Puipuia la Oulua Fanau Mai se Tuigā Toto

¹ “Faauta, o le fanau, o le tofi lea mai ia Ieova.” (Sala. 127:3) Afai o ia te oulua lena tofi tāua mai ia Ieova, ua ia te oulua la o ni mātua, se avega tauave fiafia, e ui ina matuiā, o le aʻoaʻoina, tausia ma le puipuia o la oulua fanau. Mo se faaaʻoaʻoga, po ua lua faia ea laasaga uma e talafeagai mo le puipuia o la oulua fanau mai se tuigā toto? O le a faapefea ona tali atu la oulua fanau pe a fesagaʻi i le lumanai ma se fuafuaga o se tuigā toto? Ua tou talanoaina ea o se aiga, le mea atonu o le a tou faia ina ia feagai ai ma le poto ma se tulaga faafuaseʻi e faamataʻuina ai e se tuigā toto?

² O le sauniunia o lou aiga mo na tulaga, e lē manaomia ona avea ma mafuaaga o le popole pe soona omia ai. E lē mafai ona tatou iloa ma sauniuni mo mea uma lava e tutupu i le olaga, peitai, e tele ni mea e mafai ona oulua faia o ni mātua, e puipuia ai la oulua fanau mai se tuigā toto a o mamao le taimi. O le faagaloina o na avega tauave, e mafai ona iʻu ai i le tuiina o le toto i la oulua tama pe a vaaia e se fomaʻi. O le ā la e mafai ona fai?

³ E Tāua se Talitonuga Maumauai: E ao ona manatunatu mamafa i le po o faapeī le maumauai o o oulua lava talitonuga e faatatau i tulafono a le Atua e uiga i le toto. Po o oulua aʻoaʻoina ea la oulua fanau ina ia usiusitai ia Ieova i lenei mataupu, e pei ona oulua aʻoaʻoina o i latou i lana tulafono e uiga i le faamaoni, amioga mamā, solitū, ma isi vala o le olaga? Po o oulua manatu moni ea e pei ona poloai mai ai le tulafono a le Atua i le Teuteronome 12:23: “O le toto, aua lava e te ʻai ai”? Ua faaopoopo mai le Te 12 fuaiupu e 25: “E te le ʻai ai lava; ina ia manuia ai oe ma au fanau pe a mavae atu oe, pe a e faia le mea tonu i luma o Ieova.” Atonu e faapea mai se fomaʻi o le a ‘manuia’ la oulua tama maʻi pe a faaaogā le toto, peitai, e tatau lava ona oulua filifili maumauai e teena le toto mo oulua lava ma la oulua fanau, a o leʻi oo i so o se faalavelave faafuaseʻi, ma ia faatāuaina la oulua faiā ma Ieova e sili atu na i lo o so o se folafolaga e faaumiumi ai le ola ae o loo solia ai le tulafono a le Atua. Ia gauai atu nei i le Atua, ma maua ai le ola e faavavau i le lumanai!

⁴ Ioe, e manatu mamafa Molimau a Ieova i le ola. Latou te lē o faanaunau e oti. Latou te mananao e ola ina ia mafai ai ona latou vivii atu ia Ieova ma faia lona finagalo. O se tasi lena o mafuaaga latou te ō ai ma ave a latou fanau i falemaʻi mo se togafitiga. Latou te talosaga atu i fomaʻi ina ia togafitia i latou, ma pe a taʻu atu ia te i latou faapea o le toto, o le mea masani po o le togafitiga faafomaʻi lea ua faamaonia o le a faia, ona latou talosaga atu lea mo se togafitiga faafomaʻi e suitulaga i le toto. E tele vailaau e suitulaga i le toto. O loo faaaogāina na vailaau e fomaʻi agavaa. O lena togafitiga e sui ai, ua lē na o se vailaau faatauvaa, peitai o loo faia aʻe i togafitiga maufaatuatuaina faafomaʻi ma taualumaga ua faamaumauina i tusi autū i faiga faafomaʻi. E faitau afe fomaʻi i le lalolagi atoa o loo felagolagomai ma i tatou i le saunia o se togafitiga lelei faafomaʻi e aunoa ma le faaaogāina o le toto, e ui ina o loo avea pea o se faafitauli i nisi taimi le mauaina o ni fomaʻi o ē latou te togafitia fanau a Molimau e aunoa ma le faaaogāina o le toto.

