Sa Leʻi Ola Muamua ma Feoti Agaga i le Lalolagi

O loo iai agaga! I le nofoaga o agaga, o loo iai agaga lelei ma agaga leaga. Pe o i latou ea o ni peresona o ē na ola ma feoti i luga o le lalolagi?

E leai, e lē faapea i latou. Pe a maliu se tagata, e lē alu atu loa o ia i se lalolagi o agaga, e pei ona mafaufau i ai le toatele o tagata. E faapefea ona tatou iloaina lenei mea? Auā ua fai mai ai faapea le Tusi Paia. O le Tusi Paia o le tusi o mea moni e mai le Atua moni e toatasi, o lona suafa o Ieova. Na foafoaina e Ieova tagata; ua na silafia lelei po o ā e tutupu ia i latou pe a latou maliliu.—Salamo 83:18; 2 Timoteo 3:16.

Ua faapea mai le Tusi Paia na faia e le Atua Atamu, le uluai tagata mai “le efuefu o le eleele.” (Kenese 2:7) Na tuu e le Atua o ia i totonu i le Parataiso, le faatoaga o Etena. Pe a na usiusitai pea Atamu i le tulafono a Ieova, semanu e lē oti lava ia; manū faapenei o ola mai pea o ia i luga o lenei lalolagi e oo mai pea i aso nei. Ae ina ua solia ma le loto i ai e Atamu le tulafono a le Atua, ona fetalai atu lea o le Atua ia te ia: “[O le a] e toe foi atu i le eleele; auā na faiina aʻi lava oe; auā o le efuefu oe, e te toe foi atu lava i le efuefu.”—Kenese 3:19.

O le ā le uiga o lenei mea? Ia, o fea sa iai Atamu a o leʻi foafoaina o ia e Ieova mai le efuefu? Sa leʻi iai lava o ia. Sa leʻi avea o ia o se agaga i le lagi a o leʻi fanau mai. Sa leʻi soifua lava ia. O lea ina ua fetalai Ieova faapea o Atamu o le a “toe foi atu i le eleele,” sa uiga faapea o ia o le a oti Atamu. Sa leʻi faaliliuina atu o ia i se nofoaga o agaga. I lona maliu, na lē toe ola ai Atamu, ua lē toe iai lava. O le oti, ua leai lava se ola.

Ae faapefea isi o ē ua maliliu? Pe e lē o ola pea i latou? Ua tali mai le Tusi Paia faapea:

• “E oo uma lava [tagata uma ma manu] i le mea e tasi; e mai i le efuefu uma lava, e toe foi atu foi uma lava i le efuefu.”—Failauga 3:20.

• “O e ua oti, latou te le iloa se mea.”—Failauga 9:5.

• “O lo latou alofa foi, ma lo latou ita, ma lo latou mataua, ua mavae lava ia.”—Failauga 9:6.

• “E leai se galuega, po o se mafaufau, po o se iloa, po o se poto i le tuugamau, o loo e alu atu i ai.”—Failauga 9:10.

• “E foi atu i le eleele na i ai o ia [o le tagata]; e faaumatia i lea lava aso ona manatunatu.”—Salamo 146:4.

Pe ua faigata ona e taliaina nei mau? Afai o lea, ia manatu mai i lenei mea: O le tele lava o aiga, e faigaluega ai le tamaloa auā le tausia o lona auaiga. Pe afai e maliu le tamaloa, e masani lava ona puapuagatia ai si ona aiga. I nisi o taimi, e leai ai se tupe e maua e lona toalua ma lana fanau e faatau ai ni meaai. Atonu o le a alu atu se fili o lenei tamaloa ma faia ni faiga leaga ia i latou. Seʻi fesili ifo nei la oe ia: ʻPe afai o loo ola pea lea tamaloa i le nofoaga o agaga, aisea ua lē faaauauina ai ona ia tausi maia lona aiga? Aisea ua na lē puipuia ai lona aiga mai tagata leaga?’ Talu ai ua saʻo lelei nei mau. O lea tamaloa ua lē o toe iai se ola, ua lē mafai ona ia toe faia so o se mea.—Salamo 115:17.

Po o le uiga ea la o lenei mea o ē ua maliliu o le a lē toe ola mai lava i latou? E leai. O le a tatou talanoaina mulimuli ane e uiga i le toetu. Ae o lona uiga, o tagata ua maliliu latou te lē o iloaina mai mea o e faia. E lē mafai ona latou vaai mai ia te oe, lagona mai oe, pe talanoa mai foi ia te oe. E lē manaomia ona e mataʻu ia i latou. E lē mafai ona latou fesoasoani mai ia te oe, ma e lē mafai foi ona latou faaleaga mai ia te oe.—Failauga 9:4; Isaia 26:14.