medical Association e faamatuu atu ai alii foma‘i ma falema‘i i tuua‘iga,13 ma o loo tauaveina e Molimau se pepa e fai ma molimau, le Medical Alert ua sauniunia mo feutagaiga ma ofisa o foma‘i ma tulaga faaletulafono, o loo aloaia lona aogā e oo mai i le asō. O nei pepa faaletulafono o loo tusia ai gasegase (po o latou sui) ma ofoina atu ai foi puipuiga mo foma‘i, auā ua taofi Justice Warren Burger e faapea, o se taualumaga lē talafeagai o loo fai “e foliga mai e lē lagolagoina” le tuuaia o foma‘i auā ua sainia e se tagata se pepa faapena. I le ma lea foi, i le faamatalaga e uiga i lenei faiga, i se iloiloga i “togafitiga faafoma‘i fai faamalosi ma sa‘olotoga faalelotu,” na tusi mai Paris14 e faapea: “Na ta‘ua e se tagata faasalalau o lē na ia faia se suesuega i le lomiga e faapea, ‘Sa lei mafai ona ou mauaina se tasi e iai le pule e aloaia ai le faamatalaga faapea, o le a faasala se foma‘i . . . ona o le solitulafono . . . i lona lē faataulauina ona faamalosia o se tuigā toto i se gasegase e lē lotomalie i ai.’ O le tulaga matautia e foliga mai o se fua lea o se mafaufau e mātele i le itu tau tulafono nai lo se mea moni e alagatatau.”
O le tausiga o ē iti e aumaia ai le atugaluga sili ona tele, e masani ona iu i gaoioiga faaletulafono e faasaga i mātua i lalo o tulafono o le tuulafoaia o fanau. Peitai, o na gaoioiga o loo fesiligia e le tele o foma‘i ma loia ua masani ma mataupu e uiga i Molimau, o ē e talitonu o mātua Molimau, latou te sailia tausiga faafoma‘i lelei mo a latou fanau. E lē mananao e lafoaia o latou tiute tauave faamātua pe tuu atu i faamasino po o isi. E uunaia e Molimau e faapea, e ao ona manatunatu i talitonuga faalelotu faaleaiga. Na tusi mai Dr. A. D. Kelly, le Failautusi muamua o le Faalapotopotoga Faafoma‘i i Kanata e faapea15 “o mātua o tamaiti ma lē pito ane o le aiga o le gasegase ua lē o toe iloaina se mea, ua ia te ia le aiā tatau e faamatala ai le manaoga o le gasegase. . . . Ou te lē fia manaomia taualumaga o le faamasinoga na faia i le 2.00 i le vaveao e aveesea ai se tamaitiiti mai le tausiga a ona mātua.”
O le mea moni lava ia ua talia e faapea, e iai se aiā tatau a mātua i le tausiga o a latou fanau, e pei o lea pe a fesagai ma tulaga e ono maua ai ni aogā ae oo mai ai foi ma lamatiaga, e faaaogā ai le togafitiga ua ta‘ua o le radiation, po o togafitiga i vailaau e ta‘ua o le chemotherapy. Mo mafuaaga tauamio e ese ai mai le finauga i le matautia o tuigā toto,16 ona talosaga lea o mātua Molimau ina ia faaaogā togafitiga e lē o faasāina faalelotu. Ua talafeagai lea ma le talitonuga faafoma‘i i le togafitiga “o le tagata atoa,” ma ia aua foi ne‘i faagaloina i manatu le leaga tumau faalemafaufau ma le amio e faaono oo i ai ona o sea taualumaga fai faauliulitō e solia ai talitonuga faavae faaleaiga. E masani i falema‘i tetele i atunuu e iai so latou poto masani i Molimau, ona latou taliaina gasegase ua aveina atu i lo latou falema‘i mai isi falema‘i ua lē mananao e togafitia ai Molimau, e oo lava i ma‘i o tamaiti.
LU‘I MO LE FOMA‘I
E iloa lelei, o le tausiaina o Molimau a Ieova atonu e foliga mai o le a tulai mai ai se manatu fou mo le foma‘i ua tuutoina e faasaoina ola ma le soifua mālōlōina e ala i le faaaogaina o togafitiga eseese uma i lona lava malie e fai ai. I tusitusiga a le faatonu o nusipepa ua faatomuaina mai ai se faamatalaga faasolo o ni mataupu e uiga i taotoga faigata ma matautia o Molimau, na faaalitino ai e Harvey17 e faapea, “Ua ou matuā ita tele i na talitonuga e mafai ona aiā fua i la‘u galuega.” Peitai, sa ia faaopoopo mai e faapea: “Atonu o tatou foi ua faigofie ona galo, o taotoga ua o se atamai e faalagolago i luga o tomai eseese totino a tagata taitoatasi. O tomai eseese ia e mafai ona faaleleia.”