⁵ Sailia o se Fomaʻi Felagolagomai: E tele mea e popole i ai fomaʻi i le togafitiga o maʻi, ma pe a oulua talosaga atu ia te i latou e togafitia la oulua tama e aunoa ma le toto, o le a atili ai ona faigata. E ioe nisi o fomaʻi e togafitia tagata matutua ma le faaaloalo i o latou manaoga e uiga i le toto pe afai e faatumu se pepa faamaonia e faatagaina ai. Atonu foi o le a faapena ona ioe nisi o fomaʻi e togafitia i latou e laiti o ē ua faaalia le taʻumatuaina, ona ua aloaia e nisi o faamasinoga e faapea, ua iai i ē laiti ae taʻumatuaina le aiā e faia ai a latou lava filifiliga mo togafitiga faafomaʻi. (Vaai Le Olomatamata o Oketopa 15, 1991, itulau 16-17, mo le talanoaga e uiga i mea e iloa ai sē e laitiiti ae taʻumatuaina.) Peitai, atonu e mumusu fomaʻi e togafitia fanau laiti, ae maise lava ni pepe, seʻi vaganā ua latou mauaina le faatagaga e tuiina ai le toto. O le mea moni, e matuā toaitiiti lava ni fomaʻi o le a aumaia se faamautinoaga atoatoa e faapea, latou te lē faaaogāina le toto i lalo o so o se tulaga pe a togafitia se tamaitiiti. Mo ni mafuaaga faafomaʻi, atoa ma itu faaletulafono, ua manatu ai le toatele o fomaʻi e faapea, e lē mafai ona latou tuuina atu se faamautinoaga faapena. E ui i lea, o loo iai se aofaiga toatele o fomaʻi ua mananao e togafitia fanau a Molimau a Ieova, a o latou faia le mea ua latou manatu latou te mafaia e faatatau i o tatou manaoga i le toto.

⁶ I lenei itu, ae e faapefea, pe afai i la oulua sailiga o se fomaʻi talafeagai mo la oulua tama, ae oulua mauaina ai se tasi ua lausilafia i lona felagolagomai lelei ma Molimau a Ieova ma o lē sa faia ni togafitiga faapena e aunoa ma le toto mo isi Molimau i le taimi ua mavae, a o lea ua ia manatu nei faapea ua faasā o ia e le tulafono mai le avatuina ia te oulua o se faamautinoga aʻiaʻi e faapea o le a lē faaaogāina le toto? Peitai, ua ia faamautinoa atu ia te oulua e faapea o lona manatu o le a leai foi se faaletonu i lena taimi. Atonu e mafai ona oulua filifilia lena o se avanoa e sili ona lelei mo oulua. I lalo o na tulaga, atonu o le a oulua faaiʻua ai e faapea, e mafai ona oulua faatagaina e fai. Peitai, ia matuā faamanino atu e faapea, o le faatagaina o le togafitiga faafomaʻi mo la oulua tama, o le a oulua lē faatagaina ai ni tuigā toto. O le uia o lena auala, o le a avea lea o se avega tauave e tatau ona oulua tauaveina e aunoa ma le manatu i la oulua faaiʻuga faapea e femoumouai.

⁷ O le mea moni, afai e mafai ona oulua mauaina se togafitiga talafeagai e fai ma suitulaga, pe faaitiitia atili ai pe atonu o le a aveesea ai le faafitauli o le faaaogāina o le toto, atonu la o le a oulua faaaogāina lena ala e itiiti ai se lamatiaga. O le a faatalitalia oulua ina ia faia se taumafaiga filigā e sailia ai se fomaʻi o vailaau po o se fomaʻi tipitipi o lē o le a faia e sili atu na i lo o so o se isi fomaʻi, ina ia maua se ioega e lē faaaogāina ai le toto. O le puipuiga e sili ona lelei, o le faatalitalia lea o ni faafitauli. Ia faia taumafaiga uma e sailia ai se fomaʻi e felagolagomai a o leʻi tupu le faalavelave. Taumafai e aloese mai fomaʻi ma falemaʻi e lē felagolagomai i le mea e mafai ai.

⁸ I nisi atunuu, o se isi mea e mafai ona eseese ai pe faia se tuigā toto, o le auala lea e totogi ai togafitiga a le falemaʻi. I nofoaga o loo inisiua ai le soifua malōlōina o mātua po o isi tupe faaleoleo e mafai ona sailia ai se fomaʻi latou te filifilia, e atili ai ona faigofie ona lē talia o fanau e fomaʻi ma ē pulea le falemaʻi e lē felagolagomai. Ua masani ona avea le lava o tupe e totogi ai, ma itu e faamautinoa ai le ituaiga o auaunaga ma le lagolagosua e maua e se aiga mai fomaʻi ma falemaʻi. E lē gata i lena, e tusa pe naunau se falemaʻi po o se fomaʻi e taliaina, ae o le siitia ese o se tamaitiiti e masani lava ona faalagolago i le tele o tupe a mātua e totogi ai le togafitiga. Ma o ē o loo faatalitali e avea ma tinā, e tāua tele ona tausia lelei o outou soifua malōlōina i le taimi o le maʻitaga! O le a fesoasoani tele lena e puipuia ai pepe mai le fananau lē au ma faafitauli e aofia ai, ona o togafitiga masani mo pepe e fananau lē au ma o latou faafitauli, o le tele lava o taimi e aafia ai le toto.

⁹ I nisi taimi, e faitio mai ai fomaʻi faapea, e lē talanoa atu Molimau a Ieova e uiga i lo latou teena o le toto, seʻi vaganā ua oo i le taimi mulimuli. E lē o le tulaga lena e tatau ona iai. O se tasi o mea muamua e ao i mātua Molimau ona faia pe a ō atu i le falemaʻi po o le faatoʻai atu foi mo auaunaga a se fomaʻi, o le talanoaina lea o lo latou tulaga e uiga i le toto. Afai e aofia ai se taʻotoga, ona talosaga atu lea mo se feiloaiga faavave ma se fomaʻi o vailaau faagase. Atonu e mafai ona fesoasoani atu le fomaʻi tipitipi i lo oulua faia faapea. E ao ona faatumu ma le faaeteete le pepa faataga e taofia ai. O loo ia te oe le aiā e vaseese ai so o se mea e te teena. Ina ia aveeseina so o se masalosaloga, ia tusi manino ai i le pepa faataga e taofia ai e faapea, mo mafuaaga faalelotu ma mafuaaga faafomaʻi, e lē manaomia pe lē taliaina foi le toto i lalo o so o se tulaga.

¹⁰ Fesoasoani Mai le Faalapotopotoga a Ieova: O ā sauniuniga ua faia e le faalapotopotoga a Ieova e fesoasoani ai ia te oulua ina ia puipuia la oulua fanau mai le toto? E tele faamatalaga. Ua lomia e le Sosaiete le tele o lomiga e aʻoaʻoina ai i tatou e uiga i le toto, atoa ma togafitiga i vailaau e lē o iai le toto e fai ma suitulaga. Po ua uma ea ona outou suesueina le polosiua o le How Can Blood Save Your Life? ma isi lomiga i lenei mataupu. Ma e toatele ou uso ma tuafafine i la outou faapotopotoga, o ē e mafai ona tele le fesoasoani ma le lagolagosua e mafai ona latou avatu ia te oulua. Afai e iai se faalavelave, atonu o le a manatu toeaina e tatau ona fuafua mo se leoleoga e 24 itula i le falemaʻi, ma e talafeagai lea i se toeaina ma mātua o le maʻi po o se isi sui vavalalata o le aiga. E masani lava ona faia ni tuigā toto pe afai e ō uma auaiga ma uo i le fale i le po.

¹¹ I le Iunaite Setete, e sili atu ma le selau Komiti e Fesootai ma Falemaʻi (Hospital Liaison Committee) o loo iai i aai tetele. Ua faia foi lena fuafuaga i isi atunuu tetele. I atunuu o loo i lalo o le lālā i Samoa i Sisifo, atonu e lelei i uso ona vili atu i le lālā, e ala i toeaina o la latou faapotopotoga, pe a latou manaomia se fesoasoani. E lē tatau ona vili atu ia te i latou e uiga i nai faafitauli laiti, ae aua le soona faatali umi e vili atu pe afai e iloa ua tupu se faalavelave matuiā. E masani lava ona latou taʻuina atu igoa o fomaʻi felagolagomai ma ni faufautuaga i vailaau e suitulaga i le toto. I mea e manaomia ma mafai ai, ua fuafuaina e nei uso ina ia faatasi atu, ma fesoasoani i le foiaina o le faafitauli.