Na matauina e le polofesa o Bolooki18 i se lipoti e faanoanoa ai e faapea, o se tasi o falema‘i e tele naua ana galuega e fai i le togafitiga o manu‘a o le tino i Dade County, i Florida, sa iai sa latou “aiaiga faalilolilo e teena ai le togafitiga” o Molimau. Sa ia faasino atu faapea, “o le tele o taualumaga fai i lenei vaega o gasegase o loo ō mai faatasi ma lamatiaga e lē tele se faigata nai lo o tulaga masani.” Na toe faaopoopo mai: “E ui lava ina atonu o le lagona o foma‘i o taotoga e faapea e tusa ua aveesea ai se tasi o meafaigaluega o togafitiga faafoma‘i o nei ona po. . . . Ae ou te talitonu e ala i taotoga o nei gasegase o le a latou iloaina ai le tele o nisi mea fou.”
Nai lo le manatu faapea o le gasegase Molimau o se faafitauli, ua sili ona toatele foma‘i ma gasegase ua talia tulaga e pei o lu‘itau i faiga faafoma‘i. I le faafetaiaia o le lu‘i ua latou atiina a‘e ai se faatulagaga o faiga mo lenei vaega o gasegase ua taliaina i le tele o falema‘i tutotonu i le atunuu atoa. O foma‘i lava nei i le taimi lava e tasi o loo latou saunia tausiga e sili mo le lelei atoatoa o gasegase. E pei ona matauina e Gardner et al19 e faapea: “O ai o le a faamanuiaina pe a faamālōlōina mafatiaga o le tino ae faapefea le ola faaleagaga i le Atua, e pei ona ia vaai atu i ai, ua faagutugutulua, e ta‘ita‘iina atu ai i se ola e leai sona uiga ma atonu e sili ai ona leaga nai lo le oti lava ia.”
O Molimau latou te matauina e faapea, e tusa ai ma faiga faafoma‘i, o lo latou talitonuga maumaututū e aliali mai ua faaopoopoina atu ai se leaga o le matautia ma e mafai ona faafaigata ai le tausiga o i latou. E tusa ai ma lea manatu, ua latou faaalia lava le talisapaia e lē masani ai i le tulaga lautele o le tausiga ua latou mauaina. I le faaopoopo atu i lo latou mauaina o lea mea tāua o le faatuatua loloto ma se faanaunauga a‘ia‘i ina ia ola, ua latou felagolagomai ai ma le fiafia faatasi ma foma‘i atoa ma le aufaigaluega faafoma‘i. O lea la, o foma‘i atoa ma gasegase ua autasi i le faafeagai ai ma lenei lu‘i tutasi.
NISI TUSI
1. Jehovah’s Witnesses and the Question of Blood. Brooklyn, NY, Watchtower Bible and Tract Society, 1977, pp. 1-64.
2. The Watchtower 1978;99 (June 15):29-31.
3. Hypotensive anesthesia facilitates hip surgery, MEDICAL NEWS. JAMA 1978;239:181.
4. Hetastarch (Hespan)—a new plasma expander. Med Lett Drugs Ther 1981;23:16.
5. Hamstra RD, Block MH, Schocket AL:Intravenous iron dextran in clinical medicine. JAMA 1980;243:1726-1731.
6. Lapin R: Major surgery in Jehovah’s Witnesses. Contemp Orthop 1980;2:647-654.
7. Fuerst ML: ‘Sonic scalpel’ spares vessels. Med Trib 1981;22:1,30.
8. Gonzáles ER: The saga of ‘artificial blood’: Fluosol a special boon to Jehovah’s Witnesses. JAMA 1980;243:719-724.
9. Ott DA, Cooley DA: Cardiovascular surgery in Jehovah’s Witnesses. JAMA 1977;238:1256-1258.
10. Roen PR, Velcek F: Extensive urologic surgery without blood transfusion. NY State J Med 1972;72:2524-2527.
11. Nelson CL, Martin K, Lawson N, et al: Total hip replacement without transfusion. Contemp Orthop 1980;2:655-658.
12. Herbsman H: Treating the Jehovah’s Witness. Emerg Med 1980;12:73-76.
13. Medicolegal Forms With Legal Analysis. Chicago, American Medical Association, 1976, p. 83.
14. Paris JJ: Compulsory medical treatment and religious freedom: Whose law shall prevail? Univ San Francisco Law Rev 1975;10:1-35.
15. Kelly AD: Aequanimitas Can Med Assoc J 1967;96:432.
16. Kolins J: Fatalities from blood transfusion. JAMA 1981;245:1120.
17. Harvey JP: A question of craftsmanship. Contemp Orthop 1980;2:629.
18. Bolooki H: Treatment of Jehovah’s Witnesses: Example of good care. Miami Med 1981;51:25-26.
19. Gardner B, Bivona J, Alfonso A, et al: Major surgery in Jehovah’s Witnesses. NY State J Med 1976;76:765-766.