¹² Sauniuni Lelei e Feagai ma Aafiaga a le Faamasinoga: Ae ā pe afai e manatu se fomaʻi po o se falemaʻi e sailia se faatagaga mai le faamasinoga ina ia tui ai le toto i la oulua tama? Po o le taimi ea lena e faamaamulu ai, i le manatu faapea e leai se isi mea e mafai ona fai i ai? E leai! Atonu o le a mafai pea ona taofia se tuigā toto. E ao ona faia se sauniuniga mo lena tulaga a o lava le taimi. O le ā e mafai ona fai?

¹³ O le malamalama i nisi o aiaiga faaletulafono o loo taʻitaʻia pe faia ai faaiʻuga a falemaʻi ma faamasino i nei mataupu, o le a fesoasoani tele lea ia te oulua i la oulua teteega. O se tasi o na aiaiga e matuā tāua, o le mea moni lea e faapea, ua lē tuuina atu e le tulafono i mātua se aiā saoloto ina ia taliaina ai pe teena se togafitiga faafomaʻi mo a latou fanau. E ui ina masani ona iai i mātua le aiā e taliaina ai pe teena ai se togafitiga faafomaʻi e pei ona latou mananao ai, ae ua lē saoloto mātua e teena se togafitiga ua manatu iai e tatau mo le lelei o sa la tama, e tusa foi pe faavae lo la teena i talitonuga moni faalelotu o loo iai.

¹⁴ O lenei aiaiga faavae, na faaalia lea i le faaiʻuga a le Faamasinoga Maualuga a le Iunaite Setete i le 1944 e faapea: “Atonu e saoloto mātua e avea i latou lava ma maturo. Peitai, e lē faapea ai ua latou saoloto i ni tulaga faapena, e faamaturoina a latou fanau a o leʻi oo i o latou tausaga ua faatulafonoina e mafai ona latou faia ai lena filifiliga mo i latou lava.” O le manatu lava lena e tasi mo le soifua malōlōina faaletino ma le lelei o se tamaitiiti o loo iai i tulafono e puipuia ai se tamaitiiti i aso nei. O na tulafono, e taofia ai le soona faia o se tamaitiiti, ua fuafuaina foi ina ia puipuia ai le fanau mai le lē taualoa i faiga faafomaʻi.

¹⁵ E mautinoa lava e lē teena e mātua Kerisiano, le puipuia o fanau mai le soona faia ma le faatamala o mātua. Peitai o tulafono e uiga i le lē taualoa o se tamaitiiti, atoa ma le faamatalaga a le Faamasinoga Maualuga o loo sii mai i luga, e masani lava ona lē saʻo le faatatauina i tulaga e aafia ai fanau a Molimau a Ieova. Aiseā? O se tasi o mea, e lē o iai se faanaunauga o mātua Molimau ina ia “faamaturoina” a latou fanau. Afai o iai, aiseā la o le a latou ave ai fua a latou fanau i le falemaʻi i le uluai taimi? I le tuufaafeagai, e naunau mātua Molimau e saili se togafitiga faafomaʻi mo a latou fanau. Latou te alolofa i a latou fanau ma mananao ina ia latou maua se soifua malōlōina lelei. Peitai, latou te talitonu ua ia i latou se tiute mai le Atua ina ia filifilia ai e tusa ma le ituaiga o togafitiga faafomaʻi e sili ona lelei mo a latou fanau. Latou te mananao e taulimaina faalavelave tau le soifua malōlōina o a latou fanau e aunoa ma le toto. E lē gata ina e sili ona lelei ma saogalemu lena togafitiga e suitulaga i lo le toto, ae e sili atu ona tāua, o le a tuua ai a latou fanau i se tulaga lelei ma lē sili o le Foai Ola, o Ieova le Atua.

¹⁶ E ui i ni aogā o togafitiga faafomaʻi e lē faaaogāina ai le toto, ae e manatu le toatele o fomaʻi ma ofisa mo le tausiga o tamaiti e faapea, o tuigā toto o se faiga masani faafomaʻi lea atonu e manaomia, pe e mafai foi ona faasaoina ai le ola i nisi o tulaga. O lea, ua mafai ai ona aliaʻi mai o faafitauli, pe a teena e mātua Molimau ni tuigā toto e fautuaina. I le tulaga lautele, ua lē faatagaina e le tulafono fomaʻi e togafitia le fanau e aunoa ma le maliega o mātua. Ina ia foia le lē maua o se maliega o mātua ina ia faaaogā le toto, atonu o le a saili ai e fomaʻi po o isi o ē pulea le falemaʻi se maliega mai se faamasino e ala i se faatonuga faafaamasinoga. Atonu o le a maua mai lena maliega e faatonuina e le faamasinoga, e ala i ofisa o le tausiga mo tamaiti po o fomaʻi po o ofisa o le falemaʻi o loo galulue e puipuia le tamaitiiti mai le lē taualoa i faiga faafomaʻi.a

¹⁷ O le tele o taimi, e vave tele ona maua se faatonuga mai le faamasinoga e faatagaina ai le faaaogāina o le toto, e aunoa ma se faaaliga i mātua pe e lē lava foi ona faaalia i ai. E taumafai fomaʻi, ma ē o pulea le falemaʻi, po o ofisa o le tausiga mo tamaiti ina ia faamaonia na faatonuga faavavevave e ala i le faapea mai, o loo iai se faalavelave faafuaseʻi mo togafitiga faafomaʻi, ma e lē lava le taimi e faailoa atoa atu ai i mātua le mea o loo tupu. Peitai, pe a fesiligia, ona taʻutino mai lea e fomaʻi faapea e lē o iai moni lava se tulaga faafuaseʻi ma latou te mananao i se faatagaga mai le faamasinoga “neʻi mea ane” ua manaomia se tuigā toto i le lumanai e tusa ai ma lo latou manatu. I le avea ma ē e tausia la oulua tama, ua ia te oulua ai le aiā faavae e iloa ai le mea o loo faia e fomaʻi, ma ē pulea le falemaʻi, po o ofisa mo le tausia o tamaiti, e uiga i la oulua tama i taimi uma. O loo manaomia e le tulafono, pe afai e matuā mafai ai, e ao ona faailoa atu ia te oulua taumafaiga ina ia maua se faatagaga mai le faamasinoga ma e ao ona faatagaina oulua e faailoa atu o oulua manatu e uiga i le mataupu i luma o le faamasinoga.

¹⁸ O na mea moni faaletulafono, ua faamamafaina ai le aogā o le sailia o se fomaʻi e felagolagomai. Ia galulue faatasi ma ia, atoa ma se fesoasoani mai toeaina ua tofia e le lālā, fesoasoani atu ia te ia ina ia sailia se togafitiga e suitulaga i le toto mo le foia o le maʻi o la oulua tama po o le siitia ese o la oulua tama i se isi fomaʻi po o se falemaʻi e maua ai se togafitiga faapena. Peitai, afai e foliga mai o loo fuafua e le fomaʻi, ma ē pulea le falemaʻi, po o se tagata faigaluega i le tausiga o tamaiti, ina ia maua se faatagaga mai le faamasinoga, e ao ona lua mataala e fesili i ai po o le mea lena o loo fuafuaina. I nisi taimi, e faia faalilolilo ai lena mea i le telefoni. Afai o loo iai se fuafuaga e ave i le faamasinoga, ia faamamafa i ai o loo oulua mananao e fia iloa, ina ia mafai ai foi ona faailoa atu o oulua manatu i le faamasino. (Faata. 18:17) Afai e lava le taimi, e masani ona fautuaina ina ia sailia le fesoasoani a se loia. O nisi taimi, e tofia ai e le faamasinoga ni loia. Afai e iai sau lava loia po o se loia e tofia e le faamasinoga, e mafai e le Matagaluega tau Tulafono a le Sosaiete ona avatu ia te ia ni faamatalaga, e fesoasoani ai ia te ia ina ia saunia le puipuiga sili e mafai ai i lalo o na tulaga.

¹⁹ Afai e ave lo oulua teena o le toto i le faamasinoga, e mafai ona matuā maumauai le taofi o se fomaʻi faapea e manaomia le toto ina ia faasaoina ai le ola po o le soifua malōlōina o la oulua tama. Ona o le leai o se tomai faafomaʻi o le faamasino, e masani ai ona ia gauai atu i le tomai faafomaʻi o se fomaʻi. E faapitoa lava ona moni o lena mea, pe afai e itiiti pe leai foi se avanoa e tuuina atu i mātua e faailoa atu ai o la manatu i le faamasinoga, ae e faatagaina le fomaʻi e faaleoina atu lana faitioga e uiga i le manaomia “vave” o le toto, e aunoa ma se luʻitau atu i ai. O na faiga faaitutasi e lē faapea o le a faamautinoaina ai le mea moni. O le mea moni, o le taimi ma le pogai e manatu ai fomaʻi e manaomia le toto, e matuā faalagolago lava ia te i latou, ma e lē mautinoa. E masani lava, pe a faapea mai se tasi fomaʻi e manaomia atoatoa le toto ina ia faasaoina ai le ola o se tamaitiiti, ae e fai mai se isi fomaʻi e agavaa i le taulimaina o lena faalavelave e tasi e aunoa ma le toto, e lē manaomia le toto ina ia togafitia ai le maʻi.

²⁰ O le ā la oulua mea o le a fai pe afai e fesili atu se loia po o se faamasino pe aiseā ua oulua teena ai se tuigā toto e “faasaoina ai le ola” o la oulua tama? E ui ina o le mea muamua atonu o le a oulua mafuli atu i ai, o le faamatala atu lea o lo oulua talitonuga i le toetu ma faailoa atu le malosi o lo oulua faatuatua faapea o le a toe faatuina mai e le Atua la oulua tama pe afai e maliu, ae o lena tali, o le a na ona faatalitonuina ai le faamasino, o lē o loo sili ona popole i le lelei faaletino o le tamaitiiti e faapea, o oulua o ni tagata mapo lotu ma e tatau ona ia faauilavea e puipuia la oulua tama.

²¹ O le mea o loo fia iloa e le faamasinoga, e ui ina oulua teena le tuiina o le toto ona o le tausisi maumauai i faavae faalelotu, ae lua te lē o teena togafitiga faafomaʻi. E manaomia ona iloa e le faamasino, e lē o oulua o ni mātua e faatamala pe fai mea tuulafoai, ae o oulua o ni mātua alolofa o ē e mananao e togafitia la oulua tama. Lua te lē ioe e tutusa aogā ua folafola mai e se tuigā toto ma ona iʻuga matuiā ma lavelave e mulimuli ane ai, ae maise ona o loo maua vailaau e suitulaga i le toto e lē aumaia ai na lamatiaga.

²² E faalagolago i le tulaga o mea, atonu lua te faailoa atu ai i le faamasino faapea, o le taofi lena o se tasi fomaʻi e manaomia le toto, peitai e taofi eseese fomaʻi i o latou manatu, ma lua te mananao e maua se avanoa e saili ai se fomaʻi o lē e mafai ona togafitia la oulua tama, e ala i le tele o togafitiga o loo maua e lē o faaaogāina ai le toto. Faatasi ma le fesoasoani a toeaina ua tofia atu e le lālā, atonu ua uma ona oulua maua se fomaʻi faapena o lē o le a togafitia la oulua tama e aunoa ma le toto, ma o lē atonu e mafai ona ia avatu se faamaoniga aogā i le faamasinoga, pe ala atu i le telefoni. Atonu o le a mafai e le komiti faufautua ona avatu i le faamasino—e oo foi i se fomaʻi o loo sailia se faatonuga mai le faamasinoga—ni mataupu faafomaʻi o loo faaalia ai le auala e mafai ai ona taulimaina ma le uigā le maʻi o la oulua tama e aunoa ma le faaaogāina o le toto.

²³ A talosagaina ni faamasino e avatu faanatinati ni faatonuga faafaamasinoga, e masani lava ona latou lē manatunatu pe manatuaina foi le tele o lamatiaga o le toto, e aofia ai le AIDS, tupa, ma le tele o isi mau tulaga mataʻutia. E mafai ona oulua faailoa atu na mea i le faamasino, ma e mafai foi ona oulua faailoa atu ia te ia e faapea, ona o oulua o ni mātua Kerisiano, lua te manatu ai i le faaaogāina o le toto o se isi tagata i se taumafaiga e faatumauina le ola, o se matuā solia lea o le tulafono a le Atua, ma o le faamalosia o le toto i la oulua tama, o le a manatu i ai e tutusa pau lava ma le toso faamalosi. E mafai e oulua ma la oulua tama (pe afai e lava lona matua e tu ai mo ona lava talitonuga) ona faamatala atu lo outou inoino mo sea osofaia faaletino, ma e mafai ona tagi atu i le faamasino ina ia aua neʻi tuuina atu se faatagaga, ae ia faatagaina oulua e sailia se togafitiga faafomaʻi e suitulaga i le toto mo la oulua tama.

²⁴ Afai e faia se puipuiga lelei, ona matuā iloa lelei ai lea e faamasino o le isi faamatalaga—o la oulua faamatalaga lea—o ni mātua. Ona latou lē toe vavevave ai lea i le faatonuina atu o se tuigā toto. I nisi tulaga, e matuā faasāina ai lava e faamasino le saolotoga o fomaʻi e faaaogāina le toto, e oo foi ina talosaga atu e iloilo muamua vailaau e suitulaga i le toto, po o le tuu atu foi i mātua o le avanoa e saili ai fomaʻi o ē e faia togafitiga e aunoa ma le toto.

²⁵ I le feagai ai ma i latou o ē saili ina ia faamalosia se tuigā toto, e manaomia tele ona aua neʻi oulua tuuina atu so o se faamaoniga e iloa ai le femoumouai o o oulua talitonuga. O nisi taimi, e fesili atu ai faamasino (ma fomaʻi) pe e iai i mātua so o se faigata pe a “tuu atu” ia te i laʻua le avega tauave mo le faaiʻuga ina ia tui le toto, i le manatu faapea o le a faigofie ai mo mātua ona ola e tusa ma o la loto fuatiaifo. Peitai, e ao ona faamanino atu i ē uma o loo aafia ai, ona o oulua o ni mātua, lua te manatu ai o se matafaioi le faaauau pea ona faia o mea uma lua te mafaia ina ia taofia ai se tuigā toto. O la oulua avega tauave lena mai le Atua. E lē mafai ona tuu atu i se isi.

²⁶ O lea, i talanoaga ma fomaʻi, atoa ma faamasino, e manaomia ona oulua sauniuni e taʻu manino atu ma ia maumauai lo oulua tulaga. Afai e faatagaina e le faamasinoga se faatonuga, e ui i ni a oulua taumafaiga e sili atu, ia faaauau pea ona talosaga i le fomaʻi e aua le tuiina le toto ma uunaia e faia se togafitiga e suitulaga ai. Ia faaauau pea ona tauanau ia loto malie e manatunatu i mataupu faafomaʻi ma fautuaga a so o se fomaʻi o loo naunau e faafesootai atu e uiga i se togafiti mo le faafitauli ina ia taofia ai le toto. I le tele o mea na tutupu, e sau ai se fomaʻi mai le potu sa faia ai le taotoga, o lē sa foliga mai sa lē gauai atu, ma faailoa atu ma le mimita e faapea na te leʻi faaaogāina le toto. O lea, e tusa lava po ua uma ona avatu le faatonuga a le faamasinoga, ia aua lava neʻi faavaivai ai!—Vaai le lomiga o Le Olomatamata o Oketopa 15, 1991, “Fesili Mai le Au Faitau.”

²⁷ Ia manatua, na fetalai Iesu e faapea: “Ia outou ma tagata; auā latou te tuuina atu outou i [faamasinoga], . . . E taʻitaʻiina atu foi outou i luma o alii ma tupu ona o aʻu, e fai ma molimau ia te i latou atoa ma nuu ese.” Ina ia tatou maua le toʻa i lalo o na tulaga, na faaopoopo mai Iesu e faapea, o le a fesoasoani mai le agaga paia e faamanatu ia te i tatou mea o le a talafeagai ma aogā e tautala atu ai i na avanoa.—Mata. 10:16-20.

²⁸ “O le ua faautauta i se mea, e maua e ia le mea lelei; o lē faatuatua foi ia Ieova, amuia o ia.” (Faata. 16:20) Mātua, ia faia sauniuniga e manaomia a o mamao, ina ia puipuia ai la oulua tama mai se tuigā toto e faaleagaina ai faaleagaga. (Faata. 22:3) Fanau, ia talia le aʻoaʻo atu a o outou mātua i le faia o na sauniuniga ma faatatauina i o outou loto. I le avea o se aiga, ia ‘filifili mausalī e aua le ʻaai i le toto . . . ina ia manuia ai outou,’ ona o le mauaina o le faamanuiaga ma le faamaoniga o le finagalo malie o Ieova.—Teu. 12:23-25.

[Faaopoopoga i lalo]